Baefeso 1

1Ndime Paulu mutumwa wa Kilisito Jesu wakasalwa mukuyanda kwa Leza. Ndamujuzya nobasalali bali ku Efesusi basyoma Kilisito Jesu.

2Leza Taata a Mwami Jesu Kilisito amubede aaluse akumupa luumuno.

Zileleko zyamuuya muli Kilisito

3Aalumbwe Leza Wisi wa Mwami wesu Jesu Kilisito. Muli Kilisito wakatupa zileleko zyoonse zyamuuya zyaamba zyakujulu. 4Leza katanalenga nyika, wakatusala muli Kilisito kuti tusalale akubula kampenda kulinguwe. 5Mukuti wakatuyanda kapati, wakatusala kuti tube bana bakwe muli Jesu Kilisito mbubonya mbuli mbwaakakanza. 6Wakayanda kuti tumulemeke nkaambo wakatubeda aaluse lupati mukutupa buyo Mwanaakwe ngwayandisisya.

7Leza wakatunununa nkaambo kabulowa bwa Mwanaakwe, alimwi wakalekelela zibi zyesu, muluse lwakwe lunji 8ndwaakatutondezya. 9Muluzibo abusongo bwakwe Leza wakatuyubunwida makanze aakwe aakasisidwe ngaakakanzide kucita muli Kilisito. 10Eeco Leza ncaakayanda kuti acite muciindi ceelede ncakuti aswaanganye muli Kilisito zintu zyoonse zyakujulu azyaansi.

11Zintu zyoonse zilacitika mbubuli mukuyanda kwa Leza alimwi mbuli mbwaakakanza. Walo wakatusala muli Kilisito kuti tube bantu bakwe bamugeme. 12Wakayanda kuti swebo nitwakasaanguna kulangila Kilisito, tulumbaizye bulemu bwa Leza.

13Anywebo mwakamvwa Majwi aa Leza aakasimpe, aali Makani Mabotu aamupa lufutuko, alimwi mwakasyoma Kilisito. Leza wakatondezya kuti muli bantu bakwe mwini naakamupa Muuya Uusalala ngwaakasyomezya. 14Muuya Uusalala ndolusinizyo lwakuti tuyootambula zileleko zyoonse Leza nzyaakatusyomezya. Leza wakacita oobo kuti tulumbaizye bulemu bwakwe.

Kukomba kwa Paulu

15Nkaambo kazeezi ndakamvwa zyalusyomo lwanu mu Mwami Jesu aluyando lwanu ndomujisi kubasyominyoko, 16nsileki kulumba Leza nkaambo kanu. Ndilamuyeeya lyoonse mukukomba kwangu. 17Ndakomba kuti Leza wa Mwami wesu Jesu Kilisito, Taata wabulemu, amupe Muuya uupa busongo buyubununa Leza kulindinywe kuti mumuzibe. 18Ndakomba kuti Muuya Uusalala umunike mumyoyo yanu kuti muzibe eezyo Leza nzyaakamwiitila alimwi muzibe zileleko zipati Leza nzyaakasyomezya kupa bantu bakwe. 19Alimwi muzibe nguzu zyakwe zipati zibeleka mulindiswe notusyoma. Nguzu eezi nzenzizyo eziya ziyumu kapati, 20Leza nzyaakabelesya naakabusya Kilisito kuzwa kubafu akumubikka kubbazu lyalulyo lwakwe munyika yakujulu. 21Wakamubikka atala aboonse beendelezi, bapati, basinguzu, abami, aatala aamazina oonse bantu ngobabanda, kutaamba buyo ciindi ecino, pele akuciindi ciciza. 22Leza wakabikka zintu zyoonse kunsi lyakwe, alimwi wakamucitya kuti abe silutwe wazintu zyoonse mumbungano. 23Mbungano ngomubili wakwe, mbobuzulile bwayooyo uuzulila zintu zyoonse cakumaninina.

Currently Selected:

Baefeso 1: Tonga96

Highlight

Copy