2 Bakolinti 2

1Nkaambo kaako ndakayeeya kuti nsyeelede kuboola kuzoomuswaya akumukatazya alimwi pe. 2Nkaambo kuti naa ndamupenzya, ino nguni uunga ulakonzya kundikkomanisya? Mbabaabo mbabonya mbendipenzya. 3Ndakamulembela mbuli mbwindakacita, kuti ndaakusika nditakausigwi nsoni abantu aabo beelede kundikkomanisya. Nkaambo ndasyoma kuti ciindi nenkondwa anywebo mulakondwa. 4Ndakamulembela cakupenga kuciswa mumoyo kapati amisozi minji, kutali kumuusya nsoni, pele kuti muzibe luyando lupati ndwejisi mulindinywe.

Muntu wakabisya mbweelede kuboozegwa

5Pele kuti naa umwi wakausya nsoni mweenzinyina, taakausya ndime nsoni pe, pele kutaamba cakubeja wakausya ndinywe nyoonse. 6Kwazulila kuti bunji bwanu mwamusubula muntu uuli boobo. 7Aboobo lino muleelede kulekelela muntu uuli boobo. 8Lino ndamukumbila kuti mumuboozye kutondezya kuti mulamuyanda. 9Nkankakaako ncindakamulembela, kuti ndimusunke ndizibe naa mulaaswiilila malailile aangu oonse. 10Kufumbwa ngomulekelela, ambebo ndamulekelela mbubonya. Nkaambo kuti ndalekelela, naa kuli ngweelede kulekelela, Kilisito ulizi kuti ndacita oobo nkaambo kanu. 11Tulizi bucenjezu bwa Saatani alimwi tatuyandi kuti atucenjelele.

Paulu mbwaakakatazigwa mu Tilowasi

12Lino nindakasika ku Tilowasi akukambauka Makani Mabotu aa Kilisito ndakajboa kuti Mwami wandijalwida mulyango kuti ndibeleke. 13Pele moyo wangu tuuwakakkede kabotu, nkaambo taakwe nindakamujana mukwesu Taitasi ooko pe. Aboobo ndakabalaya ndakainka ku Masedoniya.

Kilisito ulapa luzundo kubantu bakwe

14Pele aalumbwe Leza, uutupa luzundo muli Kilisito. Mulindiswe Leza uzibya bantu boonse zya Kilisito, eelyo cizibyo eeco cilimwaikide koonse-koonse mbuli bweema. 15Nkaambo tuli mbuli bweema bwatununkilizyo Kilisito ntwapa kuli Leza. Bweema oobo bulamvwigwa abaabo bayoofutulwa alimwi akuli baabo basweekede. 16Kuli baabo basweekede bweema oobo mbwalufu alimwi buyoobajaya, pele kuli bamwi tuli bweema buponya buleta buumi. Ino nguni uukonzya mulimo ooyu? 17Tatuli mbuli banji baulisya Majwi aa Leza. Pele mukuti tuli muli Kilisito, tulakambauka zyabwini. Twakatumwa a Leza kuti mukuyanda kwakwe tukaambe Mulumbe wa Kilisito.

Currently Selected:

2 Bakolinti 2: Tonga96

Highlight

Copy