2 Bakolinti 3

Babelesi bacizuminano cipya

1Sena twatalika kulilumbaizya lwesu alimwi? Sena tweelede kuba amagwalo aatulungulula aazwa kulindinywe antela aaya kulindinywe mbuli bamwi? 2Tee kayi ndinywe lugwalo lutulungulula? Lulilembedwe mumyoyo yesu kuti luzibwe akubalwa abantu boonse. 3Lino nywebo lwanu mulatondezya kuti muli lugwalo lwa Kilisito lwakaletwa andiswe. Tiilwakalembwa ainki atala acilembelo camabwe pe, pele Muuya wa Leza muumi nguwakalulemba mumyoyo yabantu. 4Leza ulizi kuti twaamba boobo nkaambo Kilisito nguutucita kuti tube aacamba. 5Ani ndiswe bani swebo kuti tuliyeeyele kuti tulakonzya kuucita mulimo ooyu tobeni! Nguzu nzyotujisi zizwa kuli Leza. 6Nguutupa nguzu kuti tube basimilimo bacizuminano cipya. Mucizuminano eeci Leza tatupi milawo iilembedwe alimwi, pele utupa Muuya Uusalala. Milawo iilembedwe ileta lufu, pele Muuya upa buumi.

7Lino Milawo yakabezedwe bbala abbala abbwe yakaamba zya lufu, nikuba boobo bulemu bwa Leza bwakaboneka ciindi naakapa Milawo. Nikuba kuti bulemu oobo bwakali kuzimaana, pele busyu bwa Mozesi bwakali kumweka cakuti Baisilayeli tiibakakonzya kumulangisisya. Naa Milawo yakaletwa abulemu buli boobo, 8sena mulimo wa Muuya Uusalala tuukaindilili bulemu? 9Kuti naa mulimo uubeteka bantu kuti basubulwe wakali wabulemu, nkokuti mulimo uutululamika kuli Leza ngwabulemu bwiinda. 10Nkaambo kabulemu bwiinda bwaboneka lino, bulemu bwakaindi buya bwakali kuboneka aanga mbupati, tabucili bulemu pe. 11Kuti naa eeco cakali kuzookkala kaindi kasyoonto cakali cabulemu, eeco ciyookkalilila cilijisi bulemu bwiindilila.

12Lino nkaambo tulalangila eezi tulaacamba kapati. 13Tatuli mbuli Mozesi wakalivumbilila kumeso kuti Baisilayeli bataboni bulemu oobo bwakali buya buzimaana. 14Pele bakacili bayumu mitwe, nkaambo nikuba kusikila sunu, eeco civumbilizyo nciconya mpocicili ciindi nibabala mabbuku aacizuminano cakale nkaambo cikonzya buyo kugwisigwa nibakkala muli Kilisito. 15Iiyi, kusikila sunu kufumbwa ciindi ncibabala mabbuku aa Mozesi civumbulizyo eeco mocili mumyoyo yabo. 16Pele muntu nasandukila ku Mwami, civumbilizyo eeco cilagwisigwa. 17Lino Mwami ngwa Muuya, nkabela kufumbwa Muuya wa Mwami nkuubede kuli lwaangunuko. 18Swebo toonse notunyina civumbilizyo tuli mbuli cimboni-mboni tutondezya bulemu bwa Mwami. Tulasanduka kuba mucikozyanyo cakwe, tuya butabuka kuzwa mubulemu bumwi akunjila mubulemu bumbi alimwi, nkaambo buzwa ku Mwami walo uuli ngwa Muuya.

Currently Selected:

2 Bakolinti 3: Tonga96

Highlight

Copy