2 Bakolinti 13

Kucenjezya akujuzya kwamamanino

1Lino ndwatatu ndweza kulindinywe. Malembe alati, “Makani oonse aali buti aleelede kusinizigwa abakamboni bobilo naa botatwe.” 2Ndakabacenjezya aabo bakabisya abamwi boonse, alimwi ndabacenjezya lino nentako, mbuli mbundakacita nindakamuswaide lwabili, kuti ciindi neyooboola alimwi nsikooyoobeengelela pe. 3Eelyo ndendilyo nemuyoobona citondezyo ncomuyanda cakuti Kilisito nguukanana mulindime. Tali muteteete kuli zeezyo nzyacita kulindinywe, pele ulabonesya nguzu zyakwe mulindinywe. 4Nkaambo walo wakakankaminwa mubuteteete, pele ulapona munguzu zya Leza. Tuli bateteete mulinguwe, pele tuyooba aabuumi anguwe munguzu zya Leza, twaakubeleka akati kanu.

5Amulilingule lwanu nobeni, mubone kuti naa mulijisi lusyomo. Amulisunke lwanu nobeni. Sena tamuzi kuti Jesu Kilisito ulikkede mulindinywe? Kuti naa tamuli boobo nkokuti mwakacilwa! 6Ndasyoma kuti mulakonzya kubona kuti tiitwakacilwa swebo pe. 7Tulamukombela kuli Leza kuti mutabisyi. Kutaamba kuti tulibonye mbuli kuti twakainda, pele kuti nywebo mucite eeco ciluleme, nikuba kuti kamutulanga mbuli kuti swebo twakacilwa. 8Nkaambo swebo tatukonzyi kucita cintu citeendelani azyabwini, tuleelede kucita zyabwini. 9Tee kayi tulabotelwa ciindi ncotubula nguzu, nkabela nywebo inga muli bayumu. Ncotukombela lyoonse nkuti nywebo muzwidilile kabotu. 10Ndamulembela eezi nketanasika ooko kuti ndaakusika, kutakabi cintu cindiletela bukali mukubelesya bulelo bwangu. Mwami wakandipa bulelo oobu kuti njumye mbungano, kutali kwiimwaya pe.

11Lino ndamana, nobakwesu, mbubo, kamusyaala kabotu. Amuswiilile malailile aangu, alimwi amululamike buumi bwanu. Amumvwane, amukkale muluumuno, nkabela Leza siluyando, siluumuno uyooba aandinywe.

12Amujuzyanye muluyando lwini-lwini.

Basyomi boonse balamujuzya.

13Luse lwa Mwami Jesu Kilisito aluyando lwa Leza, aluswaanganyo lwa Muuya Uusalala zibe aandinywe nyoonse.

Currently Selected:

2 Bakolinti 13: Tonga96

Highlight

Copy