Bagalatiya 6

Amugwasyanye mukunyamuna zimulemena

1Nobakwesu, kuti umwi wanu wawa mucibi nociba cili buti, nywebo nomusolwedwa a Muuya Uusalala muleelede kumuboozya, alimwi amucite oobo amyoyo iibombede. Pele amucenjele kuti anywebo mutasunkwi azibi. 2Amugwasyanye mukunyamuna zimulemena. Mwacita boobo, mwatobela mulawo wa Kilisito. 3Kuti muntu walikankaizya, kwamana kakunyina ambwabede, ulalicenga mwini. 4Kufumbwa buna muntu ayeeye milimo yakwe mbwiibede. Naa mmibotu, ulakonzya kulisumpula nkaambo kamilimo yakwe eeyo, kutabi kweelezyanya amilimo yaumwi pe. 5Nkaambo muntu umwi aumwi uleelede kunyamuna mukuli wakwe mwini.

6Ooyo wiisigwa Majwi aa Leza uleelede kwaabana zintu zibotu zyoonse ayooyo uumwiisya.

7Mutacengwi, muntu takonzyi kufubaazya Leza. Eezyo muntu nzyasyanga nzenzizyo nzyayootebula. 8Kuti naa muntu wasyanga zyabuntunsi uyootebula lufu lutamani, pele ooyo uusyanga kweendelana aziyanda Muuya uyootebula buumi butamani. 9Tutaleki kucita zibotu, nkaambo muciindi ceelede tuyootebula naa tatutyompwi. 10Twajana ciindi ceelede atucitile bantu boonse zintu zibotu, kapati aabo baciinga calusyomo.

Majwi aamamanino

11Mubone, ono ndilamulembela ajanza lyangu mabala mapati-pati. 12Aboobo aabo bayanda kulibotya kubantu mbabamusinikizya kuti mupalulwe. Ncobayanda ncimwi buyo, nkuti batapenzegwi akaambo kaciingano ca Kilisito.

13Aabo balilila kuti mupalulwe, tababambi Mulawo. Bayanda buyo kuti nywebo mupalulwe mukuti balisumpule akaambo kakupalulwa kwanu. 14Pele mebo nsikonzyi kulisumpula mucintu niciba buti, ccita buyo mumulumbe waamba zyalufu lwa Mwami Jesu Kilisito aciingano. Nkaambo Kilisito wakafwa aciingano, zyabuntunsi kulindime zilifwide, alimwi kulinzizyo ndifwide. 15Nkaambo kupalulwa naa kutapalulwa taakwe ncocaamba, pele cipati ncakuti muntu abe mulenge mupya. 16Leza ape luumuno akubeengelela bantu boonse batobela njiisyo eeyi, mbabantu ba Leza, Baisilayeli mpya.

17Kuzwa sunu kutabi muntu uundikatazya, nkaambo amubili wangu ndijisi mbata zitondezya kuti ndi mubelesi wa Jesu.

18Luse lwa Mwami wesu Jesu Kilisito lube kulindinywe nobakwesu. Akube boobo.

Currently Selected:

Bagalatiya 6: Tonga96

Highlight

Copy