2 Bakolinti 10

Paulu mbwaakakwabilila butumwa bakwe

1Mebo lwangu nde Paulu ndamukumbila, ndime yooyo bamwi ngobati mubombe nali aandinywe, pele ulamutapatila natawo. Ndamukumbila akaambo kalubomba aluzyalo lwa Kilisito, 2kuti mutandiciti kuti nzoobe aacamba cakumutapatila ndazoosika kulindinywe. Nkaambo nsidonaiki kuti ndilaacamba cakuti ndilakonzya kutapatila baabo batuyeeyela kuti tulacita milimo mbuli bantunsi. 3Iiyi, tuli bantu, pele tatulwani nkondo mbubucita bantunsi. 4Zilwanyo zyesu tazili zyaansi pe, pele nzyanguzu zya Leza zyakunyonyoona ziyubilo ziyumu. 5Tulamanya kukazyanya akulisumpula koonse kusola kulesya bantu kuti bazibe Leza. Tulcita mizeezo yoonse mukuti iswiilile Kilisito. 6Nywebo mwaziba mbomweelede kuswiilila Kilisito, ndililibambilide kusubula kufumbwa ooyo uutaswiilili.

7Amulange zimucitikila. Kuti naa kuli muntu uuyeeya kuti nguwa Kilisito, ooyo muntu aibaluke kuti mbuli mbwali muntu wa Kilisito walo, aswebo tuli bantu ba Kilisito. 8Nikuba kuti ndaindilizya buniini kulikankaizya akaambo kabulelo bwesu mbotwakapegwa a Mwami kuti tumuyake kutaamba kuti tumumwaye, nsiusi nsoni pe. 9Nsiyandi kuboneka kuti ndamukonga amagwalo aangu pe. 10Ambweni inga umwi ulati, “Magwalo aakwe malemu, alijisi nguzu, pele alibonya mutete, alimwi kwaamba kwakwe nkuuba.” 11Pele muntu uuyeeya boobo azibe kuti ncotwaamba mumagwalo ciindi ncetutawo, ncencico ncotucita ciindi ncotuliwo.

12Tatuli mbuli baabo baliiminina alimwi tatusoli akulyeezyanya ambabo. Pele nobalyeeleka muli cabo beni akulyeezyanya balitondezya kuti mbafuba-fuba. 13Swebo tatukooyoolikankaizya kwiinda mbotweelede, pele tuyoobamba cipimyo Leza ncaakatupa, anywebo muli mukati mwacipimyo eeco. 14Aboobo tiitwakaindilizya nitwakasika kulindinywe. Kwaamba masimpe, ndiswe twakasaanguna kuza kulindinywe akumuletela Makani Mabotu aa Kilisito. 15Tatulikankaizyi kwiinda mbokweelede mumilimo yabamwi bakali kubeleka akati kanu. Kapati tulangila kuti lusyomo lwanu lulakomena akuti mulimo wesu akati kanu uyookomena kapati, 16kuzwa waawo tuyookonzya kukambauka Makani Mabotu mumasi aali kumbele lyanu, kakutakwe kulikankaizya mumilimo yakacitwa aumbi pe. 17Mbuli Malembe mbwaati, “Ooyo uulikankaizya alikankaizizye zyakacita Mwami Leza.” 18Nkaambo ooyo uulilumbaizya mwini teensi nguutambulika pe, pele uutambulika nguyooyo uulumbaizigwa a Mwami.

Currently Selected:

2 Bakolinti 10: Tonga96

Highlight

Copy