Milimo 7

Majwi aa Sitivini

1Lino mupaizi mupati wakabuzya Sitivini kuti, “Sena eezi nzyamasimpe?”

2Sitivini wakaingula kuti, “Nobakwesu anomatata, amuswiilile! Leza wabulemu wakalibonya kuli Taata Abulahamu naakacili kukkala munyika ya Mesopotamiya, katanalongela ku Halani. 3Wakamwaambila kuti, ‘Kosiya mukwasyi wako acisi cako, uye kunyika njetikakutondezye.’ 4Mpoonya Abulahamu wakasiya cisi ca Kalodiya, wainka waakukkala ku Halani. Musule alufu lwawisi, Leza wakalonzya Abulahamu akumuleta mucisi cino ncomukkede sunu. 5Leza taakamupa kanyika nokaceya kuti kabe kakwe kamugeme. Pele wakalimusyomezezye kuti uyoopa nyika eeyi kuli nguwe alunyungu lwakwe, nikuba kuti muciindi eeco taakajisi mwana pe. 6Leza wakati kulinguwe, ‘Balunyungu lwako bayookkala mucisi cimbi ooko nkobayooba bazike akutalelwa kabotu kwamyaka iili myaanda yone.’ 7Alimwi Leza wakati, ‘Pele ndiyoobasubula bantu aabo mbobayoobelekela milimo. Kwaakumana waawo bayoozwa mucisi eeco, bayoondikomba mubusena buno.’ 8Lino Leza wakapa Abulahamu ciyanza cakupalula kuti cibe ncecitondezyo cacizuminano. Aboobo Abulahamu wakapalula Izaka naakaba aamazuba aali lusele, Izaka wakapalula Jakobo, Jakobo wakapalula bana bakwe bali kkumi ababili, bali mbabasikale besu.

9“Lino bana ba Jakobo bakafwida Josefa munyina munyono, bakamuuzya kuti akabe muzike mu Ijipiti. Pele Leza wakali aanguwe, 10wakamuvuna kuzwa mumapenzi aakwe oonse. Ciindi Josefa naakalibonya kumbele lya Falo mwami wa Ijipiti, Leza wakamupa busongo akumubotya mumeso aamwami. Aboobo Falo wakacita Josefa kuba mweendelezi wacisi cakwe awaŋanda yakwe. 11Nkabela kwakanjila nzala muzisi zya Ijipiti a Kenani, nzala eeyo yakaleta mapenzi mapati kubantu. Basikale besu tiibakali kukonzya kujana cakulya. 12Jakobo naakamvwa kuti mu Ijipiti muli kulya, wakabatuma ku Ijipiti mulweendo lwabo lutaanzi. 13Lino mulweendo lwabili, Josefa wakalizibya kubana bokwabo, amane wazibya Falo zyambabo. 14Josefa wakatumizya jwi kuli Jakobo wisi kuti aboole ku Ijipiti abana bakwe. Eeco ciindi Jakobo wakajisi bantu basika kumakumi aali ciloba abantu bosanwe. 15Nkabela Jakobo wakaya ku Ijipiti ooko nkwaakaakufwida walo abasikale besu. 16Mitumba yabo yakatolwa ku Syikemu, nkoyakaakuzikkilwa muzyuumbwe nzyaakaula Abulahamu amali kuzwa kuciinga ca Hamoo.

17“Lino ciindi nicakaswena aafwiifwi cakubamba cisyomezyo Leza ncaakapa Abulahamu, bantu besu bakavula kapati mu Ijipiti. 18Kunze akooku kwakaba mwami uumbi watakazi Josefa. 19Mwami ooyo wakacenga akubabeda aalunya bantu besu. Wakali kusungilizya bamatumbu batwana tuvwanda kuti kabatusowa kuti tufwe. 20Eeco nceciindi Mozesi ncaakazyalwa. Wakali mwana mubotu kapati, wakakkala akulelwa abanyina myezi yotatwe, 21naakagwisigwa, mwana musimbi wa Falo wakamubweza akumulela mbuli mwanaakwe. 22Aboobo Mozesi wakaiya busongo bwa Baijipiti, nkabela milimo yakwe amajwi akali mapati.

