Mateyo 22

Cikozyanyo capobwe lyabwiinga

(Luka 14.15-24)

1Jesu wakabaambila acimwi cikozyanyo wakati, 2“Bwami bwakujulu bulikozyenye amwami umwi wakacitila mwanaakwe pobwe lyabwiinga. 3Wakatuma babelesi bakwe kuyooita baabo bakatambidwe kupobwe, pele bakaka kuboola. 4Alimwi wakatuma babelesi bambi wati, ‘Amukaambile aabo batambidwe kuti, zyakulya ndabamba. Basune bangu aboombe baneneede bajaigwa kale, ono zyoonse zilibambidwe. Amuboole kupobwe.’ 5Pele balo bakanyansya buyo. Umwi wakaya kumyuunda yakwe umwi wakaya kukusambala. 6Aabo bakasyaala bakajata babelesi bakwe babapenzya akubajaya. 7Lino mwami wakanyema kapati, mpawo wakatuma basilumamba bakwe kuyoobanyonyoona bajayi aabo akutenta munzi wabo. 8Mpoonya wakati kubabelesi bakwe. ‘Pobwe lyabambwa kale, pele aabo batambidwe tabeelede. 9Nkaambo kaako kamuya kumaandanino aamigwagwa, mukatambe kufumbwa mbomuyoojana!’ 10Babelesi aabo bakainka mumigwagwa akuyoobunganya kufumbwa mbobakajana, nibaba balomene abatalomene. Aboobo ŋanda yabwiinga yakazula beenzu mpamu.

11“Mwami naakanjila kulanga beenzu, wakabona mwaalumi umwi watakasamide cibaki cabwiinga. 12Mpawo wakati kulinguwe, ‘Mweenzuma, ino wanjila buti muno kotasamide cibaki cabwiinga?’ Walo wakaumuna buyo. 13Mpawo mwami wakati kubabelesi bakwe, ‘Amumwaange kumaboko akumaulu, mumusowele kunze mumudima. Kwalo ooko bantu nkobayoolila akuluma ntwino mukuusa!’ 14Nkaambo baitidwe mbanji pele basalidwe mbace.”

Makani aamutelo

(Maako 12.13-17; Luka 20.20-26)

15Lino Bafalisi bakainka akulivwiya kuti bamujate mukwaamba kwakwe. 16Bakamutumina basikwiiya babo a Bahelodi, bakati, “O Mwiiyi, tulizi kuti ulaamba ziluleme akwiisya nzila ya Leza mubwini. Tulizi kuti toyoowi muntu naba ni, nkaambo tolangi ciwa cabantu. 17Lino twaambile mboyeeya yebo. Sena kuleelede kutela mitelo ku Muleli Mupati waku Loma naa pe?” 18Jesu wakaziba luuni lwabo, eelyo wakati, “Ino nkaambo nzi nimundisunka, nywebo nobasikuupaupa ameso? 19Amunditondezye mali aamutelo.” Nkabela bakamuletela di lyomwe. 20Mpawo Jesu wakati kulimbabo, “Ino mutwe ooyu nguwani, azina lilembedwe mpawo ndilyani?” 21Bakati, “Nzya Muleli Mupati waku Loma.” Mpoonya wakati kulimbabo, “Nkaako amupe Muleli Mupati waku Loma zintu zyakwe, alimwi amupe Leza zintu zya Leza.” 22Bamvwe boobo, bakagambwa kapati, nkabela bakamusiya, bainka.

Makani aabubuke bwabafu

(Maako 12.18-27; Luka 20.27-40)

23Mubuzuba oobo mbubonya kwakamusikila Basaduki bamwi, mbambabo aabo baamba kuti bantu tabakooyoobuka kuzwa kubafu. 24Bakaamba kuti, “Mwiiyi, Mozesi wakati, ‘Kuti naa muntu wafwa katajisi bana, munyina uleelede kukwata mukamufu kutegwa amuzyalile bana mufu.’ 25Lino kwakali babunyina bali ciloba mulindiswe. Mupati wakakwata akufwa katajisi bana, wakasiya mukaintu wakwe kumunyina. 26Aboobo awabili, awatatu, boonse bakacita oobo, mane kusikila kuli waciloba. 27Nibakamaninina boonse awalo mukaintu wakafwa. 28Ino mububuke bwabafu, nguni uyooba mulumaakwe muli boonse aabo bali ciloba? Nkaambo boonse bakali mukwete.” 29Pele Jesu wakabaingula kuti, “Mulisweekede, nkaambo tamuzi Malembe noziba nguzu zya Leza. 30Nkaambo kububuke bwabafu tabakwati nikuba kukwatwa, pele bali mbuli bangelo ba Leza. 31Kwaamba zyabubuke bwabafu, sena tiimwakabala eezyo Leza nzyaakamwaambila naakati, 32‘Ndime Leza wa Abulahamu a Izaka, a Jakobo?’ Ngu Leza wabaumi, tali wabafu pe.” 33Bantu banji bakaliko nibakamvwa boobo, bakagambwa kapati akaambo kakwiisya kwakwe.

Mulawo mupati

(Maako 12.28-34; Luka 10.25-28)

34Ciindi Bafalisi nibakabona kuti wabaumuzya Basaduki bakapangana. 35Nkabela umwi wabo wakamubuzya mubuzyo wakumusunka 36wakati, “O Mwiiyi, ino nguuli mulawo mupati mu Milawo ya Leza?” 37Mpawo wakati kulinguwe, “Uleelede kuyanda Mwami Leza wako amoyo wako woonse, amuuya wako woonse, amiyeeyo yako yoonse. 38Ooyu ngomulawo mupati alimwi ngomutaanzi. 39Awabili uli mbubonya mbuli nguwo. Yanda mweenzinyoko mbubonya mbuli mboliyanda omwini. 40Amilawo eeyi yobilo mpaali milawo yoonse ya Mozesi anjiisyo zyoonse zyabasinsimi.”

Zya Munanike wa Leza

(Maako 12.35-37; Luka 20.41-44)

41Lino Bafalisi kabacibungene, Jesu wakababuzya 42wati, “Ino muyeeya buti zya Munanike wa Leza? Ngwalunyungu lwani?” Bakamwiingula kuti, “Lwa Devedi.” 43Mpoonya wakati kulimbabo, “Nkaambo nzi Devedi, naakanjidwe Muuya wa Leza, wakamwaamba kuti Mwami. Wakati,

44‘Mwami Leza wakati ku Mwami wangu,

kkala kubbazu lyalulyo lwangu,

kusikila nkabikke basinkondonyoko kuti babe kunsi aamatende aako.’

45Kuti naa Devedi kamwiita kuti ‘Mwami’ ino kayi ulaba buti mwanaakwe?” 46Taakwe muntu naba omwe wakakonzya kumwiingula noliba jwi lyomwe. Lino kuzwa buzuba oobo taakwe muntu naba omwe wakacili kumusunka.

Currently Selected:

Mateyo 22: Tonga96

Highlight

Copy