Milimo 4

Pita a Joni mbobakabetekwa a Nkuta ya Bajuda

1Ciindi Pita a Joni kabacikanana abantu kwakasika bapaizi, mupati wabalindizi bamuŋanda ya Leza, a Basaduki. 2Aaba bantu bakanyema nkaambo Pita a Joni bakali kwiisya bantu kuti Jesu wakabuka kuzwa kubafu, nkankakaako bafu ncoobayoobuka. 3Lino bakabajata, lino mukuti zuba lyakalibbilide kale bakababikka muntolongo mane kusikila nibwakaca. 4Pele bantu banji bakaswiilila kukambauka kwa Pita a Joni akuzumina. Lino mweelwe wabaalumi basyomi wakatisike kuzyuulu zyosanwe.

5Nibwakaca basololi ba Bajuda, bapati bacisi, abamayi ba Mulawo bakabungana mu Jelusalemu. 6Bakabungana bakali ba Anasi mupaizi mupati, Kayafa, Joni, a Alekizandaa, abamwi bakali bamukwasyi wamupaizi mupati. 7Bakaimika batumwa aabo kumbele lyabo, bakatalika kubabuzya kuti, “Ino mwakaucita buti mulimo ooyu? Ninguzu nzi, naa ndizina lyani ndimwakabelesya?”

8Eelyo Pita, kazwide Muuya Uusalala, wakabaingula kuti, “Nywebo nobasololi abapati, 9sena mutubuzya amakani aamulimo mubotu wakacitwa kumuntu ooyu mulema ambuli mbwaakaponyezegwa? 10Muleelede kuziba nywebo antoomwe abantu boonse ba Isilayeli kuti, ooyu mwaalumi uliimvwi aano kumbele lyanu kaponede nkaambo kanguzu zyazina lya Jesu Kilisito wa Nazaleta. Ooyo walo uuli ngomwakakankamina aciingano, pele Leza wakamubusya kuzwa kubafu. 11Jesu ngonguwe waambwa mu Malembe kuti,

‘Bbwe ndimwakakaka nobayaki,

ndelyakaba liyandisi lyaacooko.’

12Lino lufutuko lujanwa mulinguwe alikke, nkaambo taakwe zina limbi munyika Leza ndyaakapa kubantu kuti atufutulile mulindilyo.”

13Lino babetesi nibakabona busicamba bwa Pita a Joni bakagambwa, nkaambo bakamvwa kuti bakali bantu buyo tiibakaiide kapati pe. Mpoonya bakaziba kuti bakali basikwiiya ba Jesu. 14Taakwe anibakacili kukonzya kukazya Pita a Joni, nkaambo bakali mubwene muntu ooyo wakaponyezegwa kaimvwi aawo antoomwe ambabo. 15Bakabaambila buyo kuti bazwe munkuta oomo. Mpoonya babetesi aabo bakalivwiya. 16Bakati, “Ino tubacite buti bantu aaba? Nkaambo bantu boonse bakkala mu Jelusalemu balizi kabotu kuti maleele aaya akacitwa ambabo, nkaako tatukonzyi kwaakaka pe. 17Pele kutegwa makani aaya atamwaiki koonse-koonse, atubakonge kuti kabatacaambili muntu naba omwe zyazina lya Jesu.”

18Bamane bakabaita akubaambila kuti noliba lili batakaambi nikuba kwiisya limbi zya Jesu. 19Pele ba Pita a Joni bakabaingula kuti, “Nywebo nobeni, amusale naa cintu ciluzi kuli Leza ncicili, kuti swebo tuswiilile ndinywe naa tuswiilile nguwe. 20Swebo tatukonzyi kuleka kwaamba zintu nzitwakamvwa akulibonena tobeni.” 21Eelyo babetesi bakasinizya kwaamba kuti batakaciti oobo alimwi, mpoonya bakabaleka. Tiibakajana kaambo kakubapa cisubulo, mukuti bantu boonse bakali kulumbaizya Leza akaambo kaceeco cakacitika. 22Lino muntu ooyo wakaponyezegwa cakugambya wakalaamyaka iiinda kumakumi one.

Basyomi mbubakakomba

23Mbubakalekelwa buyo ba Pita a Joni bakabweeda kubeenzinyina, baakubaambila cakabaambila bapaizi basilutwe abapati bacisi. 24Basyomi nibakamvwa makani aayo, bakakomba kuli Leza bati, “O Mwami Leza Ookalenga julu, nyika, lwizi, azyoonse zili mulinzizyo! 25Kwiindila mu Muuya Uusalala wakaamba kuli taata Devedi mubelesi wako, naakati,

‘Nkaambo nzi bamasi ncobakalala?

Nkaambo nzi bantu ncobalivwiya akukanza zyabuyo?

26Bami baansi aano bakalibambila,

baleli bakaswaangana kuti

balwane Mwami Leza, a Munanike wakwe.’

27Ncobeni, ba Helodi a Pontiyosi Pilato bakaswaangana mumunzi uuno, antoomwe abamasi alimwi a Baisilayeli, kuti balwane Jesu mubelesi wako uusalala ooyo ngookananika. 28Bakabungana kucita eezyo yebo nzyookakanzide kale kuti uzicite kwiindila munguzu aluyando lwako. 29Lino O Mwami, kobona oobu mbobatukonga, aboobo tuzumizye tobabelesi bako, kwaamba makani aako cabusicamba. 30Kotandabika janza lyako kuti uponye bantu, alimwi upe kuti zigambya amaleele zikacitwe muzina lya Jesu mubelesi wako uusalala.”

31Lino nibakamana kukomba, busena aawo mpobakabungene bwakazungaana. Muuya Uusalala wakabanjila boonse, mpoonya bakatalika kwaamba majwi aa Leza cabusicamba.

Basyomi mbubakaabana lubono

32Nkamu yabasyomi yoonse yakali amoyo omwe amuzeezo omwe. Kwakanyina muntu wakali kwaamba kuti eeci cintu ncicangu endikke, pele umwi aumwi wakali kupa nzyajisi kuti zibe zyankamu yoonse. 33Batumwa bakapa bumboni bwakubuka kwa Mwami Jesu kuzwa kubafu anguzu mpati, alimwi Leza wakali kubaleleka boonse. 34Kwakanyina muntu mulimbabo wakali kubula cimwi cintu pe. Aabo bakajisi myuunda naaba maanda bakali kuzyuuzya akuleta mali aakajanika. 35Mali aayo akali kupegwa kubatumwa, eelyo balo bakali kwaabanya bantu, mbubuli mukubula kwaumwi aumwi.

36Lino kwakali muntu umwi, wakali kutegwa Josefa, waciinga ca Levi wakazyalilwa kucisi ca Saipulasi, batumwa ngubakaulika kuti Banabasi, (nkokuti “Sikuyumya-yumya”). 37Awalo mbubonya wakauzya muunda ngwaakajisi, akuleta mali kubatumwa.

Currently Selected:

Milimo 4: Tonga96

Highlight

Copy