1 Bakolinti 12

Zyazipego zizwa ku Muuya Uusalala

1Lino nobakwesu, ndiyanda kuti muzibisisye zyazipego zizwa ku Muuya Uusalala. 2Mulizi kuti ciindi ncimwakali bakunze, mwakali kusolwedwa amizimo iitambauli munzila ziindene-indene. 3Aboobo ndiyanda kuti muzibe kuti taakwe muntu naba omwe uusolwedwa a Muuya wa Leza waamba kuti, “Jesu asinganyizigwe,” alimwi taakwe uukonzya kwaamba kuti “Jesu Mwami” ccita wasolwedwa a Muuya Uusalala.

4Lino kuli zipego zyaandeene-andeene, pele uuzipa Muuya Uusalala omwe buyo. 5Kuli nzila zyaandene-andeene zyakubeleka, pele Mwami ngotubelekela ngumwi buyo. 6Alimwi kuli nguzu zyaandeene-andeene, pele Leza ngumwi buyo uuzibelesya zyoonse mubantu boonse. 7Muuya ulapa umwi aumwi cipego cakwe kuti muntu ooyo acibelesye mukugwasya boonse. 8Muuya ulapa umwi cipego cakukanana cabusongo. Alimwi kuli umwi Muuya nguwenya buyo ulapa cipego cakulaya bamwi. 9Kuli umwi Muuya ulapa cipego calusyomo lunji kapati. Alimwi kuli umwi Muuya nguwenya buyo ulapa cipego cakuponya. 10Kuli umwi ulapa nguzu zyakucita maleele, aumwi cipego cakukambauka, aumwi cipego cakuziba zizwa ku Muuya Uusalala azizwa kumbi buyo, aumwi cipego cakukanana misyobo iimbi, aumwi cipego cakupandulula misyobo. 11Pele nguwenya Muuya omwe ooyo nguucita zyoonse eezi. Ulaabila muntu umwi aumwi mbuli mbwayanda.

Zyamubili omwe azizo zyawo

12Nkaambo mbubonya mbuli mubili mbuuli omwe, kwamana ulijisi zizo zinji, azizo zyamubili zyoonse nikuba kuti nzinji, mubili ngumwi buyo, mbombuboobo mbwabede Kilisito. 13Toonse twakabbapatizigwa a Muuya omwe kuti tube mubili omwe, nibaba Bajuda, nibaba Bagiliki, nibaba bazike, nibaba baangunukide, nkabela toonse twakatambula Muuya omwe.

14Mubili tuujisi cizo comwe pe, pele nzinji. 15Kuti naa tende lyaamba kuti, “Mbwetali janza nsili cipaanzi camubili,” sena eeco cilacitya kuti litabi cipaanzi camubili? 16Kuti naa akwalo kutwi kwaamba kuti, “Mbwetali liso nsili cipaanzi camubili,” sena eeco cilicitya kuti kutabi cipaanzi camubili? 17Kuti naa mubili woonse niwali liso, ino nitwali kuswiilila buti? Kuti naa mubili niwali kutwi, ino nitwali kununkizya buti? 18Pele mbubonya mbuli mbokubede, Leza wakabamba zizo mumubili, cimwi acimwi wakacibamba mbuli mbwaakasala. 19Ino nikwali kuti zizo zyoonse kacili cizo comwe, ino mubili niwali buti? 20Mbuli mbokubede, kuli zizo zinji-zinji pele mubili ngumwi.

21Lino liso talikonzyi kwaambila janza kuti “Nsikwe makani anduwe!” Awalo mutwe tuukonzyi kwaambila zituta kuti, “Nsikwe makani andinywe!” 22Pele zizo zyamubili eezyo zilangika kuti tazijisi nguzu, azyalo zilayandika kapati. 23Azyalo zizo zyamubili eezyo nzyotuyeeya kuti tazilemekekwi, tulazilemeka kapati. Azyalo zizo zyesu zyuusya nsoni, tulazikwabilila kapati. 24Pele taakwe kaambo kakuti tukwabilile zizo zitausyi nsoni. Leza nguwakanunganya mubili, eelyo wakapa bulemu bupati kwiinda kuzizo zitabweelede. 25Wakacita oobu kuti kutabi kwaandaana mumubili, pele kuti zizo zyoonse zigwasyanye. 26Kuti naa cimwi cizo caciswa, zilaciswa zizonyina zyoonse azyalo. Alimwi cizo cimwi calemekwa zizonyina zyoonse zilasekelela antoomwe.

27Lino nywebo nyoonse muli mubili wa Kilisito. Umwi aumwi akati kanu ncizo cawo. 28Leza mumbungano yakwe wakabikka aaba, kusaanguna batumwa, lwabili basinsimi, lwatatu bamayi, alimwi bamwi mbaasimaleele, bamwi balaponya, bamwi mbagwasyi, bamwi mbeendelezi, bamwi balakonzya kwaamba misyobo iimbi. 29Sena boonse mbatumwa? Sena boonse mbasinsimi? Sena boonse mbaamayi? Sena boonse balacita maleele? 30Sena boonse balijisi zipego zyakuponya? Sena boonse balaamba misyobo iimbi? Sena boonse balakonzya kupandulula misyobo? 31Peepe, pele amubikke myoyo yanu azipego zipati.

Lino ndilamutondezya nzila mbotu kwiinda zyoonse.

Currently Selected:

1 Bakolinti 12: Tonga96

Highlight

Copy