Yoano 11

Lufu lwa kwa Lazalasa

1 # Lu 10:38,39 Kabiji kwajinga muntu wakolelwenga, jizhina janji Lazalasa, mwina Betani, muzhi mwaikalanga Maliya ne Maata mulongo wanji. 2#Yoa 12:3Maliya yenkawa washingile Nkambo manyi, ne kumushiimuna ku maulu na nsuki yanji, ye mwina mulongo wanji Lazalasa wakolelwenga. 3Ponkapo banyenga yanji batumine jiwi kwi aye Yesu amba “Nkambo, awa ye mwatemwisha ubena kukolwa.”

4Yesu byo a umvwine byo byo wa ambile amba, “Bino bikola kechi bya ku lufu ne, byo bya lukumo lwa Lesa, amba Mwana Lesa atumbijikilwemo.”

5Yesu watemenwe Maata ne Maliya mulongo wanji ne Lazalasa. 6Byo a umvwine amba Lazalasa wakolwa, waikajile konka ko ajinga moba abiji. 7Kabiji palutwe wa ambijile baana banji babwanga amba, “Twayai tubwele ku Yudea.”

8Baana banji babwanga ba mwambijile amba “Laabi, katataaka Bayudea basakile kwimwasa mabwe, kabiji ke musake kubwelako jibiji?”

9Yesu wibakumbwile amba, “Nanchi kechi muji ma awala jikumi na abiji mu juba jimo nenyi? Inge muntu kapitang'ane mute, kechi wituntula ne, mambo umona kyeya kya pano pantanda. 10Pakuba inge muntu kapitang'ane bufuku wituntula, mambo mwi aye kechi muji kyeya ne.”

11Kabiji byo apwishishe kwamba bino, wibambijile amba, “Mukwetu Lazalasa walaala tulo, pakuba amiwa ngya, nkamubushe mutulo.”

12Baana banji babwanga ba ambile amba, “Nkambo, inge walaala tulo, usakukosa.”

13Nanchi Yesu wikitwajile mukuuba amba Lazalasa wafwa. Pakuba abo amba wanena tulo twa kukokoloka. 14Ponkapo Yesu wibambijile patoka amba, “Lazalasa wafwa, 15bino amiwa nasekela byo nabujilweko na mambo a anweba, namba mwitabile. Nangwa byonkabyo twayai ko aji.”

16Ponkapo Tomase yebatela amba Didimasa,#11:16 Didimasa: ko kuba amba mapasa wa ambijile bakwabo baana babwanga amba, “Ne atweba twayai tukafwe nanji!”

Yesu ye lusanguko ne bumi

17Yesu byo afikileko, wamutaine sa aji mu kilende moba ke ana. 18Bino ku Betani kwajinga kwipi na ku Yelusalema, kwaji misinso jikumi ne itanu, 19ne bavula Bayudea baishile kwi Maata ne Maliya, na kwibajijishapo mulongo wabo. 20Ponkapo Maata, byo a umvwine amba Yesu ubena kwiya, wayile na kumutundaila, pakuba Maliya washajile mu nzubo. 21Maata wamwambijile Yesu amba, “Nkambo inge mwajinga kuno, mulongo wetu inge kechi wafwile ne. 22Bino nayuka namba nangwatu pano Lesa usa kwimupa kyonka kyo musa kumulomba.”

23Kumvwa Yesu wamwambijile amba, “Mulongo wenu ukasanguka.”

24Ne Maata wamwambijile amba, “Nayuka byo akasanguka mu lusanguko lwa mu juba jikapelaako.”

25Kumvwa Yesu wamwambijile amba, “Amiwa yami lusanguko ne bumi. Awa wangitabila amiwa, nangwa afwe, ukamona bumi, 26ne bonse baji na bumi ne kungitabila amiwa kechi bakafwe myaka yonse nangwa pacheche ne. Wibitabila bino nyi?”

27Aye wa mukumbwile amba, “Ee, Nkambo! Amiwa naitaba namba, anweba yenu Kilishitu, Mwana Lesa, yenka walayilwe amba ukeya pano pantanda.”

Yesu wajijile

28Byo a ambiletu byo byo, wayile na kwita mulongo wanji Maliya kwa bunke, ne kumwambila amba, “Mufunjishi waiya, ubena kukwita.”

29Ponkapo pa kumvwatu byo byo, waimene bukiji, ne kuya konka ko ajinga. 30(Yesu waji ukyangye kufika mu muzhi, wakijingatu konkakwa kwamutaine Maata.) 31Ponkapo Bayudea bajinga nanji mu nzubo na kumujijishapo, byo bamwene Maliya waimana bukiji ne kulupuka, ke bamulondele, sa balanguluka amba, ubena kuya ku kilende na kukajijilako. 32Ponkapo Maliya, byo afikile kwi Yesu, pa kumumona, waponene ku maulu anji, ne kumwambila amba, “Nkambo, inge mwajinga kuno, mulongo wetu inge kechi wafwile ne!”

