Bagalatiya 3

Lusyomo naa Mulawo

1Nywebo no Bagalatiya bafuba-fuba! Ino nguni wakamuungula? Ciindi nitwakamukambaukila zya Jesu Kilisito, twakamupandulwida kabotu-kabotu mbuli mbwaakakankaminwa aciingano. 2Amundaambile eeci, sena mwakatambula Muuya Uusalala kwiindila mukubamba Mulawo naa mukumvwa akusyoma Makani Mabotu? 3Ani inga mwafubaala buti boobu? Tee kayi mulimo walufutuko lwanu Muuya Uusalala nguwakuutalika, sena lino muyanda kuumanizya mungu zyanu nobeni? 4Sena mwakatambula zileleko zya Leza zyoonse cabuyo? Nsisyomi pe. 5Sena Leza wakamupa Muuya akucita zigambya mulindinywe, wakacita oobo nkaambo kakuti mwakabamba Mulawo naa mwakamvwa Makani Mabotu akwaasyoma?

6Amuyeeye zyakacitika kuli Abulahamu. “Wakasyoma Leza, aboobo Leza wakamwaamba kuti mmululami.” 7Nkaako mwabona kuti aabo basyoma mbabana ba Abulahamu beni-beni. 8Leza wakazibila limwi kuti uyoolulamika bamasi akaambo kalusyomo lwabo. Eelyo wakakambauka Makani Mabotu kuli Abulahamu, mbubwaamba Malembe kuti, “Wakati kuli Abulahamu, ‘Mulinduwe misyobo yoonse iyoolelekwa.’” 9Lino Leza ulaleleka boonse basyoma mbuli mbwaakaleleka Abulahamu wakali kumusyoma.

10Boonse babikka myoyo amilimo ya Mulawo mukuti naa baicita bayoolulamikwa, balisinganyizidwe. Kayi Malembe alati, “Ulisinganyizidwe ooyo uutaciti zyoonse zilembedwe mubbuku lya Mulawo.” 11Lino twabona kuti Leza taambi kuti muntu mmululami mukucita Mulawo, nkaambo muntu takonzyi pe. Pele mbuli bwaamba Malembe, “Ooyo Leza ngwaamba kuti mmululami nkaambo wasyoma uyooba aabuumi butamani.” 12Pele Mulawo waindana alusyomo mbubwaamba Malembe kuti, “Ooyo uucita zyoonse zyaamba Mulawo uuyooba aabuumi mukucita boobo.” 13Pele Kilisito wakatunununa kuti tutasinganyizigwi a Mulawo mukuti wakatola busena bwesu akusinganyizigwa. Mbuli Malembe mbwaati, “Ulisinganyizidwe woonse uukankaminwa acisamu ooyo.” 14Kilisito wakacita oobo kuti zileleko Leza nzyaakasyomezya kuli Abulahamu zipegwe akuli bamasi mulinguwe, akuti kwiindila mukusyoma tutambule Muuya Uusalala Leza ngwaakasyomezya.

Cisyomezyo ca Leza kuli Abulahamu

15Nobakwesu, iimupe cikozyanyo cabuzuba abuzuba. Bantu bobilo bapangana akuzuminana, taakwe umwi weelede kutyola cizuminano eeco naa kucicinca. 16Lino Leza wakapa zisyomezyo zyakwe kuli Abulahamu akunyungu yakwe. Takaamba kuti, “Kulunyungu lwako” mbuli kuti mbanji. Pele wakati, “Kunyungu yako,” nkaambo wakali kwaamba muntu omwe buyo uuli ngu Kilisito. 17Ncendaamba nceeci, Leza wakapanga cizuminano akusyomezya kuti uyoocibamba. Aboobo Mulawo wakaboola lyakainda myaka iili myaanda yone amakumi otatwe tuukonzyi kulobya cizuminano acisyomezyo cakwe cakapangwa kale pe. 18Kuti Leza kapa cileleko kumuntu mukuti muntuooyo wabamba Mulawo, nkokuti cileleko eeco tacili cacisyomezyo. Pele Leza wakaleleka Abulahamu nkaambo wakasyomezya kucita boobo.

Zyamizeezo ya Mulawo

19Ani Mulawo ngwanzi? Leza wakapa Mulawo kuti uzibye bantu zibi zyabo, kusikila lyakaza nyungu ya Abulahamu eeyo njaakali kwaamba Leza naakamupa cisyomezyo. Leza wakapa Mulawo kwiindila mubangelo asimwiimaakati. 20Pele simwiimaakati tayandiki kuti kakutali bantu bobilo. Lino Leza ngumwi buyo. 21Sena nkokuti Mulawo ulakazyanya azisyomezyo zya Leza? Embo pe! Kuti naa bantu nibakali kukonzya kuba aabuumi mukubamba Mulawo, nibakaba balulami kuli Leza kwiindila mu Mulawo. 22Pele Malembe alaamba kuti zintu zyoonse zili munguzu zyazibi, kuti ooyo uusyoma Jesu Kilisito atambule cileleko ncaakazyomezya Leza.

23Lino kazitanasika njiisyo zyalusyomo oolu, twakali mbuli baange ba Mulawo kusikila nizyakayubununwa. 24Mulawo wakali mbuli mweendelezi wesu mane Kilisito naakasika, mukuti Leza atwaambe kuti tuli balulami mukusyoma. 25Lino mbutwaziba zyalusyomo Mulawo tuucitweendelezyi pe.

26Nyoonse muli bana ba Leza nkaambo mulasyoma muli Kilisito Jesu. 27Nywebo nyoonse mbuli mbumwakabbapatizigwa muli Kilisito mulisamide buumi bwa Kilisito. 28Aboobo taakwe lwaandaano akati ka Bajuda abamasi, naa akati kabazike abaangunukide, naa akati kabaalumi abakaintu, nkaambo nyoonse muli omwe muli Kilisito Jesu. 29Kuti kamuli bakwe Kilisito, nkokuti muli bana ba Abulahamu, beelede kutambula eezyo Leza nzyaakasyomezya.

Currently Selected:

Bagalatiya 3: Tonga96

Highlight

Copy