1 Batesalonika 2

Zyamilimo ya Paulu mu Tesalonika

1Mulizi nobeni, nobakwesu, kuti kuswaya kwesu kulindinywe tiikwakali kwabuyo. 2Mbuli mbomuzi bantu baku Filipi bakatupenzya akutusampaula katutanaza kulindinywe. Pele Leza wesu wakatuyumya-yumya kuti tumukambaukile Makani Mabotu aakwe nikuba kuti banji bakali kukazyanya andiswe. 3Nkaambo nzyotumukambaukila tazizwi mukuyanda kuti tumubejele naa kumuyeeyela zibi nikuba kumuunina. 4Pele Leza wakabona kuti tulasyomeka, nkaako wakatupa Makani Mabotu kuti twaakambauke. Aboobo notwaamba tatusoli kubotezya bantu pele tuyanda kubotezya Leza ooyo uulingula myoyo yesu. 5Mbuli mbomuzi tiitwakaboola kulindinywe amajwi akukoba-koba naa amoyo wabutavu. Aawa Leza lwakwe ulizi. 6Alimwi tiitwakali kuyandaula bulemu buzwa kubantu, nikuba kulindinywe nikuba kuli bamwi. 7Mbuli batumwa ba Kilisito nitwakakonzya kumulailila kuti mututeelele. Pele twakalitesya akati kanu, mbuli mukaintu mbwalela bana bakwe. 8Twakamuyanda kapati cakuti twakalilibambilide kwaabana andinywe kutali buyo Makani Mabotu aa Leza, pele abuumi bwesu. 9Nobakwesu, sena tamuyeeyi kuti twakabeleka canguzu? Twakabeleka amaanza eesu masiku asikati kuyoowa kuti tulamupenzya twali kuyanda lugwasyo ciindi nitwakali kumukambaukila Makani Mabotu aa Leza.

10Nywebo a Leza mwini ndinywe bakamboni kuti bukkale bwesu akati kanu bwakaliluleme, bwakanyina kampenda, alimwi bwakali kukkomanisya. 11Mulizi mbotwakamucitila mbuli mwaalumi mbwacitila bana bakwe. 12Twakamukombelezya, akumuyumya-yumya, akumulailila kuti mweende munzila iibotela Leza, uumwiita kuti munjile mubwami amubulemu bwakwe. 13Nkaako ncotulumba Leza lyoonse ncakuti ciindi nimwakatambula Majwi aa Leza aayo ngomwakamvwa kulindiswe, tiimwakaatambula mbuli majwi aabantu buyo, pele mbuli mbwaabede kuti Mmajwi aa Leza ncobeni aabeleka akati kanu nywebo nobasyomi. 14Nkaambo zyakamucitikila nobakwesu, zyakacitika akumbungano zya Leza ku Judiya, kubantu basyoma muli Jesu Kilisito ooko. Bantu banu bakamupenzya mbubonya mbuli basololi ba Bajuda mbubakapenzya basyomi baku Judiya. 15Mbambabo bakajaya Mwami Jesu abasinsimi bakaindi bamane bazoopenzya ndiswe. Bantu aaba tababotezyi Leza pe, alimwi balakazya bantu boonse. 16Kayi balatulesya kuti tukambaukile bamasi kuti bafutulwe. Aboobo baya bulilundikila zinyonyoono, pele lino cisubulo ca Leza cabasikila kumamanino.

Kuyandisiya kwa Paulu kuti akabaswaye alimwi

17Nobakwesu, nitwakamusiya nikuba kuti kakali kaindi kaniini buyo, twakali kuyandisisya kubonana andinywe meso ameso. Nikuba kuti twakalizwide ooko, pele myoyo yesu yakali kulindinywe. 18Twakasoleka kuboola kulindinywe. Mebo, lwangu nde Paulu, ndakali kusoleka kanji-kanji, pele Saatani wakatwiinga-inga. 19Ino ciya kutupa lulangilo, lutangalo, abulumbu bwakuti tukalisumpwide Mwami wesu Jesu aakuboola ninzi? Sena tamuli ndinywe? 20Masimpe, bulemu alutangalo lwesu ndinywe!

Currently Selected:

1 Batesalonika 2: Tonga96

Highlight

Copy