2 Bakolinti 11

Paulu abatumwa babeji

1Ndakomba amundilekele mubufuba-fuba bwangu asyoonto. Amundileke! 2Ndamufwida bufwi mbuli bwa Leza, nkaambo ndakamukwasya kumwaalumi umwi uuli ngu Kilisito, kuti mube mbuli musimbi uutazi musankwa. 3Pele ndiliyoowede kuti mbuli nzoka mbuyakacenga Eva mubucenjezu bwayo, anywebo inga myoyo yanu ileenwa akuleka kulipa kuli Kilisito amoyo oonse. 4Nkaambo kuti naa kwasika muntu uukambauka Jesu uumbi kuleka Jesu ooyo ngutwakamukambaukila, naa mwatambula muuya uumbi uutali mbuli muuya ooyo ngumwakatambula, naa mwatambula makani aambi aatali mbuli makani aayo ngomwakatambula, mulafwambaana kutobela kakunyina kuyeeya.

5Ndiyeeya kuti mebo nsili muniini kuli baabo mbomuti, “Mbatumwa basale-sale.” 6Nikuba kuti ncita mbuli kuti ndabalika buyo mukukanana, pele muluzibo pe. Eeci twakacisalazya munzila zyoonse amuzintu zyoonse.

7Ndakalibombya kutegwa nywebo musumpulwe, nkaambo ndakamukambaukila Makani Mabotu aa Leza cakutapegwa cintu. Sena ndakabisya mukucita boobo? 8Nindakatambula zyakundigwasya kuzwa kumbungano zimwi, cakakoya aanga ndabanyanga kutegwa ndigwasye ndinywe. 9Nkabela ciindi nindakacili aandinywe, nindakabula cintu, tiindakalemezya muntu naba omwe pe, bakwesu bazwa ku Masedoniya bakanditumina zintu zyoonse nzindakali kubula. Aboobo ndakalikasya alimwi ndicinoolikasya kuti ndimulemene. 10Mbubuli kasimpe ka Kilisito mbokali mulindime, ndaambisya kuti taakwe muntu uuyoolesya kulikankaizya kwangu muminyinza yoonse ya Akeya. 11Ino nkaambo nzi nceamba boobo? Nkaambo nsimuyandi na? Leza ulizi kuti ndamuyanda!

12Eeco ncecita ndinoociya bucicita, kuti nkabatesule aziimino zyabo aabo bantu bayanda kulikankaizya cakwaamba kuti mumulimo wabo baleelene andiswe. 13Bantu aabo bali boobo mbatumwa babeji, mbabelesi balweeno, balicita mbuli batumwa ba Kilisito. 14Tacigambyi eeci pe, nkaambo awalo mwini Saatani ulalicita mbuli mungelo wamumuni. 15Aboobo tacili cintu ceenzu kuti naa babelesi bakwe balicita beni mbuli babelesi babululami. Mamanino aabo azooba mbuli bubede milimo yabo.

Mapenzi aabutumwa bwa Paulu

16Ndaindulula kuti kutabi muntu uundiyeeya kuti ndimufuba-fuba. Nikuba kuti kamuyeeya boobo, amunditambule mbuli muntu mufuba-fuba, kutegwa ambebo ndilikankaizye buniini. 17Eeci ncendaamba tacili mbuli bwaamba Mwami pe. Ndaamba mbuli bafuba-fuba mukulikankaizya boobo. 18Bantu banji balikankaizya kuzintu zyamunyika, ambebo eendikankaizye ma! 19Nywebo mbomuti muli basongo, nkankakaako bafuba-fuba mulabaleka cakubotelwa. 20Muleka bantu bamutola mubuzike, nibaba bamulida lubono, nibaba bamweena, nibaba bamusampaula, nibaba bamuuma kumeso. 21Cansoni ndeelede kwaamba kuti tuli bateteete kuti tucite zili boobo!

Lino ndaamba mbuli mufuba-fuba, zili buti zyoonse bamwi nzyobalikankaizizya, andime mbubonya. 22Sena balo Mbahibulu? Andime. Sena balo Mbaisilayeli? Andime. Sena mbalunyungu lwa Abulahamu? Andime. 23Sena mbabelesi ba Kilisito? Mebo ndainda, ndaambaula aanga muntu uusondokede, ndabainda kumilimo mipati. Ndabainda mukwaangwa amuzyuumo zitabaliki, kanji-kanji nkeyanda kufwa. 24Ziidi zyosanwe bapati ba Bajuda bakandikwabbaula zimboko zili makumi otatwe afuka. 25Ziindi zyotatwe ndakaumwa amisako, alimwi ndakaumwa amabwe lomwe. Ndakafwidwa bwato ziindi zyotatwe, ciindi cimwi ndakali kutonkaikwa mulwizi masiku amasikati. 26Kanji-kanji nkeli mumisinzo ndakajana ntenda mumilonga, ntenda kubafumpi, ntenda ku Bajudama, ntenda kuli bamasi, ntenda muminzi, ntenda munkanda, ntenda mulwizi, ntenda kubakwesu babeji. 27Lyoonse nkeli mumilimo amapakasyo, kanji-kanji nketooni ŋonzi, nkefwa nzala anyota, kubula cakulya, alimwi nkefwa mpeyo akubula zisani. 28Kunze azeezi, ndemenwa akulibilikila mbungano zyoonse. 29Nguni muteteete ime nketali mutete anguwe? Nguni waleba umwi, ime nketamunyemeni?

30Kuti naa ndileelede kulikankaizya, ndilalikankaizya muli zeezyo zitondezya butete bwangu. 31Leza, Wisi wa Mwami Jesu, ooyo uutembaulika lyoonse, ulizi kuti nsibeji pe. 32Ku Damasikasi, mweendelezi wakabikkwa amwami Aletasi, wakabikka balindizi muzyooko zyoonse zyamunzi kuti bandijate. 33Pele ndakaselusigwa mucinzuma kuzwa kumpulugwido yabwaanda, nkaako ndakaloboka kuzwa kumaanza aakwe.

Currently Selected:

2 Bakolinti 11: Tonga96

Highlight

Copy