2 Bakolinti 1

1Ndime Paulu mutumwa wa Kilisito Jesu kwiindila mukuyanda kwa Leza, tuli a Timoti mukwesu.

Ndamujuzya nywebo nombungano ya Leza iili ku Kolinti, abasyomi boonse bali mucisi ca Akeya coonse.

2Leza Taata a Mwami Jesu Kilisito amubede aaluse aluumuno.

Paulu ulalumba Leza

3Aalumbwe Leza Wisi wa Mwami wesu Jesu Kilisito, Taata siluzyalo, uutuumbulizya. 4Ulatuumbulizya mumapenzi eesu oonse, kutegwa aswebo tukonzye kuumbulizya baabo bali mumapenzi naali buti oonse, mbubonya mbuli Leza mbwatuumbulizya. 5Nkaambo mbubonya mbotumvwa macise a Kilisito, mbubonya oobo Kilisito mbwatuumbulizya kapati. 6Kuti naa katupenga, nkuti nywebo muumbulizigwe eelyo kwamana mukafutulwe. Kuti katuumbulizigwa nkuti anywebo muumbulizigwe kwamana mutambule nguzu zyakuyuma ciindi ncomuli mumapenzi aali mbubonya mbuli ngotupenga aswebo. 7Lusyomo lwesu mulindinywe taluzungaani pe. Tulizi kuti mbubonya mbomumvwa macise mbuli ndiswe mbubonya oobo muyooumbulizigwa mbotuumbulizigwa aswebo.

8Nobakwesu, tuyanda kuti muzibe mapenzi ngitwakajana mu Asiya. Mukuli wamapenzi wakatulemena kapati kwiinda mbutwakali kukonzya, cakuti tiitwakazi kuti tucinoopona. 9Twakasyomede kuti tulaafwiifwi kufwa. Eeco cakaba kuti tutalitembi lwesu tobeni, pele tusyome Leza uubusya bafu. 10Wakatuvuna kuzwa muntenda zibyaabi zyalufu, alimwi ucinooyootuvuna. Twakabikka lusyomo lwesu loonse mulinguwe kuti uciyootuvuna kumbele. 11Anywebo muleelede kutugwasya akukomba kwanu. Ndendilyo banji nibayoolumbaizya Leza nkaambo kazeezyo nzyatucitila muluse lwakwe.

Zyalweendo lwa Paulu

12Lino cintu ncotukonzya kulisumpwida nceeci, cakuti moyo wesu ulazumina kakunyina akweezeezya kuti kuli koonse nkutwakainda, kapati akati kanu, Leza wakatupa buumi busalala butali bwabuzangi. Buumi oobo tiibwakali boobo nkaambo kamaanu aabantu, pele nkaambo kaluse lwa Leza. 13Twamulembela zyalo nzyomukonzya kubala akumvwa. Ndasyoma kuti mulazimvwisya, 14nikuba kuti mulizi aasyoonto lino. Ndasyoma kuti mubuzuba bwa Mwami Jesu muyoolisumpula akaambo kesu, aswebo akaambo kanu.

15Nkaambo kakuti ndakasyoma boobu, ndakali kuyanda kuti ndisaangune kuboola kulindinywe kutegwa muzoolelekwe ziindi zyobilo. 16Ndakali kuyanda kuti ndizoomuswaye ciindi cakuya ku Masedoniya, alimwi ndapiluka mundigwasye mulweendo lwangu lwakuya ku Judiya. 17Nindakayeeya kucita boobo, sena muyeeya kuti ndakali kucita zyabuyo? Sena ndilakanza mbuli simalabali uuti “Iiyi” naa “Peepe” ciindi comwe? 18Ndakonka muli Leza kuti majwi ngotumwaambila taali buyo “Iiyi” naa “Peepe.” 19Jesu Kilisito Mwanaa Leza, ooyo swebo, Silivanusi a Timoti ngutwakamukambaukila taakali “Iiyi” naa “Pe” ciindi comwe, pele lyoonse wakali “Iiyi” kweendelana akuyanda kwa Leza. 20Nkaambo muli “Iiyi,” Leza ulacita zyoonse nzyaakasyomezya. Ncencico eeco muli Kilisito tulazuminana azeezi notuti “Akube boobo,” mukulemeka Leza. 21Leza nguusinizya kuti swebo andinywe tuli bakwe Kilisito. Ngonguwe wakatutuma, 22wabikka cizibyo cakwe aalindiswe akutupa Muuya Uusalala mumyoyo yesu kuti abe citondezyo cazeezyo ziciza.

23Leza ulizi kuti nsibeji. Ulizi kuti ncindakaboolela ku Kolinti nkuti nditamujazyi nsoni. 24Tatusoli kumulailila nzyomweelede kusyoma. Kwaamba zyalusyomo lwanu, mulisimide ncobeni. Ncotuyanda nkugwasyanya andinywe kuti mukondwe.

Currently Selected:

2 Bakolinti 1: Tonga96

Highlight

Copy