1 Batesalonika 1

1Ndiswe ba Paulu, Siluvano, a Timoti tulamujuzya nobambungano yaku Tesalonika iili njiya Leza Taata a Mwami Jesu Kilisito. Luse aluumuno zibe kulindinywe.

Paulu mbwaakalumbaizya milimo ya Batesalonika

2Tulamulumba Leza lyoonse nkaambo kandinywe nyoonse. Tulamwiibaluka mukukomba kwesu, 3akumuyeeya kuli Leza Taata akaambo kamilimo iitondezya lusyomo aluyando lwanu, ambomulangila Mwami Jesu Kilisito cakukakatila. 4Nobakwesu bayandwa a Leza, tulizi kuti Leza wakamusala, 5Makani Mabotu ngotwakamuletela taali majwi buyo pe. Pele twakaakambauka anguzu amu Muuya Uusalala cakutadonaika mumoyo. Mulizi nobeni mbotwakabede akati kanu nitwakali kumugwasya. 6Lino mwakatobela ciyanza ca Mwami acesu. Mwakatambula makani eesu akati kamapenzi manji, nikuba boobo mwakaatambula alutangalo lupa Muuya Uusalala. 7Aboobo mwakaba citondezyo kubasyomi boonse bamu Masedoniya amu Akeya. 8Kuzwa kulindinywe makani aa Mwami akaakusika kutali ku Masedoniya aku Akeya buyo, pele mpuwo yakuti mulasyoma yakamwaika koonse-koonse, cakuti taakwe ancotweelede kwaamba pe. 9Nkaambo bantu lwabo beni balaamba zyambomwakatutambula nitwakamuswaide ambomwakasiya zyabaleza bapange akusandukila kuli Leza wini-wini uupona kuti mumumanine milimo. 10Lino mulindila kuboola kwa Mwanaakwe kuzwa kujulu, ooyo ngwaakabusya kuzwa kubafu. Ngu Jesu uutuvuna kuzwa kucisubulo cabukali bwa Leza.

Currently Selected:

1 Batesalonika 1: Tonga96

Highlight

Copy