Baefeso 2

Bakafwide bakaba aabuumi

1Kusaanguna nywebo mwakalifwide nkaambo kansotoko azinyonyoono zyanu. 2Ciindi eeco bweende bwanu bwakalikozyenye abwabantunsi. Mwakali kutobela mweendelezi wabwami bwaluuwo, uuli muuya mubi uubeleka mubantu bataswiilili Leza. 3Mbubonya aswebo mbotwakabede, alimwi twakali kutobela zisusi zyabuumi bwabuntunsi. Twakali kucita ziyanda mibili amizeezo yesu. Aboobo mubuzyalwe bwesu twakeelede bukali bwa Leza mbubuli bamwi boonse.

4Pele Leza wakajisi lweengelelo lunji, alimwi wakatuyanda kapati kwiindilila. 5Nikuba kuti twakalifwide akaambo kazibi zyesu, wakatupa buumi antoomwe a Kilisito. Mwakafutulwa aluse lupati lwa Leza. 6Mukuti tuli muli Kilisito Jesu, Leza wakatubusya kuzwa kubafu antoomwe anguwe, eelyo wakatupa busena bwabulemu mujulu. 7Wakacita oobo kuti atondezye luse lwakwe lunji alweengelelo kulindiswe kwiindila muli Kilisito Jesu. 8Mwakafutulwa aluse lwa Leza mukusyoma. Tiimwakafutulwa nkaambo kazeezyo nzimwakacita pe. Pele ncipego ca Leza, 9kutali camilimo yanu, aboobo muntu atalikankaizyi pe. 10Leza nguwakatulenga. Twakalengwa muli Kilisito Jesu kuti tubeleke milimo mibotu, eeyo Leza njaakatubambila kale-kale kuti twiicite.

Tuli omwe muli Kilisito

11Nywebo nomutali Bajuda amuyeeye mbomwakabede kale. Bajuda balalisumpula nkaambo balipalwidwe, (cakali kucitwa mumibili yabo) alimwi bamwiita kuti batapalwidwe. 12Lino amuyeeye kuti ciindi eeco mwakanyina Kilisito. Mwakali bamasi batakasalidwe a Leza. Mwakanyina caabilo muli zeezyo Leza nzyaakazuminana akusyomezya kubantu bakwe. Mwakali kukkala munyika kamunyina lulangilo, kamunyina Leza. 13Pele lino muli Kilisito Jesu, nywebo nimwakali kulaale a Leza, mwaba aafwiifwi nkaambo kalufu lwa Kilisito. 14Kilisito nguutupa luumuno, nguwakacita kuti to Bajuda abamasi tube ciinga comwe. Naakalyaaba wakamwaya bwaanda bwakuzondana akati kesu. 15Walo wakamanizya Mulawo amalailile aawo, kuti kuzwa kumisyobo yobilo apange ciinga comwe cipya mulinguwe kuti mukucita boobo alete luumuno. 16Kilisito wakafwa aciingano kuti amanizye kuzondana akubikka antoomwe misyobo yobilo kuti ibe mubili omwe. Eelyo wakayanzanya misyobo eeyo a Leza. 17Aboobo Kilisito wakaboola akukambauka Makani Mabotu aaluumuno kulindinywe nobamasi, nimwakali kulaale a Leza, aku Bajuda bakali aafwiifwi anguwe. 18Nkaambo muli Kilisito swebo toonse, to Bajuda alimwi abamasi, nitwakatambula Muuya omwe, tulakonzya kusika kuli Taata.

19Nkaambo kaako nywebo nobamasi tamucili beenzu naa beenda buyo pe, pele muli banyinzinyina abantu ba Leza alimwi muli bamukwasyi wa Leza. 20Muliyakidwe antalisyo yakabikkwa abatumwa abasinsimi nkabela Kilisito Jesu ndebbwe lyacooko cayo. 21Mulinguwe ŋanda yoonse ilibangidwe kabotu-kabotu akuya bukomena kuba ŋanda iisalala ya Mwami Leza. 22Mulinguwe anywebo mulayakwa antoomwe kuti mube cikkalilo ca Leza kwiindila mu Muuya wakwe.

Currently Selected:

Baefeso 2: Tonga96

Highlight

Copy