1 Batesalonika 4

Zyabuumi bwakubotezya Leza

1Lino kumamanino, nobakwesu twamukumbila eeci. Mwakamvwa kuzwa kulindiswe makani aambomweelede kweenda kuti mubotezye Leza, eelyo mulacita oobo. Pele lino tulamukumbila canguzu mu Mwami Jesu kuti mwiindilizye kucita eezi. 2Nkaambo mulizi malailile ngotwakamupa aazwa ku Mwami Jesu. 3Leza ncayanda ncakuti musalale mumoyo, nkokuti mulilesye kubwaamu. 4Lino umwi aumwi wanu ajane mukaintu munzila iisalala, iilemekwa ku Mwami. 5Atakwati cikwate-kwate mbuli bucita batazi Leza. 6Pele mumakani aaya muntu atabisizyi akucenga mweenzinyina. Mbubonya mbuli mbotwakamucenjezya kale, Leza uyoosubula boonse bacita zili boobo. 7Nkaambo Leza taakatwiitila kuti tucite zisofweede, wakatwiitila kuti tusalale. 8Aboobo ooyo uukaka makani aaya, tanyansyi muntu buyo, ulanyansya Leza uumupa ndinywe Muuya wakwe Uusalala.

9Pele kwaamba zyakuyandana kwabasyomi, tandeelede akumulembela, nkaambo Leza lwakwe mwini wakamwiisya mbomweelede kuyandana. 10Masimpe mulayandana abasyomi boonse bali mu Masedoniya. Pele tulamukumbila, nobakwesu, kuti mwiindilizye kucita eezi. 11Musoleke kukkala muluumuno. Mulibonene nobeni kumakani aanu, alimwi mubelesye maanza aanu. Amucite eezi mbubonya mbuli mbotwakamulailila 12kuti bakunze bamulemeke akuti mutali kumbatizyi kumuntu nabani.

Zyakuboola kwa Mwami

13Lino, nobakwesu, tuyanda kuti muzibe zyabaabo bakafwa, kuti kuusa kwanu kusiyane abuumba bwabaabo banyina lulangilo mububuke. 14Tulasyoma kuti Jesu wakafwa akubuka alimwi. Mbubonya oobo tulasyoma aabo bakafwa kabasyomede Jesu, Leza uyoobabusya akubatola a Jesu.

15Lino ndimwaambile majwi aa Mwami mwini. Swebo notusyeede notuyoojanika tuli baumi Mwami aakuboola, takuli kuti tuyoobasaangunina aabo bakafwa pe. 16Kuyooba kuyoba kwakwaambilizya, ajwi lyamungelo mupati, amweembo wa Leza, eelyo Kilisito uyooseluka kuzwa kujulu. Aabo bakasyoma Jesu bayoosaanguna kubuka. 17Lino swebo notusyeede tobaumi tuyootolwa antoomwe ambabo kumakumbi kuti tukaswaangane a Mwami mujulu. Aboobo tuyookkala a Mwami lyoonse. 18Amuyumizyanye amakani aaya.

Currently Selected:

1 Batesalonika 4: Tonga96

Highlight

Copy