1 Bakolinti 16

Makani aamilumbo yakugwasya basyomi

1Lino kumakani aamilumbo yakugwasya basyomi, amucite mbubonya mbuli mbundakalailila mbungano zyaku Galatiya. 2Mubuzuba butaanzi bwamvwiki lyoonse umwi aumwi wanu uleelede kuti aliyobwede cintu mbuli mbwajisi, kuti ndaakuboola tutakasowi ciindi mukubunganya milumbo. 3Nkabela mbwetisikile buyo, ndizootuma baabo mbomutisale, nzoobapa amagwalo kuti bakatole milumbo yanu ku Jelusalemu. 4Kuti naa cileelede kuti ambebo ngunke, njooinka ambabo.

Miyeeyo ya Paulu

5Ndizoomuswaya ciindi ncendizoozwa ku Masedoniya, nkaambo ndiyeeya kuzooinda ku Masedoniya. 6Ambweni ndizookkala andinywe mane kusikila kumamanino aamupeyo, kutegwa mukakonzye kundigwasya mulweendo luli loonse ndwetitole. 7Nkaambo nsiyandi kumubona nkebindide pe, pele ndiyanda kuti nzookkale andinywe kwaciindi cilamfu, kuti naa Mwami wazumina.

8Pele ndilakkala mu Efesusi mane kusikila ciindi ca Pobwe lya Pentekosite. 9Okuno Leza wandijalwida mulyango kuti ncite mulimo mupati, nikuba kuti kuli basinkondoma banji. 10Asika Timoti, mubone kuti mwamubamba kabotu, nkaambo ulacita milimo ya Mwami mbubonya mbuli ndime ndemwini. 11Aboobo kutabi muntu uumunyansya pe. Amumusindikizye caluumuno, kuti azoosike kulindime, nkaambo ndilamulangila antoomwe abasyomi bamwi.

12Awalo mukwesu Apolosi, ndakamukumbilisya kuti asike ooko azoomuswaye antoomwe abasyomi bamwi, pele walo taakali kuyanda kuti asike ono. Ulaboola ajana ciindi cibotu.

Majwi aamamanino

13Amucenjele, mwiime mulusyomo lwanu, mube basicamba, muzuunyane. 14Zyoonse nzimucita azicitwe muluyando.

15Lino nobakwesu, mulizi anywebo kuti bamukwasyi wa Sitefanasi, mbibakasaanguna kusyoma mu Akeya, alimwi bakalyaaba lwabo mukugwasya basyominyina. 16Ndamukumbila kuti mulibombye kubantu bali boobo abamwi babelekela antoomwe ambabo. 17Ndakkomana kuti Sitefanasi, Footunatosi, a Akeikusi, basika nikuba kuti nywebo tatuli antoomwe, bakoyaanga banjila mubusena bwesu. 18Bakanditontozya mbubonya mbuli mbobamutontozya nywebo. Amubalemeke bali boobo.

19Mbungano zyaku Asiya zilamujuzya. Akwila a Pulisila antomwe abaabo babungana muŋanda yabo bamujuzya kapati mu Mwami. 20Basyomi balamujuzya. Amujuzyanye muluyando lwini-lwini lwa Bukilisito.

21Mebo lwangu, nde Paulu, ndalemba lujuzyo oolu ajanza lyangu. 22Kuti naa kuli muntu uutayandi Mwami, asinganyizigwe. O Mwami wesu, koboola! 23Mwami Jesu amubede aaluse. 24Luyando lwangu alube andinywe nyoonse muli Jesu Kilisito.

Currently Selected:

1 Bakolinti 16: Tonga96

Highlight

Copy