Mateyo 21

Jesu mbwaakanjila mu Jelusalemu

(Maako 11.1-11; Luka 19.28-40; Joni 12.12-19)

1Lino nibakaswena aafwiifwi a Jelusalemu bakasika ku Betefage ku Cilundu camisamu ya Oliva. Jesu wakatuma basikwiiya bobilo, 2wakati kulimbabo, “Kamuya kumunzi uulya, muyoojana mbongolo iisungidwe amwanaayo. Mukazyaangunune muzilete kulindime. 3Kuti naa muntu akamubuzye amakani aaya, mukaambe kuti, ‘Mwami ulaziyanda.’ Eelyo uyoomuzumizya.” 4Eezi zyakacitika mbubonya Leza mbwaakaambila musinsimi kuti,

5“Ambila bamumunzi wa Ziyoni kuti,

‘Kolanga mwami wako ngooyo ulaboola kulinduwe.

Ulibombede, ulitantide ambongolo,

ncobeni, amwana wambongolo.’”

6Mpawo basikwiiya bakainka, bakaakucita mbubonya Jesu mbwaakabalailila. 7Bakaleta mbongolo amwanaayo, bakabikka majansi aabo ali nzizyo, eelyo wakatanta. 8Mpawo bantu banji bakayala majansi aabo mumugwagwa, alimwi bamwi bakakwapula tusanzu twazisamu batuyala mumugwagwa. 9Lino bantu aabo bakali kweendela kumbele abaabo bakali kumutobela bakali koongolola bati, “Alemekwe Mwanaa Devedi! Ulilelekedwe ooyo uuboola muzina lya Mwami Leza! Amumulemeke nobakujulu lyamajulu!” 10Jesu naakanjila mu Jelusalemu, bantu boonse bakazingwa bati, “Ani nguni ooyu?” 11Bantu banji bakati, “Ooyu ngo Jesu musinsimi uuzwa ku Nazaleta waku Galilii.”

Jesu mbwaakatanda basimakwebo

(Maako 11.15-19; Luka 19.45-48; Joni 2.13-22)

12Lino Jesu wakanjila muŋanda ya Leza akutanda boonse bakali kuuzya akuula oomo. Wakatingamuna matebule aabasikucincana mali azyuuno zyabaabo bakali kuuzya nkwilimba. 13Wakati kuli mbabo, “Kulilembedwe kuti, ‘ŋanda yangu iyooitwa kuti niŋanda yakukombela,’ pele mwaicita ciyubilo cababbi.”

14Lino boofu bakasika kulinguwe muŋanda ya Leza wakabaponya. 15Pele bapaizi basilutwe abamayi ba Mulawo nibakabona zintu zigambya nzyaakacita akumvwa bana kaboongolola muŋanda ya Leza kuti, “Alemekwe Mwanaa Devedi!” Bakakalala. 16Bakamubuzya kuti, “Sena ulimvwide ncobaamba?” Jesu wakati kulimbabo, “Iiyi, sena tiimwakabala kuti, ‘Wakacitya kuti bana atuvwanda tumutembaule.’” 17Lino Jesu wakazwa ooko akuya kumunzi wa Betani kuyooona.

Makani aamukuyu

(Maako 11.12-14, 20-26)

18Lino cifumo-fumo Jesu naakali kubweeda ku Jelusalemu wakafwa nzala. 19Nkabela naakabona mukuyu munsi aanzila, wakainka kuti alye nkuyu. Pele tuuwakazyede pe, matu aalo ngaakavwevwede. Mpawo wakati kulinguwo, “Utakazyali limbi nkuyu kuzwa sunu!” Mpoonya aawo mukuyu ooyo wakayuma cwaa. 20Lino basikwiiya nibakabona boobo, bakagambwa bakati, “Ino ooyu mukuyu wafwambaana buti kuyuma?” 21Jesu wakabaingula kuti, “Ncobeni, ndamwaambila kuti naa kamusyoma akutadonaika, tamukooyoocita buyo eeci cacitika kumukuyu ooyu, pele kuti naa mwaamba kuti kucilundu eeci, ‘Zyuka aawa uliwaale mulwizi,’ ciyoocitika. 22Kufumbwa ncomuyookumbila mukukomba muyoocitambula, kuti naa kamujisi lusyomo.”

