Yoano 12

Yesu byo bamushingile manyi ku Betani

(Mateo 26:6-13; Mako 14:3-9)

1Byo kwashajile moba atanu na jimo kufika ku kijiilo kya Lupitailo, Yesu waishile ku Betani, ko kwaikajilenga Lazalasa, yenka ye asangwile Yesu mu bafu. 2Konkakwa bamutekejile ne kajo ka mulajilo, ne Maata ye wanengezhezhenga kajo, Lazalasa wajinga umo wa mu boba baikajile ne Yesu na kuja. 3#Lu 7:37,38Ponkapo Maliya washikwile musashi wa manyi a naada a mutengo mukatampe, washingile maulu a Yesu, ne kumushiimuna ku maulu na nsuki yanji. Ne nzubo yakumbene na bwema bwa manyi. 4Pakuba Yudasa Isakaliota, ye umo wa mu baana banji babwanga, yenka wasakile kumusolola, wa ambile amba, 5“Mambo ka ano manyi abujilwe kupoteshiwa na ndenali bitota bisatu, ne kwiapana ku balanda?”

6Wa ambile bino, kechi na mambo a kutesha muchima wanji ku balanda ne, mambo aye wajinga ngivi, kabiji byo a sendanga fukuta wa mali watolelengamo byo babikilengamo.

7Ponkapo Yesu wa ambile amba, “Mulekai mwanamukazhi! Mambo wauba kino na mambo a juba ja kuzhiikwa kwami. 8#Mpitu 15:11Pakuba balanda mukekala naabo, pakuba amiwa kechi nkekala nenu moba onse ne.”

Byo basakile mwa kumwipayila Lazalasa

9Byonkabyo Bayudea bavula byo bayukile amba Yesu uji ku Betani, baishile, bino kechi baendejile Yesu yenka ne, amba bamone ne Lazalasa ye asangwile mu bafu. 10Bino bang'anga bakatampe baumvwang'ene amba, bamwipaye ne Lazalasa pamo, 11mambo Bayudea bavula bafuminengako kwi abo ne kumwitabila Yesu na mambo a lusanguko lwa kwa Lazalasa.

Yesu byo atwelele mu Yelusalema kasa bamutota

(Mateo 21:1-11; Mako 11:1-11; Luka 19:28-40)

12Juba jalondejilepo, jibumba jikatampe jonkaja jaishile kala ku kijiilo, byo jaumvwine amba, Yesu ubena kwiya ku Yelusalema, 13#Sala 118:25,26bashikwile misampi ya bichi, ke baye ne kuya na kumutundaila, kasa babijikizha amba, “Hosana atotwe awa wiya mu jizhina ja Nkambo, Mfumu wa Isalela!”

14Ponkapo Yesu, byo ataine mwana mbongolo, waikajile ponka, monka mo kyanembelwa amba,

15 # Zeka 9:9 “Kuuba moyo ne, mwana Ziona!

Tala Mfumu wobe awo wiya,

waikala pa mwana mbongolo.”

16Bino bintu baana banji babwanga patanshi kechi bebiyukile ne, bino Yesu byo atumbijikilwe, bavulukile bino mo bya mu nembelwa, ne mo byamumwekejile.

17Ne aja jibumba jajinga nanji byo aichile Lazalasa kufuma mu kilende ne kumusangula mu bafu, ja shimwinenga. 18Na onkao mambo jibumba ja ka mutundaijile mambo ba umvwine byo aubile kino kiyukilo kya kukumya. 19Ponkapo Bafaliseo ba ambang'ene bene na bene amba, “Akimonai, byo twamukankalwa! Talai ne kyalo kyonse ke kimulondele!”

Bagiliki bamo basakile kumona Yesu

20Kabiji kwajinga ne bamo bagiliki mu boba baishile ku kijiilo na kupopwela. 21Baishile kwi Filipa, mwina Betesaida wa mu Ngalilea, ne kumwipuzha amba, “Mwane, twasaka kumona Yesu.”

22Ne Filipa naye waishile na kumubula Andeleo, Andeleo waishile ne Filipa ne kumubula Yesu. 23Kumvwa Yesu wibambijile amba, “Kimye kyafika kya kutumbijikwa Mwana Muntu. 24Kine, kine nemwambila namba, umvwe lukunwa wa wichi ne kuponena mu mushiji ne kufwa ne, wikala bunke bwanji, pakuba inge wafwa, ye upanga byavula. 25#Mat 10:39; 16:25; Mako 8:35; Lu 9:24; 17:33Awa watemwa mweo wanji ukamutaya, pakuba awa washikwa mweo wanji pano pantanda ukamulama ne ku bumi bwa myaka. 26Umvwe muntu usaka kung'ingijila amiwa, andondelenga, ne konji amiwa, wamwingilo wami ukekala konka. Ne bataata ba ka munemeka awa ung'ingijila amiwa.

