Yoano 7
7
Yesu ne balongo banji
1Bino byo byapwile Yesu wapitang'enenga mu Ngalilea, mambo kechi wasakile kupitang'ana mu Yudea ne, mambo Bayudea basakilenga kumwipaya. 2#Levi 23:34; Mpitu 16:13Kabiji kijiilo kya Bayudea kya mimba kyajinga pepi, 3kepo balongo banji ba mwambijile amba, “Fumai kuno, muyenga ku Yudea, namba baana benu babwanga nabo bakamone mingilo yenu yo muba. 4Mambo kafwako muntu uuba kintu kumbaji, mwine kasa asaka kuyukanyikwa patoka ne. Byo mwibyuba bino, kemweshai anweba bene ku bantu amba muyukanyikwe ntanda yonse!” 5Mambo ne balongo banji nabo kechi bamwitabijile ne.
6Ponkapo Yesu wibambijile amba, “Kimye kyami kikyangye kufika, pakuba bimye byonse bimuwamina anweba. 7Ba pano pantanda kechi bakonsha kwimushikwa anweba ne, pakuba amiwa banshikwa, mambo mbena kwibashiina namba, mingilo yabo yatama. 8Anweba yainga ku kijiilo. Amiwa kechi ngye katataaka ku kyo kino kijiilo ne, mambo kimye kyami kikyangye kufika.” 9Byo ebambijile bino, aye washajile monka mu Ngalilea.
Yesu ku Kijiilo kya mimba
10Kabiji balongo banji byo bayile ku kijiilo, ne aye naye wayile konka, bino kechi ku meso a bantu ne, wayile kya bufyamfya. 11Bayudea bamukebelenga ku kijiilo amba, “Nanchi aye uji pi?”
12Kabiji mu mabumba mwajinga kunyinyita kwavula kwa kumunyinyita aye, bamo ba ambilenga amba, “Ye muntu wawama.” Kabiji bakwabo nabo amba, “Ubepaikatu bantu.” 13Kafwako wa ambilenga patoka pa mambo a aye ne, mambo a kuchiina Bayudea.
14Pakachi ka kijiilo Yesu wayile mu nzubo ya Lesa, kafunjishe ne kufunjisha. 15Kepo Bayudea bakuminye amba, “Nanchi uno wayuka byepi mabuku, kasa abujile kwiafunda?”
16Kumvwa Yesu wibakumbwile amba, “Kufunjisha kwami kechi kwamitu ne, nanchi kwa aye wantuma. 17Inge muntu waswa kuuba kyaswa muchima wanji, usakuyuka kufunjisha kwami, kana kwa Lesa, nangwa ng'ambila mu luusa lwami amiwa mwine. 18Aye wambila mu luusa lwanji mwine ukeba lukumo lwanji mwine. Pakuba awa ukeba lukumo lwa yewa wamutuma ye wa kine, kechi uji na bujimbijimbi ne. 19Nanchi Mosesa kechi wimupele mizhilo nenyi? Bino kechi pajipo nangwa umo wa mwi anweba ulama mizhilo ne. Nanchi mambo ka kyomukebela kungipaya?”
20Kumvwa jibumba ja bantu amba, “Muji na mudemona! Ng'anyi ukeba kwimwipaya?”
21Kumvwa Yesu wibambijile amba, “Naingijile mwingilo umo, ne anweba bonse mwakuminye. 22#Levi 12:3; Nte 17:10 Mosesa wimupele kisela kya mukanda, (bino kechi kyokya kwa Mosesa ne, kya bashakulu) kabiji ne anweba mu juba ja Sabado mutwezha muntu mu kisela kya mukanda. 23#Yoa 5:9Nanchi inge muntu utambula kisela kya mukanda mu juba ja Sabado kuchiina amba, muzhilo wa Mosesa wakazhilululwa, anweba mwanzhingijila ka amiwa byo namubukile muntu ke mutuntulu mu juba ja Sabado? 24Kilekai kuchibila mambo ku bintu bimweka, chibilai mambo monka mo aolokela.”
A uno ye Kilishitu nyi?
25Ponkapo bamo bena Yelusalema ba ambile amba, “Nanchi uno kechi i ye ye bakeba kwipaya nenyi? 26Talai! Ubena kwamba patoka, kabiji kechi bamwambila kintu nangwa kimo ne! Bandamakyalo bayukisha amba, kine uno ye Kilishitu nyi? 27Pakuba uno twayuka ko afuma, bino Kilishitu byo akeya kafwako ukayuka ko afuma ne.”
