Milimo 5

Zya Ananiyasi a Safila

1Aumwi muntu uutegwa Ananiyasi, amukaintu wakwe Safila, awalo wakauzya lubono lumwi ndwaakajisi. 2Cakupangana amukaintu wakwe, wakasiya mali amwi aalubono akutola amwi kubatumwa. 3Pele naakasika kubatumwa, Pita wakamwaambila kuti, “Ananiyasi, nkaambo nzi ncoozumizya Saatani kuti aendelezye moyo wako boobu, akukucita kuti ubejele Muuya Uusalala nookasisa cipaanzi cimwi camali ngookajana nookauzya lubono lwako? 4Tee kotanaluuzya lubono oolo, lwakali lwako anookaluuzya lwakacili lwako, mali oonse akali aako. Ino kayi wakayeeyela buti mumoyo wako kucita cintu cili boobu? Lino toobejela bantu pe, wabejela Leza!” 5Ananiyasi naakamvwa majwi aaya wakafwa cakwaanzuka. Lino boonse bakamvwa cakacitika, bakayoowa kapati. 6Mpoonya kwakasika bakubusi baputaila mutumba wakwe baakuuzikka.

7Nikwakainda ciindi cili mbocibede, mukaintu wa sikwaazwa Ananiyasi wakasika akunjila mwakali oomo batumwa. Ciindi eeci taakazi cakacitide. 8Pita wakati kulinguwe, “Ndaambile baama, sena ooyu ngomweelwe wamali oonse ngomwakajana nimwakauzya lubono lwanu amulumaako?”

Wakaingula kuti, “Iiyi ngonguwo.”

9Mpoonya Pita wakamwaambila kuti, “Ino nkaambo nzi yebo amulumaako nimwakayeeya kuti musunke Muuya wa Mwami? Bona, bantu bainkide kukuzikka mulumaako mbaaba amulyango, lino balakubweza akukutola ayebo mbubonya!” 10Mpoonya aawo mukaintu ooyo wakawida kumaulu aa Pita akufwa. Eelyo bakubusi aabo bakanjila akujana kuti mukaintu awalo ulifwide. Bakamubweza akuyoomuzikka kumbali amulumaakwe. 11Aboobo mbungano yoonse abamwi bantu buyo bakamvwa makani aaya bakayoowa kapati.

Maleele azitondezyo zigambya

12Nzitondezyo zyanguzu azigambya zinji zyakali kucitwa abatumwa akati kabantu. Basyomi boonse bakali kubungana antoomwe mukkota lyakali kwiitwa kuti Solomoni. 13Kunyina uumbi wakasoleka kubasangana watakali musyomi, abalo bantu bamwi bakali kubatembaula.

14Nkabela bantu banji-banji baalumi abakaintu abalo bakali kuyungizigwa ku Mwami. 15Akaambo kaako bantu bakali kuleta balwazi banji akubalazika amalo mumbali lyamigwagwa, kutegwa Pita ainda cinziinzimwa cakwe cibagume kuti baponyezegwe. 16Nkabela bantu banji-banji bakasika kuzwa muminzi iizingulukide Jelusalemu. Bakaleta balwazi babo abaabo bakanjidwe myuuya mibi, eelyo boonse bakaponyezegwa.

Batumwa mbubakapenzegwa

17Lino mupaizi mupati abeenzinyina bakali bankamu ya Basaduki bakaba abbivwe. 18Bakajata batumwa akubabikka muntolongo yabuleya boonse. 19Pele ciindi camasiku kwakasika mungelo wa Leza wakazoojalula milyango yantolongo, wakabagwisya batumwa akubaambila kuti, 20“Kamuya muŋanda ya Leza, mukaambile bantu zintu zyoonse zyabuumi oobu bupya.” 21Batumwa bakaswiilila malailile aaya, kubucedo bakanjila muŋanda ya Leza akutalika kwiisya.

