Mateyo 16

Zyakwiisya kwakubeja kwa Bafalisi

(Maako 8.11-13; Luka 12.54-56)

1Bafalisi a Basaduki bakasika kuli Jesu kuti bamusunke. Bakamukumbila kuti abatondezye citondezyo cibonya kuti Leza nguwakamutuma. 2Wakabaingula kuti, “Ciindi cakumangolezya mulati, ‘Bulaca kabotu nkaambo kujulu kulasalala.’ 3Nkabela cifumo-fumo mulati, ‘Sunu bwaca bubi nkaambo kujulu kuli cikumbi cisiya mbi.’ Mulizi mbokupandululwa julu mbolilibonya, pele tamukonzyi kupandulula zitondezyo zyasunu. 4Basizibi basunu batasyomeki kuli Leza balayanda citondezyo, pele taakwe nobatitondezegwe ccita ambweni cakacitika kuli Jona musinsimi.” Aboobo wakabasiya wainka.

Mimena ya Bafalisi a Basaduki

(Maako 8.14-21)

5Ciindi basikwiiya nibakalandukila kubbazu limwi, bakaluba kubweza zinkwa. 6Jesu wakati kulimbabo, “Ncobeni amucenjele amimena ya Bafalisi a Basaduki.” 7Lino bakaambilana bakati, “Nkaambo taakwe nitwabwezelezya cinkwa.” 8Pele Jesu naakaciziba eeci wakati, “Nywebo nobantu basilusyomo luniini! Nkaambo nzi ncomuti akaambo kakuti taakwe nimwabwezelezya zinkwa? 9Sena ambuli sunu tamumvwisyi? Sena tamuyeeyi kuti kuzwa muzinkwa zyosanwe ndakasanina bantu bali zyuulu zyosanwe alimwi akuti bakazuzya zisuwo zinji zyabufwefwelenga? 10Ino kuzwa kuzinkwa zili ciloba tee ndakasanina bantu bali zyuulu zyone? Kwamana nywebo ino mwakazuzya zisuwo zyongaye zyabufwefwelenga? 11Ino nkaambo nzi ncimwataziba kuti taakwe nindaamba zinkwa? Lino amucenjele amimena ya Bafalisi a Basaduki.” 12Mpoonya bakamvwa kuti taili mimena njaakabaambila kuti baicenjelele, pele bacenjele kukwiisya kwa Bafalisi a Basaduki.

Jesu ngo Munanike wa Leza

(Maako 8.27-30; Luka 9.18-21)

13Lino Jesu naakasika mucisi ca Sizaliya Filipi, wakabuzya basikwiiya bakwe kuti, “Ino bantu mebo nde Mwanaa Muntu bandaamba kuti ndime ni?” 14Mpawo bakati, “Bamwi balaamba kuti nduwe Joni Mubbapatizi. Bamwi balaamba kuti nduwe Elija. Bamwi balaamba kuti nduwe Jelemiya naa umwi wabasinsimi.” 15Mpoonya Jesu wakati kulimbabo, “Ino nywebo mundaamba kuti ndime ni?” 16Saimoni Pita wakaingula kuti, “Nduwe Munanike, Mwanaa Leza Uupona.” 17Jesu wakaingula kuti, “Ulilelekedwe yebo Saimoni mwanaa Jona! Nkaambo teensi muntu wakuyubunwida eeci pe, pele ngu Taata uuli kujulu. 18Lino ndakwaambila kuti nduwe Pita, aboobo atala amwaala ooyu mpenzooyakila mbungano yangu, nkabela nguzu zyalufu tazikooyooizunda. 19Njookupa makkii aabwami bwakujulu, kufumbwa ncomutikaange ansi aano akuluju ciyooangwa, alimwi kufumbwa eeco ncemutikaangunune ansi aano akujulu ciyooangununwa.” 20Mpawo Jesu wakalaililisya basikwiiya bakwe kuti bataambili muntu naba omwe kuti ngo Munanike wa Leza.

Jesu mbwaakaambilizya zyakupenga azyalufu lwakwe

(Maako 8.31—9.1; Luka 9.22-27)

21Kuzwa ciindi eeco Jesu wakatalika kwaambila basikwiiya bakwe kuti uleelede kuunka ku Jelusalemu akupenga zintu zinji kuzwa kubapati babantu, akubapaizi basilutwe abamayi ba Mulawo. Bayoomujaya, pele mubuzuba bwatatu uyoobusigwa. 22Amvwe boobo Pita wakamutola kumbali akutalika kumukalalila wakati, “Peepe, O Mwami! Eeci citakakucitikili!” 23Jesu wakacebuka akuti kuli Pita, “Kozwa aawa Saatani. Uli cilebyo kuli ndime, nkaambo toyeeyi miyeeyo ya Leza, pele yabantu.”

24Mpoonya Jesu wakaambila basikwiiya bakwe kuti, “Kuti naa muntu kayanda kunditobela aliimye abweze ciingano cakwe eelyo anditobele. 25Nkaambo kufumbwa uuyandisya buumi bwakwe uyoobusweekelwa, nkabela ooyo uusweekelwa buumi bwakwe akaambo kandime uyoobujana. 26Nkaambo nimpindu nzi njajana muntu, kuti naa wavuba nyika yoonse kwamana wasweekelwa buumi bwakwe? Naa ncinzi muntu ncakonzya kupa kuti anunuzye buumi bwakwe? 27Nkaambo Mwanaa Muntu uyoosika abangelo bakwe mubulemu bwa Wisi, eelyo uyoobweedezezya muntu omwe-omwe ceelede milimo yakwe njacita. 28Ncobeni ndamwaambila kuti, mpobali bamwi aano batakooyoofwa kabatanabona Mwanaa Muntu kaboola mubwami bwakwe.”

Currently Selected:

Mateyo 16: Tonga96

Highlight

Copy