28Ponkapo Yesu wabijikile mu nzubo ya Lesa, byo afunjishenga amba, “Anweba kine mwangyuka, ne konafuma nako mwayukako nyi? Mambo kechi naiya na luusa lwami amiwa mwine ne. Pakuba wantuma ye wa kine, ye mwabula kuyuka anweba, 29amiwa yami namuyuka, mambo nafuma ko aji, ne aye ye wantuma.”
30Kepo basakile kumukwata, bino kafwako wamukwachile ne, mambo kimye kyanji kyaji kikyangye kufika. 31Ne bavula bamu jibumba bamwitabijile, ba ambilenga amba, “Nanchi pa kukeya Kilishitu, ukoba biyukilo byakila mu kuvula kukila bino byo auba uno muntu nyi?”
Byo basakile kumukwata Yesu
32Ne bafaliseo ba umvwine jibumba sa jimunyinyita na bino bintu, kepo bang'anga bakatampe ne bafaliseo batumine bakalama amba bakamukwate. 33Ponkapo Yesu wibambijile amba, “Nji ne anweba ka kimye kacheche, kabiji nkaya kwi aye wantuma. 34Mukankeba, bino kechi mukantaana ne, kabiji anweba kechi mwakonsha kuya akwa konkekala ne.”
35Ponkapo Bayudea beipwezhe bene na bene amba, “Nanchi uno usakuya kwepi byo tukabula kumutaana? Usakuya kuboba bapalang'ena mu Bagiliki, na kufunjisha Bagiliki nyi? 36Ano mambo ayila mu ka byo a amba amba, ‘Mukankeba bino kechi mukantaana ne’? Kabiji amba, kechi mwakonsha kuya akwa konkekala ne?”
Mikola ya mema a bumi
37 #
Levi 23:36
Mu juba japeleleko, jo jajinga jikatampe ja kijiilo, Yesu waimene ne kubijika amba, “Inge muntu waumvwa kilaka, eye kwi amiwa atome. 38#Ezi 47:1; Zeka 14:8Aye waitabila mwi amiwa, monka mwa ambila kinembelo, munda mwanji mukafumanga mikola ya mema a bumi.” 39Pakuba byo a ambile bino watazhizhe ku Mupashi ye bakatumbula aba bamwitabila. Mambo Mupashi waji ukyangye kupanwa, mambo Yesu waji ukyangye kutumbijikwa.
Lwabano mu bantu
40Onkao mambo bamo bamu jibumba byo ba umvwine bino byambo, ba ambile amba, “Kine uno ye i ye awa ngauzhi!” 41Bakwabo nabo amba, “Uno ye Kilishitu!” Pakuba bamo nabo amba, “Leka! Kilishitu afume mu Ngalilea? 42#2 Sam 7:12; Mika 5:2Kinembelo kyatongola amba, Kilishitu ye wa mukisemi kya Davida, ukasemwa mu Betelema muzhi wa Davida.”
43Kepo kwabukile lupata mu jibumba na mambo a aye. 44Ne bamo basakile kumukwata, bino kafwako wamukwachile ne.
Kubula kwitabila kwa ba ntangi ba Bayudea
45Ponkapo bakalama babwelele ku bang'anga bakatampe ne Bafaliseo, ne abo bebambijile amba, “Mambo ka o mwabujile kumuleeta?”
46Kumvwa bakalama amba, “Nangwatu kufuma kukala kene kafwako muntu wa ambile byo amba uno muntu ne!”
47Kumvwa Bafaliseo bebambijile amba, “Nanchi ne anweba wimubepaika nyi? 48Pajipo ndamakyalo nangwa Mufaliseo wamwitabila nyi? 49Jino jibumba jabula kuyuka mizhilo jafingwa!”
50 #
Yoa 3:1,2 Kumvwa Nikodema yenkawa waishile kwi Yesu patanshi, umo wa mwi abo wibambijile amba, 51“Nanchi mizhilo yetu izhachisha muntu kwakubula ne kumumvwa aye mwine, ne kuyuka byo auba nenyi?”
52Kumvwa abo ba mwambijile amba, “Olo! Nanchi ne anweba mwi mwina Ngalilea nyi? Kebai, muyuke amba, kafwako ngauzhi ufuma mu Ngalilea ne.”
53 Ponkapo bonse bapalang'ene ne kuya kwabo. # 7:53 Ma buku amo amu kigiliki kechi aji na veleshi 53 ne.
Currently Selected:
Yoano 7: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