Yesu byo ambile na mambo a lufu lwanji

27“Muchima wami pano kechi waikala bulongo ne, kabiji ng'ambe ka? Ng'ambe amba, ‘Taata mpulushai ku kino kimye nyi?’ Ine, mambo kyo kyonaishila amba mpite mu kyo kino kimye. 28Taata, tumbijikai jizhina jenu!”

Ponkapo mwafumine jiwi mwiulu amba, “Nejitumbijika kala, kabiji nkejitumbijika ne jibiji!”

29Ponkapo jibumba jaimene kwipi bejumvwine ne kwamba amba, “Waluluma.” Bakwabo ba ambile amba, “Malaika wa amba nanji.”

30Kumvwa Yesu wa ambile amba, “Jino jiwi kechi jaishila amiwa ne, jaishila anweba. 31Pano kino kyo kimye kya kuzhatwa kwa pano pantanda, pano mfumu wa pano pantanda ukapangwa. 32Kabiji amiwa, inge naimikwa pano pantanda, nkakokela bonse kwi amiwa mwine.” 33Pakuba aye wa ambile kino, mambo a kutongola musango wa lufu lo akafwa.

34 # Sala 110:4; Isa 9:7; Ezi 37:25; Dan 7:14 Ne jibumba ja mwambijile amba, “Atweba twaumvwa mu buku wa mizhilo amba, Kilishitu ukekala myaka. Anweba mwa amba byepi, amba Mwana Muntu wafwainwa kwimikwa? Nanchi uno Mwana Muntu ye ng'anyi?”

35Yesu wibakumbwile amba, “Muji na kyeya pa kakimye kacheche. Endai byo mukiji na kyeya, mwakeya kwijilwa na mfishi, mambo awa wenda mu mfishi kechi uyuuka ne ko aya ne. 36Ponkapo po mukiji na kyeya kitabilai kyeya, pakuba amba mwikale baana ba kyeya.”

Milengulwila ya Bayudea

Yesu pa kupwisha kwamba bino, wafumineko ne kufyama wibafyamijile. 37Aye nangwa waubile biyukilo byavula kechi bamwitabijile ne, 38#Isa 53:1amba byambo bya Isaya ngauzhi bifike byo a ambile amba,

“Nkambo, ng'anyi waitaba kusapwila kwetu?

Kabiji kuboko kwa Nkambo kwamweka kwi ng'anyi?”

39Na onka ano mambo kechi baitabijile ne. Mambo Isaya wa ambile jibiji amba,

40 # Isa 6:10 “Aye wibapofwile meso abo,

ne kukosesha michima yabo.

Kuchiina amba bakeya kumona na meso abo,

ne kumvwisha na michima yabo,

ne kwalulukila kwi amiwa,

ne amiwa na keya kwibabuka.”

41Isaya wa ambile bino mambo aye wamwene lukumo lwanji, ne kwamba wa ambile mambo a aye.

42Nangwa byonkabyo bakulumpe bene bamo bavula bamwitabijile, bino kechi besolwele ne na mambo a kuchiina Bafaliseo amba, bakebapanga mu shinagoga. 43Mambo batemenwe buneme bwa ku bantu kukila lukumo lwa kwi Lesa.

Byambo bya Yesu byo bikebazhachisha bantu

44Ponkapo Yesu wabijikile ne kwamba amba, “Awa wangitabila amiwa, kechi waitabilatu amiwa ne, wamwitabila ne aye wantuma. 45Ne aye wammona amiwa, wamona ne aye wantuma. 46Amiwa naiya nobe kyeya kya pano pantanda, namba awa wangitabila amiwa kechi akelwe kwikala mu mfishi ne. 47Kabiji umvwe muntu waumvwa byambo byami ne kwibilama ne, amiwa kechi namuzhachishe ne, mambo amiwa kechi naishile kuzhachisha ba pano pantanda ne, poso namba nebapulushe ba pano pantanda. 48Awa wankana amiwa, ne kutambula byambo byami ne, ye uji na wa kumuzhachisha. Mambo ona ambile o aka muzhachisha mu juba jikapelaako! 49Ke pakuba kechi neambile amiwa mwine ne, bataata bantumine, bo bankambizhizhe amba, byo byo ukamba ne byo ukalumbulula. 50Kabiji nayuka namba mukambizho wabo bo bumi bwa myaka. Byonkabyo ng'amba byonkabya bintu bya ng'ambijile bataata.”

Currently Selected:

Yoano 12: KNTP

Highlight

Copy