Bagalatiya 1

1Ndime Paulu mutumwa. Nsiindakatumwa naa kugwasigwa amuntu pe, pele wakandituma ngu Jesu Kilisito a Leza Taata, wakamubusya kuzwa kubafu. 2Mebo abeenzuma boonse mbendili aabo,

Tulamujuzya nobambungano zyaku Galatiya,

3Leza Taata a Mwami Jesu Kilisito amubede aaluse akumupa luumuno. 4Kilisito wakalyaaba akaambo kazinyonyoono zyesu kuti atuvune kuzwa kububi bwaansi aano, mbubonya mbuli bwakayanda Leza Taata. 5Atulemeke Leza mane kukabe kutamani. Akube boobo.

Makani Mabotu ngamwi

6Ndagambwa kapati kuti mwafwambaana kusiya Leza wakamwiita muluse lwa Kilisito, akutobela makani aambi. 7Takuli kuti kuli makani mabotu aambi pe. Kuli buyo bantu bamwi bamupilinganya, bayanda kunyonganya Makani Mabotu aaamba zya Kilisito. 8Pele kufumbwa muntu, nituba ndiswe naba mungelo, uumukambaukila makani aambi aatali mbuli ngutwakamukambaukila, asinganyizigwe. 9Mbutwaambide kale, alimwi ndaindulula, kuti naa kuli muntu uumukambaukila makani aambi aatali mbuli ngumwakatambula kulindiswe, asinganyizigwe. 10Lino nendaamba eezi sena ndiyanda kuti bantu bandizuminine? Peepe, pele Leza alikke. Sena ndisoleka kubotezya bantu? Peepe, nindacili kubotezya bantu nindatali mutwanga wa Kilisito pe.

Paulu mbwaakaba mutumwa

11Nobakwesu, ndimuzibya kuti Makani Mabotu aaya ngekambauka taazwi kubantu pe. 12Nsiindakaatambula kuzwa kumuntu, alimwi taakwe wakandiiisya Makani aaya, pele Jesu Kilisito nguwakandiyubunwida ngawo.

13Mwakamvwa kale zyabuumi bwangu mbubwakabede kale-kale nindakacili mulukondo lwa Bajuda, ndakali kupenzya mbungano ya Leza kapati akusoleka kwiinyonyoona. 14Nkabela ndakabainda beenzuma banji mukucita zya Bujuda, masimpe ndakali munkutwe mutunsiya-nsiya twabasikale besu.

15Pele Leza muluse lwakwe wakandisalide kale akundiita nketanazyalwa. 16Cakamubotela kuti andiyubunwide Mwanaakwe, kutegwa nkakambauke zyanguwe kuli bamasi. Taakwe ngundakabuzya zyamakani aaya, 17nikuba kuunka ku Jelusalemu kuyoobuzya aabo bakali batumwa nketanaba. Pele ndakainka ku Alabiya, kuzwa kooko ndakapilukila ku Damasikasi. 18Lino nikwakamana myaka yotatwe, ndakaya ku Jelusalemu kukuswaya Pita, ndakaakukkala anguwe kwamazuba aali kkumi aasanu. 19Taakwe uumwi mutumwa ngundakabona, ccita buyo Jemusi munyina Mwami alikke. 20Ndisinizizye kuti makani aaya ngemulembela ngamasimpe, Leza ulizi, nsibeji pe.

21Kuzwa waawo ndakaya kuzisi zya Siliya a Silisiya. 22Ciindi eeco bambungano zya Kilisito zyakali ku Judiya tiibanandibona. 23Bakamvwide buyo kuti, “Ooyo wakali kutupenzya sunu ulakambauka zyalusyomo ndwaakali kusoleka kunyonyoona.” 24Eelyo bakalemeka Leza nkaambo kandime.

Currently Selected:

Bagalatiya 1: Tonga96

Highlight

Copy