2 Bakolinti 4
4
Zyalubono luli munogo zyabulongo
1Lino Leza muluse lwakwe wakatupa mulimo ooyu, ncencico eeco ncotutalengaani pe. 2Twakasowa zyoonse zyakusisikizya zijazya nsoni. Tatucengi naa kusandula Majwi aa Leza, pele Leza ulizi kuti tulaamba zyabwini. Aboobo tulayanda kuti bantu boonse batuzuminine mumyoyo yabo. 3Naa kuti Makani Mabotu ngotukambauka alivumbidwe, avumbidwe buyo kuli baabo basweekede. 4Aabo tabasyomi nkaambo Saatani uuli ngoleza waansi aano woofwaazya mizeezo yabo kuti bataboni mumuni wa Makani Mabotu aatondezya bulemu bwa Kilisito awalo Kilisito nguutondezya Leza mbwabede. 5Nkaambo makani ngotukambauka taali eesu tobeni pe, tulakambauka kuti Jesu Kilisito ngo Mwami, akuti swebo tuli babelesi banu nkaambo ka Jesu. 6Kayi Leza wakaamba kuti, “Akube mumuni uumunika kuzwa mumudima.” Leza ngonguwe ooyo uumunika mumyoyo yesu kuti tuzibe bulemu bwakwe butumunikila kuzwa kubusyu bwa Kilisito.
7Swebo tuli mbuli nongo zyabulongo ziyobwedwe lubono oolu kuti Cizibike kuti nguzu zigambya eezi zizwa kuli Leza, tazizwi kulindiswe tobeni pe. 8Tulapenzegwa munzila zinji-zinji, nikuba boobo tatupwaigwi. Tulizingidwe, nikuba boobo tatutyompwi. 9Tulatundululwa, pele tatubulide uutugwasya. Tulaumputwa, pele tatuzundwi. 10Lyoonse tuliyumwide mumibili yesu lufu lwa Jesu, kutegwa buumi bwa Jesu abwalo buboneke mumibili yesu. 11Ciindi ncotupona tulaabwa kulufu nkaambo ka Jesu, kuti buumi bwa Jesu abwalo buboneke mumibili yesu yabuntunsi. 12Aboobo swebo tulaabwa kulufu, pele eeci cimupa buumi nywebo.
13Umwi wakalemba kuti, “Ndakasyoma, aboobo ndakaamba.” Lino mbuli mbotujisi moyo walusyomo ndulonya oolo, aswebo tulasyoma aboobo tulaamba. 14Tulizi kuti Leza wakabusya Mwami Jesu kuzwa kubafu, uyootubusya mbuli Jesu akuyootubikka antoomwe anywebo kulinguwe. 15Muzeezo wazyoonse eezi nkuti mulelekwe, akuti mbubonya mbuli bantu batambula zileleko zya Leza mbobaya buvula, mbubonya oobo abalo balumbaizya Leza bavule alimwi bamulemeke.
Tulapona mulusyomo
16Nkankakaako ncotutatyompwi. Nikuba kuti mubili wangu uyabucembaala, pele muuya wangu uyabuyungizigwa lyoonse. 17Mapenzi eesu mauba-uba alimwi ngakaindi kaniini, pele ayootuletela bulemu bupati kapati, bulemu butamani, butakonzyi kweezyanyizigwa pe. 18Tatulangi kuzintu zibonwa pe, pele tulanga kuzintu zitabonwi. Nkaambo zintu zibonwa nzyakaindi kaiini buyo, pele eezyo zitabonwi tazigoli pe.
Currently Selected:
2 Bakolinti 4: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
