Mateyo 20

Cikozyanyo cabasimilimo

1“Nkaambo bwami bwakujulu buli kozyenye amuntu umwi wakafuma cifumo-fumo kuti anjizye basimilimo mumuunda wakwe wamisaansa. 2Lino nibakamana kuzuminana abasimilimo kuti bavole di lyomwe abuzuba, wakabatuma mumuunda wakwe. 3Lino naakazwa, aafwiifwi acikasaalizi wakabona bamwi kabakkede buyo mucisambalilo. 4Wakati kulimbabo, ‘Anywebo kamuya mumuunda wangu, ndamuvozya mbumweelede.’ 5Aboobo bakainka. Muntu ooyo wakacita mbubonya ciindi casikati alimwi anilyakaunga. 6Nikwakaba kumazuba wakainka, waakujana abamwi balikkede, wakati kuli mbabo, ‘Ino nkaambo nzi nomwiide kukkede aano buzuba boonse?’ 7Bakati kulinguwe, ‘Nkaambo taakwe watunjizya mulimo.’ Mpawo wakati kulimbabo, ‘Kamuya mukabeleke mumuunda wangu anywebo.’

8“Lino nikwakaba kumangolezya, mukamwini muunda wamisaansa wakati kumubanzi wakwe, ‘Baite basimilimo, ubavozye usaangune kumusyaalizi ugolele kuli wasaanguna.’ 9Nkabela aabo bakasika ciindi cakumazuba boonse bakavola di lyomwe. 10Lino bataanzi nibakasika, bakali kuyeeya kuti balo balavola manji pele pe, 11aboobo bakatongookela mwini muunda 12bakati, ‘Aaba basyaalizi babeleka buyo oola lyomwe, nikuba boobo wabapa mbubonya mbuli mbootupa swebo notwabeleka buzuba boonse akufwa zuba.’ 13Walo wakaingula umwi wabo wakati, ‘Mweenzuma, taakwe nindakubisizya pe. Sena taakwe nitwazuminana mudi lyomwe? 14Bweza buyo lyako uunke, ndasala kuti ndipe ooyu musyaalizi mbubonya mbuli mbwindapa nduwe. 15Sena nsikonzyi kucita mbweyanda azintu zyangu? Naa wandijatila nkoto yabubi nkaambo ndimwaabi?’ 16Mbuboobo basyaalizi mbubayooba bataanzi abalo bataanzi mbubayooba basyaalizi.”

Jesu mbwaakasinsima zyalufu lwakwe ciindi catatu

(Maako 10.32-34; Luka 18.31-34)

17Lino Jesu naakali kuya buya ku Jelusalemu, wakatola basikwiiya kumbali kaya bweenda wakati kulimbabo, 18“Tuya ku Jelusalemu eelyo ncobeni Mwanaa Muntu uyooabwa kubapaizi basilutwe abamayi ba Mulawo. Bayoomupa mulandu walufu, 19baakumana bayoomwaaba kuli bamasi kuti bakamunonge, bakamukwabbaule akumukankamina aciingano. Nikuba boobo mubuzuba bwatatu uyoobusigwa.”

Ncibakabumbila banyina Joni

(Maako 10.35-45)

20Mpoonya bamuka Zebedii bakaza abana babo balombe kuli Jesu. Bamufugamina kuti bamukumbile cimwi cintu. 21Jesu wakati kulimbabo, “Muyanda nzi?” Bakati, “Syomezya kuti bana bangu bobilo aaba, umwi akakkale kululyo lwako, umwi kulumwensi mubwami bwako.” 22Pele Jesu wakaingula kuti “Tamuzi ncomukumbila pe. Sena mulakonzya kunywida munkomeki yamapenzi njeyoonywida?” Mpawo bakati, “Tulakonzya.” 23Aboobo wakati kuli mbabo, “Ncibotu, muyoonywida munkomeki eeyo, pele kukkala kubbazu lyangu lyalulyo antela kulumwensi lwangu, teensi ndime eempa pe. Ngu Taata uyoopa mabazu aayo kuli baabo mbaakasala.” 24Basikwiiya bamwi nibakamvwa boobo bakanyemena babunyina aabo bobilo. 25Jesu wakabaita akuti, “Mulizi kuti bami babamasi balida amitwe yabantu, abalo beendelezi mbubonya. 26Pele kulindinywe takweelede kuba boobo pe. Kufumbwa ooyo uuyanda kuba mupati akati kanu uleelede kuba mubelesi wanu. 27Kufumbwa ooyo uuyanda kuba mutaanzi uleelede kuba mutwanga wanu. 28Amube mbubonya mbuli Mwanaa Muntu watakaboolela kubelekelwa pele kubelekela, akusanga buumi bwakwe kuti bube cinunuzyo cabantu boonse.”

Jesu mbwaakaponya boofu bobilo baku Jeliko

(Maako 10.46-52; Luka 18.35-43)

29Lino Jesu abasikwiiya bakwe bakazwa mu Jeliko, bantu banji bakabatobela. 30Lino baalumi bobilo boofu bakalikkede kumbali aamugwagwa nibakamvwa kuti Jesu ulainda bakoongolola bati, “Tubede aalweengelelo, O Mwami Mwanaa Devedi!” 31Bantu bakabakalalila babaambila kuti baumune. Pele balo bakoongololesya bati, “Akaka Mwami, tubede aalweengelelo, O Mwanaa Devedi.” 32Mpawo Jesu wakaima akubaita wati, “Muyanda kuti ndimucitile nzi?” 33Balo bakati kulinguwe, “O Mwami tuyanda kuti tubone.” 34Nkabela Jesu cakubafwida nkumbu wakaguma meso aabo, ndilyonya bakabona, akumutobela.

Currently Selected:

Mateyo 20: Tonga96

Highlight

Copy