Bagalatiya 2

Batumwa bamwi mbubakatambula Paulu

1Lino nikwakamana myaka iili kkumi aine, ndakabweza lweendo alumwi kuya ku Jelusalemu antoomwe a Banabasi, ndakatolelezya a Taitasi. 2Ndakainka ooko nkaambo Leza nguwakandiyubunwida kuti ngunke. Mumuswaangano wabalupati-pati ndakapandulula Makani Mabotu ngekambauka kuli bamasi. Ndakacita oobo kuti cimwi ciindi milimo njecita anjindakacita inga ilaba yabuyo. 3Silweendoma Taitasi nikuba kuti wakali Mugiliki tiibakakakatizya kuti apalulwe, 4nikuba kuti bamwi bakali kuyanda kumucita boobo. Bakali kulicengezya kuti mbakwesu, pele bakaboolede kutwela lwaangunuko lwesu ndotujisi muli Kilisito Jesu. Bakali kuyanda kutucita bazike, 5pele tiitwakababombela aasyoonto, nkaambo twakayanda kumubambila njiisyo zyabwini zya Makani Mabotu.

6Lino aabo baambwa kuti mbabapati (nnyina makani naa bakali bani, nkaambo Leza tasalululi pe) aabo baambwa kuti mbapati taakwe nibakayungizya cintu cakuti njiisye. 7Pele bakabona kuti ndapegwa mulimo wakukambaukila bamasi Makani Mabotu mbubonya mbuli Pita mbwaakapegwa mulimo wakukambaukila Bajuda. 8(Nkaambo Leza ooyo wakabeleka muli Pita akumupa mulimo wabutumwa ku Bajuda, nguwakabeleka amuli ndime kuti mbe mutumwa wabamasi.) 9Lino Jemusi, Pita a Joni aabo baambwa kuti nzicinda zyambungano bakabona kuti Leza muluse lwakwe wakandipa mulimo ooyu. Eelyo bakatujata amaanza aalulyo mebo a Banabasi kutondezya kuti batuzumizya kuti tuye kuli bamasi, balo bagame ku Bajuda. 10Bakatukumbila eeci kuti tutaleki kugwasya bacete akati kabo. Ncencico eeci ambebo ncindakali kuyandisya kapati.

Paulu mbwaakalulamika mizeezo ya Pita

11Pele Pita naakasika ku Antiyoki, ndakamukazya antangalala, nkaambo wakali lubizizye. 12Nibatakanasika bantu bamwi bakatumidwe a Jemusi, Pita wakali kulya abamasi, pele nibakasika aabo wakalipambula mwini kataciyandi kulya aabo pe, nkaambo wakali kuyoowa basikuyanda kuti bamasi kabapalulwa. 13Nkabela Bajuda bakwesu bamwi boonse bakatalika kucita mbubonya oobo, mane awalo Banabasi wakabatobela-tobela. 14Pele nindakabona kuti tabatobeli njiisyo zyabwini zya Makani Mabotu, ndakaambila Pita kabamvwide boonse kuti, “Yebo uli Mujuda, pele mulwaangunuko lwako wakali kukkala mbuli bamasi, ino nkaambo nzi ncosinikizya bamasi kuti bakkale mbuli Bajuda?” 15Swebo tuli Bajuda bazyale, tatuli bamasi basizibi pe. 16Kayi tulizi kuti muntu takonzyi kuba mululami mukutobela Mulawo, ccita mukusyoma Jesu Kilisito. Aswebo twakasyoma Kilisito Jesu kuti tube balulami bali boobu kuli Leza, kutali mukutobela Mulawo. Nkaambo Leza taambi kuti muntu uutobela Mulawo mmululami. Kayi taakwe uukonzya kululamikwa mukubamba Mulawo. 17Kuti naa swebo, mukuyanda kuba balulami muli Kilisito, tujanika kuti tuli basizibi mbubuli bamasi, sena ono caamba kuti Kilisito nguwaindizya zibi? Peepe, embo pe!

18Lino kuti naa ndapilukila kukutobela nzila ya Mulawo njindakamwaide, nkokuti ndalibonya kuti ndasotoka Mulawo. 19Kwaamba zya Mulawo ndilifwide nkaambo wandizula, eelyo ndiponena Leza. 20Ndabona kuti ndakakankaminwa antoomwe a Kilisito aciingano. Aboobo lino buumi mbwepona tabuli bwangu pe, pele mbwa Kilisito uuli muli ndime. Buumi oobu mbwepona sunu mumubili mbwakusyoma Mwanaa Leza, ooyo wakandiyandisya akwaaba buumi bwakwe nkaambo kangu. 21Peepe, nsili ndime eenkaka luse lwa Leza pe. Kuti naa muntu kakonzya kuba mululami kuli Leza mukutobela Mulawo, nkokuti Kilisito wakafwida cabuyo.

Currently Selected:

Bagalatiya 2: Tonga96

Highlight

Copy