23“Ciindi Mozesi naakaba aamyaka iili makumi one, wakayeeya kuyooswaya Baisilayelinyina. 24Nkabela wakabona umwi wabo kapenzegwa a Muijipiti. Aboobo wakaya kukugwasya Muisilayelinyina, wakajaya Muijipiti ooyo. 25Nkaambo wakali kuyeeya kuti munzila eeyi bantu bokwabo balaziba kuti Leza wamubelesya kuti abafutule. Pele taakwe nibakaziba. 26Nibwakaca Mozesi wakabona Baisilayeli bobilo kabalwana mulicabo. Wakatisole kubavuna, wakabaambila kuti, ‘Akaka basa, muli babunyina, ino mulwanina nzi?’ 27Ooyo wakatalikide mweenzinyina wakasika akutonka Mozesi wati, ‘Nguni wakakubikka kuti ube musololi uutubeteka? 28Sena uyanda kundijaya mbubonya mbuli mbookajaya Muijipiti uulya jilo?’ 29Amvwe boobo Mozesi, wakatijila ku Midiyani. Ooko nkwaakaakukkala, wakaakuzyala bana balombe bobilo.

30“Nikwakainda myaka iili makumi one, mungelo wakalibonya kuli Mozesi muciteyo ciyaka mulilo munkanda aafwiifwi acilundu ca Sinai. 31Mozesi wakagambwa naakabona ceeci, eelyo wakaswena kuciteyo kuti acilangisisye. Mpoonya wakamvwa jwi lya Mwami liti, 32‘Ndime Leza wabasikale benu, ba Abulahamu, Izaka, a Jakobo.’ Mozesi wakakankama wayoowa, cakuti taakwe anaakasoleka kulanga ooko. 33Mpawo Mwami wakati kulinguwe, ‘Kogwisya ndyasyo, nkaambo aawo mpoimvwi mpaabusena busalala. 34Ncobeni, ndalanga mapenzi aapenga bantu bangu mu Ijipiti. Ndakuswiilila kutongooka kwabo, lino ndaboola kuti mbavune. Fwambaana, ndikutume ku Ijipiti.’

35“Ooyu ngo Mozesi ngobakakakide Baisilayeli nibakati, ‘Nguni wakakubikka kuti ube musololi uutubeteka?’ Ngonguwe Leza ngwaakatuma kuti abe musololi amufutuli. Mungelo ngwaakabona kuciteyo ciyaka nguwakamugwasya. 36Mozesi wakabasolweda bantu kuzwa mu Ijipiti. Wakali kucita maleele azitondezyo zigambya mu Ijipiti, mu Lwizi Lusalala, amunkanda mane kusikila myaka iili makumi one. 37Mozesi ngonguwe wakaambila Baisilayeli kuti, ‘Leza uyootumina umwi akati kanu kuti abe Musinsimi mbuli ndime.’ 38Mozesi wakali aabazyali besu Baisilayeli nibakabungene munkanda. Nguwakali aamungelo ooyo wakaamba kulinguwe acilundu ca Sinai. Ngonguwe wakatambula majwi aapa buumi akwaaleta kulindiswe.

39“Pele basikale besu tiibakamuswiilila, bakamukaka, alimwi myoyo yabo yakasukeme kubweedela ku Ijipiti. 40Bakati kuli Aloni, ‘Tucitile baleza batitusolwede, nkaambo tatuzi cakacitika kuli Mozesi ooyo wakatugwisya mu Ijipiti.’ 41Nceciindi eeco nibakabumba cikozyanyo camoombe akupa zipaizyo kulincico. Bakacita pobwe lyakulemeka ncobakalibumbila beni ceeco. 42Nkaako Leza wakabafutatila wakabasiya muzibi zyakukomba nyenyezi zyakujulu, mbubonya mbuli mbokulembedwe mubbuku lyabasinsimi kuti,

‘Nobantu ba Isilayeli! Sena mwakali kuyeeya kuti mwakali kundipa

zipaizyo azituuzyo munkanda kwamyaka iili makumi one?

