Milimo 6

Kusalwa kwabagwasyi bacikombelo bali ciloba

1Lino mumazuba aayo, basyomi bakali kuya buvula. Kwakali kutamvwana akati ka Bajuda bakali kukanana Cigiliki abaabo bakali kukanana Cijuda. Bacigiliki bakali kutongooka kuti bamukabafu bakuli mbabo tiibakali kulanganyizigwa lyakali kwaabwa zyabupe zya buzuba abuzuba 2Aboobo batumwa bali kkumi ababili bakabunganya nkamu yoonse yabasyomi akuti, “Tacili cibotu kuti swebo tuleke kukambauka Majwi aa Leza tugame kulanga zyabupe. 3Nkaako nobakwesu, amusale baalumi bali ciloba bazizilwe kuti balizwide Muuya Uusalala abusongo, kuti batole mulimo ooyu. 4Pele swebo tulipe kukukomba akukambauka.”

5Lino nkamu yoonse yakabotelwa amakani aaya, eelyo bakasala Sitivini, mwaalumi wakazwide lusyomo a Muuya Uusalala, Filipo, Pulokolasi, Nikanoo, Timoni, Palamenasi, a Nikolasi waku Antiyoki, ooyo kaindi wakasandukide akutobela Cijuda katanaba musyomi. 6Lino nkamu yakabaleta baalumi aaba kubatumwa. Batumwa bakabakombela akubabikka maanza.

7Lino Majwi aa Leza akamwaika koonse-koonse, awalo mweelwe wabasyomi wakali kuya buvula akukomena mu Jelusalemu. Abalo bapaizi banji bakasyoma.

Kujatwa kwa Sitivini

8Lino Sitivini wakali aluse anguzu zya Leza. Wakali kucita maleele azitondezyo zyanguzu akati kabantu. 9Pele bamwi bantu bakamukazya, bakamukatazya bakali bankamu yacikombelo ca Bantu Baangulukide (mbocakali kwiitwa). Bakali Bajuda bazwa kuminzi ya Sailini a Alekizandaliya, alimwi kwakali bamwi bazwa kuzisi zya Silisiya a Asiya. 10Muuya wa Leza wakapa Sitivini busongo bunji cakuti bantu aabo tiibakamuzunda pe. 11Aboobo bakoongelezya bamwi bantu kuti batamikizye Sitivini kuti, “Twakamumvwa kaamba makani aakusampaula Mozesi a Leza!” 12Munzila eeyi bakanyonganya bantu, balupati-pati bacisi, abamayi ba Mulawo. Mpawo bakajata Sitivini akumutola kunkuta. 13Bakaleta bakamboni babeji bakati, “Ooyu muntu lyoonse waamba makani aasampaula ŋanda ya Leza iisalala a Milawo ya Mozesi. 14Nkaambo twakamumvwa kaamba kuti Jesu Munazaleta uyoomwaya ŋanda ya Leza akuyoosandula zilengwa nzyaakatupa Mozesi!” 15Lino boonse aabo bakakkede munkuta bakalangisisya Sitivini akubona kuti busyu bwakwe bwakozyanya abusyu bwamungelo.

Currently Selected:

Milimo 6: Tonga96

Highlight

Copy