Yoano 9

Yesu byo abukile muntu wasemenwe na bumpofu

1Yesu byo apichilenga, wamwene muntu wasemenwe na bumpofu. 2Kabiji baana banji babwanga bamwipwizhe amba, “Laabi, ng'anyi walengele mambo, uno nyi, inyi bamusema, byo asemwa na bumpofu?”

3Kumvwa Yesu amba, “Uno muntu kechi walengele mambo ne, nangwa bamusema nabo ne. Waubilwa bumpofu amba mingilo ya Lesa imwekele pe aye. 4Atweba twafwainwa kwingila mingilo ya Aye wantuma, byo jikijipo juba, bufuku bubena kwiya kafwako ukonsha kwingila ne. 5#Mat 5:14; Yoa 8:12Byonkiji pano pantanda amiwa, ne kyeya kya pano pantanda.”

6Pa kupwisha kwamba bino, washipijile mate panshi, wabumbile maloba na mate, ne kumushinga mpofu mateshi pa meso, 7ne kumwambila amba, “Yainga, kowai mu kizhiba kya Shiloma” (kulumbulula ko kuuba amba, “Kutumwa.”)

Ponkapo kaye ne kuya, ne kowa waowele, ne pa kubwela kamone.

8Ponkapo bo aikajilenga naabo, ne aba bamumwenenga kala, byo ajinga wa lulombo, ba ambile amba, “Kechi ye yewa waikalanga na kulomba nyi?” 9Kumvwa bakwabo amba, “I ye.” Kabiji bakwabo amba, “Ine, wamupashatu.” Pakuba mwine wa ambile amba, “Amiwa yami iye.”

10Ponkapo abo ba mwambijile amba, “Nanchi ki ka kimulabisha meso?”

11Kumvwa aye amba, “Awa muntu yebateela amba Yesu, ye waji kubumba maloba, ne kunshinga pa meso, ne kung'ambila amba, yanga ku Shiloma ukowe. Kepo naji ku kowa, kammone ne kumona.”

12Ne abo bamwipwizhe amba, “Nanchi aye uji pi?”

Kumvwa aye amba, “Kechi nayuka ne.”

13Ponkapo abo bamuletele ku Bafaliseo, yenkawa wajinga mpofu kala, 14Ne aja juba jo abumbijilemo maloba Yesu, ne kumulabisha meso anji jajinga ja Sabado. 15Ponkapo Bafaliseo nabo bamwipwizhe moamwena meso. Kumvwa aye wibambijile amba, “Waji kumbiika maloba pa meso, ne kowa na kowa, kammone ne kumona.” 16Kepo bamo Bafaliseo ba ambile amba, “Nanchi awo muntu kechi wa kwa Lesa ne, mambo kechi ulama Sabado ne. Kumvwa bakwabo amba, nanchi muntu ndengamambo akonshe byepi kuuba biyukilo biji bibye?” Ponkapo mwi abo mwabuukile lwabano.

17Kabiji bamwipwizhe awa wajinga mpofu jibiji amba, “Nanchi anweba mumutela amba ka, byo emulabisha meso enu?”

Kumvwa aye amba, “Ye ngauzhi.”

18Pakuba Bayudea kechi baswile amba wajinga mpofu pano kamone ne, poso byo baichile bamusema awa watambwile meso, 19kepo be bepwizhe amba, “Uno ye mwanenu yemuteela amba, wasemenwe na bumpofu nyi? Pakuba pano, nga byo kamone?”

20Kumvwa bansemi bebakumbwile amba, “Twayuka namba uno ye mwanetu wasemenwetu na bumpofu. 21Pakuba pano byo kamone, kechi twayuka ne, nangwa wamulabisha meso anji, kechi twamuyuka ne, mwipuzhai wakoma, mwine usakwiambila!” 22Bamusema ba ambiletu bino, mambo bachiine Bayudea, mambo Bayudea baitabanzhenye kala amba, inge muntu amutele amba, ye Kilishitu, tukamupanga mu shinagoga. 23Onkao mambo bamusema ba ambile amba, “Mwipuzhai wakoma.”

24Ponkapo abo bamwichile jibiji awa wajinga mpofu, ne kumwambila amba, “Tumbijika Lesa,#9:24 Tumbijika Lesa: kino kyambo kyalumbulula amba, “Chipa kya kine ku meso a Lesa amba usa kwamba bukine” kechi kyalumbulula amba tumbijika Lesa pa kyoakuubila ne atweba twayuka namba awo muntu ye ndengamambo.”

25Kumvwa aye amba, “Inge ye ndengamambo akyo kechi nayuka ne, ko kiji kimo kyo nayuka, kala najinga mpofu pakuba pano mbena kumona.”

26Ponkapo abo ba mwambijile amba, “Waji kwimuba byepi? Wimulabisha meso enu byepi?”

27Kumvwa aye wa ambile amba, “Naji kwimubula kala, ne anweba kechi mwaji kumvwa ne, musakila ka kumvwa jibiji? Ne anweba musaka mwikale baana banji babwanga nyi?”

28Ponkapo ke bamutuke ne kumutuka, ne kwamba amba, “Obewa yobe mwananji wabwanga, pakuba atweba twi baana babwanga ba kwa Mosesa. 29Atweba twayuka namba aye Lesa wa ambile ne Mosesa, pakuba a o kechi twayuka ko afuma ne.”

30Aye ye balabishe meso wibambijile amba, “Mama, kine kino kyokya kukumya! Byo mwabula kuyuka ko afuma, bino ye wandabisha meso ami. 31Twayuka namba, aye Lesa kechi umvwa bandengamambo ne, pakuba inge muntu wamwakamwa Lesa, ne kuuba kyaswa muchima wanji, aye ye ye omvwa. 32Kufuma ku ntendekelo ya pano pantanda, kechi kyaumvwanyikilepo amba, muntu walabisha meso a wasemwa na bumpofu ne. 33Inge awo muntu kechi wafuma kwi Lesa ne, kechi wakonsha kuuba kintu ne.”

34Kumvwa abo ba mwambijile amba, “Obewa wasemenwetu mu mambo, kabiji witufunjishe atweba nyi?” Ponkapo bamupangilemo mu shinagoga.

Bumpofu bwa ku mupashi

35Yesu wa umvwine amba, bamupangamo, ne kumutaana wamutaine, wamwipwizhe amba, “Anweba mwa mwitabila Mwana Lesa nyi?”

36Kumvwa aye wamukumbwile amba, “Nanchi ye ng'anyi, Nkambo, namwitabile?”

37Kumvwa Yesu wamwambijile amba, Mwamumona kala, kabiji i ye ye mwamba nanji.

38Kumvwa aye wa ambile amba, “Nkambo, naitabila!” Kamupopwele ne kumupopwela.

39Ne Yesu wa ambile amba, “Naishila kuchiba mambo pano pantanda, amba babula kumona, bamone, ne aba bamona, baluke ke bampofu.”

40Ne bamo Bafaliseo bo ajinga naabo ba umvwine bino byambo, ne kwamba ba mwambijile amba, “Nanchi ne atweba twi bampofu nyi?”

41Kumvwa Yesu wibambijile amba, “Inge mwajinga bampofu, inge kechi muji na mambo ne, pakuba pano byo mwamba amba tumona, kwapwa! Mukiji na mambo ne pano.”

Currently Selected:

Yoano 9: KNTP

Highlight

Copy