1 Batesalonika 3

1Lino nitwakakacilwa kulijata, twakati tucaale tolikke mu Atenesi. 2Nkaako twakatuma Timoti, mukwesu alimwi simulimo wa Leza uukambauka Makani Mabotu aaamba zya Kilisito. Twakamutuma kuti azoomuyumye-yumye akumusimya mulusyomo lwanu, 3kuti kutabi naba omwe uuzungaanyizigwa amapenzi aaya. Alwanu mulizi nobeni kuti Leza ngowakatubambila eezi. 4Nkaambo nitwakali aandinywe, twakamwaambilila limwi kuti tuyooba aamapenzi. Lino mbuli mbomuzi zyacitika ncobeni. 5Ncenciceeco nindakakacilwa kulijata ndakamutuma Timoti kuti ndizibe mbolubede lusyomo lwanu. Ndakali kuyoowa kuti ambweni Saatani, mucengi, wakamucenga, akuti milimo yesu yoonse yakaba yabuyo.

6Pele lino Timoti wasika kuzwa kulindinywe, watuletela mulumbe mubotu wazyalusyomo aluyando lwanu. Walo watwaambila kuti mazuba oonse mulatuyeeya cakukondwa akuyandisisya kuti mutubone, mbubonya mbuli mbotuyandisisya kumubona aswebo. 7Aboobo, nobakwesu, mumause amapenzi eesu oonse, lusyomo lwanu lwatukkazika myoyo. 8Tulapona ncobeni kuti naa kamwiimvwi mu Mwami. 9Ani inga twamulumba buti Leza wesu akaambo kanu? Masimpe, tulikondedwe kapati mu Mwami nkaambo kandinywe. 10Amoyo uumaninide tulakomba masiku asikati kuti tuzoomubone meso ameso tuzooyungizye zibulide mulusyomo lwanu.

11Lino Leza Taata mwini a Mwami wesu Jesu alulamike nzila yesu kuti tuzoosike kulindinywe. 12Mwami ayungizizye-yungizizye kuyandana kwanu aluyando lumwi ndomujisi kubantu boonse mbubonya mbuli luyando lwesu kulindinywe mboluyoovula-vula. 13Nkaako Mwami ayumye-yumye myoyo yanu kuti ilondoke akusalala kuli Leza Taata, ciindi nayoosika antoomwe abasalali bakwe.

Currently Selected:

1 Batesalonika 3: Tonga96

Highlight

Copy