Ciindi mupaizi mupati abeenzinyina nibakasika, bakaita balupati-pati ba Bajuda kumuswaangano mupati. Nibakazulila bakatumya malailile aakuti batumwa baletwe kunkuta kuzwa kuntolongo. 22Aabo bakatumwa nibakaakusika bakaakujana kuti batumwa tabamo pe. Bakabweeda kunkuta akuyooamba kuti, 23“Nitwasika kuntolongo twajana kuti milyango yoonse ilijalidwe akukkiigwa kabotu, alimwi twajana abalindizi mbaaba balindila milyango. Pele nitwajalula milyango, twajana mukati taakwe amuntu pe!” 24Lino mupati wabalindizi baŋanda ya Leza antoomwe abapaizi basilutwe nibakamvwa boobo bakagambwa kuti naa ninzi cacitika kubatumwa. 25Mpoonya kwakasika umwi muntu wakabaambila kuti, “Amuswiilile! Baya baalumi mbomwakabikkide muntolongo bali muŋanda ya Leza, baiisya bantu!” 26Nkaako mupati wabalindizi muŋanda ya Leza wakainka abantu bakwe kuyooleta batumwa. Pele tiibakabasungilizya, mukuti bakali kuyoowa kuti bantu balabauma mabwe.

27Bakaleta batumwa kunkuta. Eelyo mupaizi mupati wakababuzya wati, 28“Nywebo twakamukasya akumupa mulawo wakuti tamweelede kunooiisya muzina lyamuntu ooyu. Pele amubone ncomwacita! Mwadumya kwiisya kwanu mu Jelusalemu yoonse. Muyanda kuleta lufu lwamuntu ooyu amitwe yesu!” 29Mpawo Pita abatumwa bamwi bakaingula kuti, “Tweelede kuswiilila Leza kwiinda bantu. 30Leza wamatata wakabusya Jesu kuzwa kubafu, ooyo ngomwakajaya nimwakamukankamina aciingano. 31Pele Leza wakamusumpula akumukkazika kululyo lwakwe. Wakamucita kuti abe Musololi a Mufutuli, kuti bantu ba Isilayeli beempe akutambula kulekelelwa kwamilandu yabo. 32Tuli bakamboni bazintu eezi, swebo a Muuya Uusalala uuli ncecipego ncapa Leza kuli baabo bamuswiilila.”

33Basinkuta nibakamvwa makani aaya, bakanyema kapati, cakuti bakayanda kubajaya. 34Pele umwi wabo Mufalisi uutegwa Gamaliyeli, mwiiyi wa Mulawo, wakali muntu uulemekwa kapati abantu boonse, wakaima munkuta, walailila kuti batumwa batolwe anze. 35Mpoonya wakaambila basinkutanyina kuti, “No Baisilayelima, amucenjele kuli ceeco ncomuyanda kucita kubantu aaba. 36Mulayeeya kuti kwakali muntu umwi wakali kutegwa Tiyudasi. Ooyu wakali kulikankaizya kuti mmuntu mupati, mane bantu bali myaanda yone bakatalika kumutobela. Pele wakajaigwa, eelyo batobeli bakwe boonse bakamwaika amilimo yakwe yakamana. 37Musule aakooku kwakaza Judasi, Mugalilii. Ooyu wakasika ciindi lyakali kubalwa bantu mucisi. Awalo mbubonya, wakakwela bantu banji kuti bamutobele. Pele awalo wakajaigwa, batobeli bakwe bakamwaika. 38Lino mumakani aaya ngotujisi sunu, ndamwaambila kuti mutabi nimucita cintu kubantu aaba, amubaleke buyo. Nkaambo naa kuti mulimo wabo ooyu wakacitwa abantu, mulabona kuti tuutizwidilile. 39Pele naa kuti kuuzwa kuli Leza, tamukookonzya kubazunda pe, nkaambo mulajana kuti mulwana Leza!”

Mpoonya basinkuta boonse bakatobela kulailila kwa Gamaliyeli. 40Eelyo bakabaita batumwa kuti banjile mukati, nkabela bakabakwabbaula akubalailila alimwi kuti tabaceelede kwiisya muzina lya Jesu, mpoonya bakabaleka. 41Batumwa bakazwa munkuta kababoteledwe kapati nkaambo bakalimvwa kuti Leza wakabasala kuti bapenzegwe akaambo kazina lya Jesu. 42Buzuba abuzuba bakali kwiisya akukambauka Mulumbe Mubotu muŋanda ya Leza amumaanda aabantu, kabati Jesu ngo Munanike wa Leza.

Currently Selected:

Milimo 5: Tonga96

Highlight

Copy