1 Bakolinti 13

Zyaluyando

1Nikuba kuti ndaambaula mumisyobo yabantu, niiba yabangelo, pele nketajisi luyando, inga ndaba mbuli mulangu uulila naa mbuli cibulo cuumwa. 2Alimwi kuti naa ndijisi cipego cabusinsimi, akuziba makani oonse aasisidwe akuba aaluzibo loonse, alimwi kuti naa nkendijisi lusyomo lunji lukonzya kuzyula malundu, pele nketajisi luyando, nsili muntu pe. 3Kuti naa ndaabanya lubono lwangu loonse, nikuba kupa mubili wangu kuti utentwe, pele nketajisi luyando, taakwe ncendijana.

4Luyando lukkazika moyo akweetelela. Luyando talunyonokeli nikuba kulisumpula. 5Talukwe cisapi niiba nduti-luti. Luyando taluzumanani munzila yalo lwini, talunyemi-nyemi nikuba kubikkilila. 6Talubotelwi bantu bacita zitaluleme, pele lulabotelwa muli zyabwini. 7Luyando lulabekelela lyoonse, taluleki kusyoma akulangila lyoonse, lulijisi camba mumapenzi oonse.

8Luyando talumani, pele businsimi buyoosimpa, akwalo kukanana misyobo iimbi kuyooleka, alwalo luzibo luyooloba. 9Nkaambo luzibo lwesu talulondokede, abwalo businsimi bwesu tabulondokede. 10Pele eeco cilondokede caakusika, eeco citalondokede ciyooloba.

11Nindakacili mwana, ndakali kwaamba mbuli mwana, akuyeeya mbuli mwana, alimwi akwiiya mbuli mwana. Pele ciindi nindakakomena, ndakaleka nzila zyabwana. 12Makani ngotubona sunu ali mbuli zintu zyamuciboni-boni cikulu-kulu. Pele kuciindi ciboola tuzoobonana meso ameso. Luzibo ndwejisi sunu nduce, ciindi eeco nzoozibisya mbubonya mbuli Leza mbwandizi kabotu-kabotu. 13Lino kuli zintu zyotatwe zinookkede, lusyomo, lulangilo, aluyando. Pele cipati kwiindilila zyoonse nduyando.

Currently Selected:

1 Bakolinti 13: Tonga96

Highlight

Copy