43Mwakali kukomba leza mupange Moloki anyenyezi ya Lefani.

Eezyo zyakali zibumbwa nzyomwakapanga

kuti kamuzikomba.

Nkaako ndiyoomutandila kule kwiinda cisi ca Babuloni.’

44“Basikale besu bakajisi tente lyacizuminano munkanda. Lyakabambwa mbubonya mbuli Leza mbwaakalailila Mozesi. Lyakabambwa mbubonya mbuli cikozyanyo cakabona Mozesi. 45Basikale besu mbibakatambula tente eeli ndibakeenda aalyo nibakainka a Josyuwa kuyootola cisi camisyobo eeyo Leza njaakabatandila. Lyakakkala ambabo mane kusikila ciindi ca mwami Devedi. 46Leza wafwida Devedi luse. Devedi wakakumbila kuti Leza amuzumizye kuti amuyakile ŋanda iitibe ya Leza uuli ngo Leza wa Jakobo. 47Pele ngu Solomoni wakayaka ŋanda eeyo.

48“Nikuba kuti walo Leza Sijulu lyamajulu takkali mumaanda aayakwa abantu, mbuli musinsimi mbwaamba kuti,

49‘Mwami Leza wakati, Julu ncecuuno cangu cabwami,

nyika ncilyatilo camaulu aangu.

Ani niŋanda iili buti njomutindiyakile?

Buli kuli busena bwakulyookezezya kwangu?

50Sena nsili ndime ndakalenga zintu eezi zyoonse?’

51“Nywebo nobasicinguni! Nomujisi myoyo iitasanduki! Nomutajisi matwi aaswiilila makani aa Leza! Anywebo mulikozyenye abasikale benu, lyoonse mulakazya Muuya Uusalala. 52Sena kuli musinsimi naba omwe basikale benu ngubatakapenzya? Bakabajaya aabo bakaambilizya zyakusika kwa Uululeme wa Leza. Lino amubone anywebo mwakamwaaba akumujaya. 53Nywebo nimwakatambula Milawo ya Leza yakali kuletwa ansi aano abangelo, pele taakwe nimwakiibamba pe!”

Sitivini mbwaakaumwa mabwe

54Lino basinkuta nibakamvwa majwi aa Sitivini, bakanyema kapati akutalika kumulumina ntwino cabukali. 55Pele Sitivini, wakazula Muuya Uusalala, mpoonya wakalungumana kujulu akubona bulemu bwa Leza a Jesu kaimvwi kululyo lwa Leza. 56Mpawo wakati, “Ncobeni! Ndabona julu lyajaluka, a Mwanaa Muntu kaimvwi kululyo lwa Leza!”

57Ndilyonya bantu aabo bakoongolola ajwi pati, akulisinka mumatwi. Mpoonya-mpoonya boonse antoomwe bakakuumukila kulinguwe. 58Bakamuwaalila kunze lyamunzi akumuuma mabwe. Bakamboni bakapa zibaki zyabo kumwaalumi mukubusi uutegwa Saulu, kuti abalangile. 59Nibakali kumuuna mabwe, Sitivini wakali kukomba akuti, “O Mwami Jesu, tambula muuya wangu!” 60Wakavuntama akoongolola ajwi pati wati, “Mwami, utabapi mulandu acibi eeci!” Naakamana kwaamba boobo wakafwa.

Saulu awalo ooyo wakazumina kuti calulama kumujaya.

Currently Selected:

Milimo 7: Tonga96

Highlight

Copy