Yoano 10

Kishimpi kya kafunga wawama

1 “Kine, kine, nemwambila namba, awa ubula kutwelela pa kibelo mu kipaka kya mikooko, pakuba ukanjijila pangi ye ngivi kabiji ye kapondo. 2Pakuba aye utwelela pa kibelo, ye kafunga wa mikooko. 3Aye, bamushinkwilako ku ulama kibelo, ne mikooko yumvwa jiwi janji, kabiji wiita pa jizhina mikooko yanji mwine, ne kwiitangijila pangye. 4Pa kwiilupula pangye yonse yanji mwine, aye wiitangijila, ne ayo mikooko imulondela, mambo yayuka jiwi janji. 5Pakuba mwenyi kechi imulondele ne, isa kumunyema mambo kechi yayuka jiwi ja mwenyi ne.”

6Yesu wibambijile kino kishimpi, pakuba abo kechi bebyumvwine mo byayila ne.

7Kepo Yesu ebambijile jibiji amba “Kine, kine nemwambila namba, amiwa yami kibelo kya mikooko. 8Bonse batangijilepo kala bo bangivi ne tupondo, pakuba mikooko kechi ibomvwine ne. 9Amiwa yami kibelo. Inge muntu watwelela pe amiwa ukapuluka, kabiji ukatwelanga ne kulupuka, kasa amona bya kuja. 10Ngivi kechi wiyatu ne, poso kwiba, ne kwipaya, ne konauna. Amiwa naishile namba bamone bumi, kabiji namba bekale naabo bwavula.

11“Amiwa ne kafunga wawama, kafunga wawama welela mikooko mweo wanji. 12Pakuba ye bafweta, kechi kafunga ne, ne mikooko kechi yanji ne, pa kumona musuka kasa eya, wiileka mikooko, ne kunyema, ne musuka wiikwata, ne kwiipalang'anya. 13Unyema mambo ye wa mfweto, kechi utesha muchima ku mikooko ne. 14#Mat 11:27; Lu 10:22Amiwa ne kafunga wawama, bami nebayuka, ne bami nabo bangyuka. 15Monka mwangyukila bataata amiwa, ne amiwa nebayuka bataata, ne amiwa neyelela mikooko mweo wami. 16Kabiji mikooko ikwabo nji nayo, kechi ya ku kyo kino kipaka ne. Nayo amiwa nafwainwa kwiileta, ne ayo ikomvwa jiwi jami, kabiji ikekala ke kisaka kimo, ne kafunga umo.

17“Kyo bantemenwa bataata, mambo amiwa ngela mweo wami, namba, nkamutambule jibiji. 18Kafwako ung'angataye ne, pakuba na mwela amiwa mwine. Nji na luusa lwa kumwela, kabiji nji na luusa lwa kumutambula jibiji. Uno ye mukambizho ye bankambizhizhe bataata.”

19Ponkapo mu Bayudea mwabuukile lwabano jibiji na mambo a bino byambo. 20Ne bavula ba ambile amba, “Uji na mudemona! Wakonya! Mumumvwina ka?” 21Bakwabo amba, “Bino kechi byambo bya wanonkwa ku mudemona ne! Nanchi mudemona akonshe kulabisha meso a mpofu nyi?”

Yesu byo bamukaine ku Bayudea

22Ku Yelusalema mu kimye kya mashika kwajinga kijiilo kya Nzhijikisho. 23Ne aye Yesu wapitang'enenga mu nzubo ya Lesa mu bukonde bwa Solomone. 24Ne Bayudea bamuzhokolokele ne kumwipuzha amba, “Nanchi moba anga o uketuzhinaukishanga? Tubujishai kya kine, yenu Kilishitu nyi?”

25Kumvwa Yesu wibakumbwile amba, “Nemubujile, ne anweba kechi mwaitaba ne. Mingilo yo nguba mu jizhina ja bataata yo inshimuna. 26Pakuba anweba kechi mwaitaba ne, mambo anweba kechi mwi mikooko yami ne. 27Mikooko yami yumvwa jiwi jami, ne amiwa neiyuka, ne ayo indondela. 28Ne amiwa neipa bumi bwa myaka, ne ayo kechi ikonaike myaka yonse nangwa pachechetu ne. Kabiji kafwako nangwa umo ukeinsompola mu kuboko kwami ne. 29Bataata beimpele bakila bonse, kafwako wakonsha kwiisompola mukuboko kwa bataata ne. 30Amiwa ne bataata twi umo.”

31Ponkapo Bayudea batolele jibiji mabwe amba bamwase. 32Ne Yesu wibambijile amba, “Mingilo yavula yawama yo nemumwesheshe yafumine kwi bataata, nanchi ye wepi ye mungashila mabwe?”

33 # Levi 24:16 Bayudea bamukumbwile amba, “Kechi twimwashila mambo a mwingilo wawama ne, twimwashila mambo a kumuba mwenga Lesa kabiji mambo obewa mwine muntutu, wipa bu Lesa.”

34 # Sala 82:6 Kumvwa Yesu wibambijile amba, “Nanchi mu buku wenu wa mizhilo kechi kyanembwa amba, ‘Anweba mwi ba lesa nenyi?’ 35Inge aye wi bateela bo bafikizhizha mambo a Lesa amba, ba lesa (ne kinembelo kechi kyayuka kuzhilulwa ne.) 36Anweba munena ye bazhijika, watumwa kwi bataata pano pantanda amba, wamuuba mwenga Lesa byo najikwamba namba, amiwa ne Mwana Lesa nyi? 37Inge kechi nguba mingilo ya bataata ne, kechi mungitabile ne. 38Kabiji inge neyuba nangwa kechi mwangitabila amiwa ne, nanchi itabilaiko mingilo yami, namba muyukishetu amba, bataata baji mwi amiwa, ne amiwa nji mwi bataata.”

39Ponkapo ke basake kumukwata jibiji, pakuba aye wibaposomokele mu maboko abo.

40 # Yoa 1:28 Ponkapo wayile jibiji ku bushiya bwa Yodano, kwabatizhilenga Yoano kala, ko koakekajile. 41Ne bavula bamupwijile ne kwamba amba, “Yoano kine kechi waubile kiyukilo nangwa kimo ne, pakuba byonse bya ambile Yoano bya ye uno muntu byaji bya kine.” 42Ne bavula bamwitabijile konkakwa.

Currently Selected:

Yoano 10: KNTP

Highlight

Copy