Yoano 8
8
Mwanamukazhi wakwachilwe mu bukende
1 Yesu wayile ku Mutumba wa maolivi. 2Lukelokelo wabwelele mu nzubo ya Lesa. Ponkapo ne bantu bonse bamupwijile, ne aye waikajile panshi na kwibafunjisha. 3Banembeshi ne bafaliseo baletele mwanamukazhi ye bakwachile na bukende, ne kumwimika mukachi ka jibumba. 4Bamwambijile amba, “Mufunjishi, uno mwanamukazhi wakwatwa na bukende. 5#Levi 20:10; Mpitu 22:22-24Pano mu Mizhilo, Mosesa witukambizhe amba, Ba bibye mwibase mabwe. Pakuba anweba nanchi amba ka?”
6Ba ambile bibye na kumweseka amba, tumone mwa kumushiina, pakuba Yesu wanyeng'amine ne kunemba panshi na munwe wanji.
7Pakuba byo bamukosejile na kumwipuzha, aye wainukile, ne kwibambila amba, “Wabula kulengapo mambo mwi anweba, atendekelepo kumwasa jibwe.”
8Ponkapo aye wanyeng'amine jibiji, ne kunemba panshi. 9Ne abo, byo baumvwine byo byo, batatwijile ku mukulumpe, kasa balupuka umo umo kufikizha ne ku wapeleleko. Ne Yesu washajile bunke bwanji, ne mwanamukazhi kasa aimana mukachi. 10Ponkapo Yesu wainukile ne kumwambila amba, “Obewa mwanamukazhi, bakukushiina baji pi? Nanchi kafwako wa kukuzhachisha nenyi?”
11Kumvwa aye amba, “Mwane nangwa umotu ne, Nkambo.”
Kumvwa Yesu amba, “Ne amiwa kechi nkuzhachishe ne. Yanga, bino kechi ukabwezhepo kulenga mambo ne.” #8:11 Ma buku amo a kigiliki kechi muji maveleshi kufuma mu veleshi 1 kufika ku veleshi 11 ne.
Yesu ye kyeya kya pano pantanda
12 #
Mat 5:14; Yoa 9:5 Ponkapo Yesu wibambijile jibiji, amba, “Amiwa ne kyeya kya pano pantanda, awa undondela amiwa kechi ukenda mu mfishi ne, ukekala na kyeya kya bumi.”
13 #
Yoa 5:31
Kepo Bafaliseo amba, “Mubena kwishimuna anweba bene, ne kushimuna kwenu kechi kwa kine ne.”
14Kumvwa Yesu wibambijile amba, “Nangwa mbena kwishimuna amiwa mwine, kushimuna kwami ko kwa kine, ke pakuba nayuka ne konafuma, ne kongya, pakuba anweba kechi mwayuka konafumine ne, nangwa kongya ne. 15Anweba muchibila mambo mu buntunshi, amiwa kechi nchiba mambo a muntu nangwa umotu ne. 16Pakuba nangwa nchiba mambo amiwa, mo nchibila momwa kine, mambo kechi nji bunke ne, mambo bataata bantumine baji ne amiwa. 17#Mpitu 19:15Kine ne mu mizhilo yenu kyanembwa amba, kushimuna kwa bantu babiji ko kwa kine. 18Amiwa mbena kwishimuna amiwa mwine, ne bataata bantumine nabo banshimuna.”
19Ponkapo ba mwambijile amba, “Nanchi bashenu baji pi?”
Kumvwa Yesu amba, “Kechi mwangyuka amiwa ne, nangwa kwibayuka bataata ne, inge mwaji kungyuka amiwa, inge mwibayuka ne bataata.”
20Bino byambo wibyambile mo balambwila, byo afunjishenga mu nzubo ya Lesa, byonkabo kafwako wamukwachile ne, mambo kimye kyanji kyaji kikyangye kufika.
Akwa kongya amiwa, anweba kechi mwakonsha kuyako ne
21Ponkapo Yesu wibambijile jibiji amba, “Amiwa nkafumapo, kabiji mukankeba, bino mukafwa mu mambo enu. Akwa kongya amiwa, anweba kechi mwakonsha kuyako ne.”
22Ponkapo Bayudea batatwile kwamba amba, “Nanchi aye usakwiipaya mwine nyi, byo a amba amba, kongya amiwa, anweba kechi mwakonsha kufikako ne?”
23Kumvwa aye wibambijile amba, “Anweba mwi bapanshi, amiwa nafumine kwiulu anweba mwi ba pano pantanda, amiwa kechi ne wa pano pantanda ne. 24Onkao mambo naji kwimwambila namba, mukafwa mu mambo enu inge mwabula kungitabila amiwa amba, yami iye, mukafwa mu mambo enu.”
25Kepo abo bamwambijile amba, “Nanchi anweba mwi bang'anyi?”
Ne Yesu wibambijile amba, “Byonka byonkelwa kwimubula kutatwila ku kimye kitanshi. 26Nji na byavula bya kwimwambila ne bya kwimuzhachisha. Pakuba aye wantuma ye wa kine, ne byonka byo naumvwine kwi aye, byo byo ng'amba kuba pano pantanda.”
27Abo kechi baumvwishishe amba, ubena kwamba na mambo a aye Shanji ne. 28Ponkapo Yesu wibambijile amba, “Byo mukemika Mwana Muntu, po po mukangyuka amiwa amba, yami iye, ne byo mbula kwiubila kintu amiwa mwine ne, pakuba mwamfunjishishe Bataata, momo ng'ambila bino bintu. 29Ne aye wantuma uji ne amiwa, aye kechi wandeka bunke ne, mambo mbena kuuba bya kumutokesha pa muchima moba onse.”
