2 Bakolinti 12

Mwami nzyaakayubunwida Paulu

1Ndileelede kulikankaizya, nikuba kuti tacigwasyi pe, pele ndilamwaambila buyo makani aazilengaano Mwami nzyaakandiyubunwida. 2Ndizi muntu umwi Mukilisito, ooyo walo kwamyaka iili kkumi aine yainda wakakwempelwa kujulu kwini. Nsizi naa kali amubili naa kazwide mumubili, Leza alikke nguuzi. 3Ndizi buyo kuti ooyo muntu wakakwempelwa kubusena bwakubotelwa. Nsizi naa kali mumubili naa kazwide mumubili, Leza nguuzi. 4Ooko wakamvwa zintu zitaambiki zitondwa kwaambwa aa muntu. 5Zyamuntu ooyo ndakonzya kulikankaizya, pele nsikonzyi kulikankaizya lwangu ndemwini pe, ccita kwaamba zyabuteteete bwangu. 6Nikuba kuti ndalikankaizya, inga nsikooba mufuba-fuba pe, nkaambo ndinookanana zyabwini. Pele ndalikasya, kuti kutabi muntu naba omwe uyeeya kuti ndaliindilizya kwiinda mbwandibona walo, nikuba kwiinda mbwamvwa kuzwa kulindime.

7Lino kutegwa intalikankaizyi kwiindilila akaambo kaziyubunuzyo zinji, ndakabikkwa bumvwa buyasa mumubili, bwalo buli mutumwa wa Saatani kuti andipenzye, kuti intakaindi kulisumpula. 8Kwaziindi zyotatwe ndakamukumbila Mwami andigwisye bumvwa oobo. 9Pele wakandaambila kuti, “Luse lwangu lulikkwene, nkaambo nguzu zyangu zilalondoka mubuteteete.” Aboobo ndalikankaizya abuteteete bwangu cakukondwa, kuti nguzu zya Kilisito zibe alindime. 10Akaambo ka Kilisito, mebo ndakondwa mubuteteete, bantu nobanditukana, kundikatazya nemvwa macise amapenzi. Nkaambo ciindi nendili muteteete, ndendilyo nendaanguzu.

Paulu mbwaakayoowede zya Bakolinti

11Lino ndaba mufuba-fuba! Pele ndinywe mwandicitya boobo. Ndinywe mwakeelede kundiiminina. Nikuba kuti nsibalwi, pele batumwa banu bapati tabandiindi aasyoonto pe. 12Zitondezyo zyabutumwa bwini zyakacitwa akati kanu. Iiyi, zitondezyo zigambya, amilimo mipati yoonse yakacitwa mukulibombya koonse. 13Sena kuli cintu niciba comwe ncindatakamucitila kwiinda mbungano zimwi zyoonse, kuleka kuti mebo taakwe nindakamulemezya? Akaka, amundilekelele mulandu ooyu!

14Lino oolu ndwatatu nkelibambila kuza kumuswaya. Nkabela nsikoozoomubeda mukuli pe, nkaambo nsiyandi lubono lwanu, pele nceyanda ndinywe. Bana tabeelede kuyobweda bazyali babo lubono pe, pele bazyali mbabeelede kuyobweda bana babo. 15Mebo cilandibotela kapati kusowa zintu zyangu zyoonse alwangu ndemwini akaambo kanu. Kuti naa nkemuyandisisya, sena mebo njandwe buniini?

16Ambweni inga mulazumina kuti teendakamulemena. Pele cimwi ciindi umwi ulati mbwecenjede, ambweni ndakamucenjelela. 17Sena ndakamucenjelela kwiindila muli baabo mbindakamutumina? 18Ndakakumbila Taitasi kuti azoomuswaye, alimwi anguwe ndakatuma aumbi. Sena Taitasi wakamucenjelela? Sena walo andime tiitwakacita zintu amoyo omwe? Sena taakwe nitwakeenda munzila yomwe?

19Sena mulayeeya kuti swebo lyoonse tulalikwabilila kulindinywe? Leza ulizi, nobayandwa kuti tuli muli Kilisito, aboobo zyoonse nzitwali kwaamba nzyakumuyaka. 20Ndayoowa kuti ambweni ciindi ncetisike nzoojana kuti tamuli mbuli mbweyanda, anywebo nobeni muzoondijana kuti nsili mbuli mbomuyanda nywebo. Ndayoowa alimwi kuti ambweni nzoojana kuzwangana, munyono, kunyema, kuliyanda, kutamizyanya, kuvwiya, kulisumpula alupyopyongano. 21Ndayoowa kuti ciindi ncetisike alimwi Leza wangu uzoondifwisya nsoni kulindinywe, nkaambo nzoolila akaambo kabantu banji-banji bakacita zibi kale-kale, pele kabataneempa kubusofwaazi, bwaamu, azisusi zibi nzibakali kucita.

Currently Selected:

2 Bakolinti 12: Tonga96

Highlight

Copy