33Ne Yesu byo a mumwene kasa ajila, kabiji ne Bayudea bo aishilenga naabo nabo kasa bajila, ne muchima wa mupile munda, ne aye kumvwa bulongo ne. 34Kepo aipwizhe amba, “Nanchi mwamutula kwepi?”

Kumvwa abo ba mukumbwile amba, “Nkambo, twayai mukamone.”

35Yesu kajile ne mipolo, 36Ponkapo Bayudea ba ambile amba, “Talai, byo amutemwisha!” 37Kumvwa bamo ba ambile amba, “Lelo uno walabishe meso a mpofu, kechi wakonsheshe kukanya uno muntu kufwa nenyi?”

Kusanguka kwa Lazalasa

38Ponkapo Yesu kasa afichishiwa ku muchima, kaiye ne kwiya ku kilende, kya jiyengo kyo babikileko jibwe. 39Ne Yesu wakambiizhe amba, “Fumyaiko jibwe!”

Kumvwa Maata, nyenga ya wafwa, wamwambijile amba “Nkambo, pano kanunke. Mambo poafwijile papita pano ke moba ana!”

40Kumvwa Yesu wamwambijile amba, “Amiwa kechi naji kwimwambila namba, umvwe mwitabile, musakumona lukumo lwa Lesa nenyi?”

41Kepo bafumisheko jibwe. Ponkapo Yesu wainwine meso anji, ne kwamba amba, “Taata, nemusanchila byo mwang'umvwa. 42Kabiji nayuka byo mukelwa kung'umvwa, pakuba na mambo a bantu baimana pano ko kwamba ko naamba namba betabile byo mwantuma.” 43Byo a ambile bino, wabijikile na jiwi jikatampe amba, “Lazalasa, lupukaimo!”

44Ponkapo aye wafwile walupukilemo kasa akaswa ku maboko ne ku maulu na bisapi bya lufu, ne pa meso napo pakashilwe na kitambala. Ne Yesu wibambijile amba, “Mukasululai, ayenga.”

45Ponkapo Bayudea bavula, bonkaba baishile kwi Maliya, byo bamwene byo aubile Yesu bamwitabijile. 46Pakuba bamo bayile ku Bafaliseo, na kwibabula byaubile Yesu. 47Ponkapo bang'anga bakatampe ne Bafaliseo baikajile kije, ne kwamba amba, “Tube byepi? Mambo uno muntu ubena kuba biyukilo byavula! 48Inge twamulekatu byonkabye, bantu bonse bakamwitabila, ne bena Loma basa kukeya na kwitwangata ntanda yetu ne kisaka kyetu pamo!”

49Pakuba umo wa mwi abo, jizhina janji Kaifasa, ye wajinga ng'anga mukatampe mu yewa mwaka, aye wibambijile amba, “Anweba kafwako ne kyo mwayuka ne! 50Kechi mwayuka amba anweba kimuwamina, amba muntu umo afwile bantu, ne kisaka kyonse kechi kyonaike ne” 51Abino byo a ambile kechi wibyambile mwine ne, pakuba byo ajinga ng'anga mukatampe mu yewa mwaka, waawile na Mupashi mambo a Yesu byo akafwila kyokya kisaka, 52kabiji kechi kyonkakyatu kisaka ne, poso akapwizhe pamo baana ba Lesa bapalang'ena monse, monse.

53Kabiji kufuma ku joja juba baumvwang'ene mwa kumwipayila Yesu. 54Onkao mambo Yesu kechi wapitang'enenga patoka mu Bayudea ne, wafumineko kaye mumande pepi na mungye, ku muzhi yebateela amba, Efelaimu waikele konka na baana banji babwanga.

55Kijiilo kya Bayudea kya Lupitailo kyajinga pepi, ne bavula bamu mande bayile ku Yelusalema, kijiilo kasa kikyangye, betokesheshe jimo abo bene. 56Ponkapo bamukebelenga Yesu, ne kwambang'ana abo bene na bene byo baimene mu nzubo ya Lesa amba, “Mwalanguluka byepi? Kechi akeye ku kijiilo nenyi?” 57Byonkabyo bang'anga bakatampe ne Bafaliseo bakambizhizhe kala amba, inge muntu wayuka ko aji, etubuule tukamukwate.

Currently Selected:

Yoano 11: KNTP

Highlight

Copy