Zyabulelo bwa Jesu

(Maako 11.27-33; Luka 20.1-8)

23Lino Jesu naakanjila muŋanda ya Leza, bapaizi basilutwe abapati bacisi bakasika kaiisya akuti kulinguwe, “Ino bulelo mbocitya zyoonse eezi wakabujana kuli? Twaambile nguni wakakupa?” 24Jesu wakaingula kuti, “Ambebo ndamubuzya mubuzyo. Kuti naa mundiingule nkokuti ambebo ndamwaambila kuti oobu bulelo mbwecitya zintu eezi buzwa kulini. 25Nguni wakatuma Joni kubbapatizya. Ngu Leza naa mbantu?” Eelyo bakakazyanya mulicabo bakati, “Kuti naa twaambe kuti, ‘Ngu Leza,’ ulaamba kuti, ‘Ino kayi nkaambo nzi ncimwatakamusyoma?’ 26Pele kuti naa twaambe kuti ‘Mbantu,’ tulayoowa, nkaambo bantu boonse balizi kuti Joni musinsimi.” 27Aboobo bakavuwa Jesu kuti, “Tatuzi pe.” Mpawo wakati kulimbabo, “Ambebo nsikoomwaambila naa ninguzu nzi nzecitya zintu eezi.

Cikozyanyo cabana bobilo

28“Ino muyeeya buti? Muntu umwi wakajisi bana balombe bobilo, wakainka kumutaanzi waakuti, ‘Mwanaangu, koya ukabeleke mumuunda wamisaansa sunu.’ 29Mwana wakaingula kuti, ‘Nsiyandi pe.’ Pele kuzwa waawo wakeempa akuunka. 30Wisi wakainka kuli wabili wakwaamba mbubonya. Ooyo wakaingula kuti, ‘Ndainka bataata,’ pele taakwe naakainka. 31Ino nguuli akati kabo bobilo wakacita mbwayanda wisi?” Bakati, “Mutaanzi.” Jesu wakati kulimbabo, “Ncobeni ndamwaambila kuti, basimitelo abavuule balamusaangunina kunjila mubwami bwa Leza. 32Nkaambo Joni wakatondezya nzila yabululami, pele taakwe nimwakamusyoma. Pele basimitelo abavuule bakamusyoma, nywebo nimwakabona oobo taakwe nimwakeempa akumuzuminina.

Cikozyanyo cabasimilimo bamumuunda wamisaansa

(Maako 12.1-12; Luka 20.9-19)

33“Amuswiilile cikozyanyo acimwi. Kwakali muntu umwi mwini muunda. Muntu ooyu wakalima muunda wamisaansa. Wakuuyakila lubaya akusya dindi pati lyakutyankila nsaansa wayaka ngazi. Amane muunda ooyo wakuupa kubalimi, walo wakaya kucisi cimbi. 34Lino ciindi cakutebula micelo nicakaswena, wakatuma babelesi bakwe kubalimi kuti bakalete micelo. 35Pele balimi bakajata babelesi bakwe, umwi bakamuuma, umwi bakamujaya, umwi bakamuuma mabwe. 36Alimwi wakatuma bamwi babelesi, bakali banji kwiinda bataanzi, abalo bakabacita mbubonya buyo. 37Kuzwa waawo wakabatumina mwanaakwe wati, ‘Ambweni bayoomulemeka mwanaangu.’ 38Pele balimi nibakabona mwana ooyo bakavwiya kuti, ‘Ooyu ngosimulya zina. Amuboole, tumujaye tutole cikono cakwe.’ 39Mpawo bakamujaya, akumusowela kunze aamuunda wamisaansa bamujaya. 40Nkaako ino mukamwini muunda wamisaansa aakuboola, uyoobacita buti balimi aabo?” 41Bakati kulinguwe, “Uyoojaya aabo babi alufu luusisya, akupa muunda ooyo kubalimi bambi. Aabo bazoomupa micelo muziindi zyeelede.”

42Lino Jesu wakati kulimbabo, “Sena tiimwakabala mu Malembe kuti:

‘Bbwe ndibakakaka bayaki ndelyakaba bbwe liyandisi lyacooko.

Mwami nguwakacita eezi,

nkaako zilagambya kapati.’

43“Lino ndamwaambila kuti muyoonyangwa bwami bwa Leza. Buyoopegwa kumusyobo uumbi uuyoozyala micelo iielede. 44Nkabela ooyo uuwida abbwe eelyo uyootyokooka, pele kufumbwa ngoliyoolokela ooyo liyoomupwasyaula.”

45Bapaizi basilutwe a Bafalisi nibakamvwa zikozyanyo zyakaambwa, nkaambo bakaziba kuti wakali kusendekezya mbabo mucikozyanyo eeci. 46Bakali kuyanda kuti bamujate. Pele bakayoowa bantu, nkaambo banji bakali kuzumina kuti musinsimi.

Currently Selected:

Mateyo 21: Tonga96

Highlight

Copy