30Byo a ambile bino bintu, bavula bamwitabijile.
Bukine bukemukasulula
31Ponkapo Yesu wa ambijile Bayudea bamwitabijile amba, “Anweba inge mwikajijile mu mambo ami, abya kine mwi baana bami babwanga, 32ne anweba mukebuyuka bukine, ne abo bukine bukemukasulula ke baana ba bene.”
33 #
Mat 3:9; Lu 3:8 Kumvwa abo bamwambijile amba, “Atweba twi ba mukisemi kya kwa Abulahama, tukyangye kunonkwapo buzha ku muntu nangwa umotu ne. Anweba ki ka kyo mwa ambila amba, mukekala ke baana ba bene?”
34Kumvwa Yesu amba, “Kine, kine nemwambila namba, bonse balenga mambo bo bazha ba bundengamambo. 35Byonkabo muzha kechi wikala myaka mu nzubo ne, pakuba mwana ye wikala mu nzubo myaka. 36Byonkabyo inge aye Mwana wimukasulula, abya mukekala bakasuluka kine. 37Nayuka namba, mwi ba mukisemi kya kwa Abulahama, bino mubena kusaka kungipaya mambo, mambo ami kechi aji na mpunzha mu michima yenu ne. 38Amiwa ng'amba byo namwene kwi bataata, ne anweba muba byo mwamwene kwi shenu.”
39Kumvwa abo ba mwambijile amba, “Abulahama ye shetu.”
Ne Yesu wibambijile amba, “Inge mwajinga baana ba kwa Abulahama, inge mubena ku bamingilo ya Abulahama. 40Pakuba pano ke musake kungipaya, amiwa muntu wimubuula bya kine, byo naumvwine kwi Lesa. Abulahama kechi waubile bya bibye ne! 41Anweba muba mingilo ya shenu.”
Kumvwa abo ba mwambijile amba, “Atweba kechi twasemenwe mu bukende ne, tujitu na Shetu umo, yenka Lesa.”
42Kumvwa Yesu wibambijile amba, “Inge Lesa wajinga Shenu, inge mwantemwa amiwa, mambo amiwa nafumine kwi Lesa, naiya ne pano. Kabiji kechi neishijiiletu amiwa mwine ne, bino aye ye wantumine. 43Mambo ka o mubujila kumvwisha byambo byami? Mambo anweba kechi mwakonsha kutambula mambo ami ne. 44Anweba mwi ba kwa shenu Diabola, kabiji musaka kulondela byo asaka aye shenu. Aye wajinga mbanzhi kufuma ku ntendekelo, ne kwikala mu bukine ne, mambo bukine kechi buji mwi aye ne. Byo a amba bubela, wamba bya kwanji mwine. Mambo ye wa bubela, ye shanja bubela. 45Pakuba amiwa naamba bya kine, anweba kungitabila ne. 46Nanchi ing'anyi wa mwi anweba wanzhachisha na mambo? Kabiji inge ng'amba bya kine, mambo ka o mwabujila kungitabila? 47Aye wa kwa Lesa umvwa byambo bya Lesa. Onkao mambo anweba kechi mwibyumvwa ne, mambo kechi mwi ba kwa Lesa ne.”
48Kumvwa Bayudea amba, “Nanchi twa amba bulongo namba, anweba mwi mwina Samaliya, kabiji muji na mudemona.”
49Kumvwa Yesu amba, “Amiwa kechi nji na mudemona ne, pakuba amiwa nebanemeka bataata, ne anweba mwampelula. 50Bino kechi nkeba lukumo lwami amiwa mwine ne. Ko aji umo unkebelalo, ye uchiba mambo. 51Kine, kine nemwambila namba, umvwe muntu walama mambo ami, kechi ukamona lufu myaka ne myaka nangwa pacheche ne.”
52Kumvwa Bayudea ba mwambijile amba, “Pano twayuka namba muji na mudemona! Abulahama wafwile, ne bangauzhi nabo, pakuba anweba amba, umvwe muntu walama mambo ami kechi ukamona lufu myaka ne myaka nangwa pacheche ne. 53Nanchi anweba mwakila mushakulu wetu Abulahama nyi? Aye wafwile ne bangauzhi nabo bafwile, nanchi anweba bene mwi languluka amba mwi ng'anyi?”
54Kumvwa Yesu amba, “Umvwe amiwa netumbijika amiwa mwine, abya lukumo lwami lo lwatu. Ko baji bantumbijika, abo bataata bo mwamba amba, ye Lesa wenu. 55Kechi mwibayuka ne, pakuba amiwa nebayuka. Kabiji inge ng'ambe namba, kechi nebayuka ne, abya nsakwikala ke wa bubela pamo ne anweba. Pakuba amiwa nebayuka, ne mambo abo nealama. 56Shenu Abulahama wasekejile pa kuketekela kumona juba ja kwiya kwami, ne kumona wijimwene, ne kusekela wasekejile.”
57Ponkapo Bayudea bamwambijile amba, “Anweba mukyangye kufikizha myaka makumi atanu, Abulahama mwamumwene nyi?”
58Kumvwa Yesu wibambijile amba, “Kine, kine nemwambila namba, Abulahama byo ajinga ukyangye, amiwa kasa njipo.”
59Ponkapo batolele mabwe amba bamwase, pakuba Yesu wifiile, ne kulupuka walupukile mu nzubo ya Lesa.
Currently Selected:
Yoano 8: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
