NITRITI 38
38
Yehuda cut tut Tamar
1Mpe dima lene Yehuda kes nikindig bat-nikinjoi bat nya ei lene ug bong bit Hira. No dini ne timiei minu ndig Adulam ri. 2Lene noni ngat sop mben Kanaan gom ei sirima di nicig ninyeng Sua biwak noni. 3Leu api nitnem nghop bigwam tut nipmot bak Yehuda ba, nicig jem ninyeng Er. 4Jei bi lene noni nghop hanyen bu bigwam tut nipmot hi kin bu bak Yehuda ba, nicig jem ninyeng Onan. 5Jei bi lene nitnem nghop hanyen bu bigwam tut nipmot hi kin bu bak Yehuda ba, nicig jem ninyeng Syela. Nipou tirigi Syela srek bigyo Yehuda ug bong ei minu mien Kezib leu su.
6Lene Yehuda ug nggok sop bak nipmot mighumbou Er bibuwak Tamar kwei binoni. 7Noro Er bon sisar nindig bibor apino tuhan ningon sibui sut noni bikes hukum nimai ei noni dip. 8Lene Yehuda pai bak Er nikinjoi kieti “Tamar nisen rinani. Ma jiyem njita tut yam leu binhyepo Tamar migwam tut munggwom bak akindig.” 9Noro Onan kan tut bipia munggwom di Tamar migwam tut rinok Onan nonti nide bi. Gima rino bikwop tirigi noni kin Tamar igyem njita tut yam lene Onan sindui sut ba, nide minyei siber ei nisai. Noni yai nok leu binhyepo Tamar migwam tut munggwom bak nikindig Er bi. 10Niyai munti dima bindei ba, tuhan ningon sibui sut noni cem leu api kes hukum nimai ei noni dip. 11Lene Yehuda pai bak nignyot “Nna ba angkwei hanyen ug ei acig de ig bei ba, anok sop kibom sri bibou dipmot Syela mahan ug e.” Noni pai bitak kep nok lewo kan “Mpaba tuhan mikes hukum ei Syela cem dip bimai hak bit leu nok nikindig bat cin pima e?” Lene Tamar ngkwei hanyen bibong bit nide bat nya.
12Mimbrek-mimbrek bu lene Yehuda nitnem po Sua nipmisop pima mai leu su. Tirigi nijam mem ipim kep nimai ngwig leu lene Yehuda kin nisut Hira leu Adulam yuug ei Timna. Minu ndig dima ne nibousi mem tungwatu ikos domba nya inta leu ri. 13Gima rino tungwagom ug pai sut Yehuda nikweisi bak Tamar bipia nipmang mbut puig sinon ug ei Timna leu binhyepo kos nide domba nya inta leu. 14Jei bi lene Tamar ku mahan leu lene juk sinsun di kei-kau lene ba sinsun nghas binggai kep ser niimaisi. Lene noni mbut ug ei Enaim bigwam nyahan ei biyati kui dimbou hui ei minu ndig dima di jo puig sinon ug ei Timna. Tamar kan mungkun tut nisen Syela di mahan tu noro Yehuda kwei buwak Tamar bak noni nok nitnem bigyo.
15Tirigi Yehuda tau kep Tamar lene kan bigya noni ne sop sundal rin lewo ba sinsun nghas binggai kep ser niimaisi. 16Gima rino Yehuda ug ngat noni ei simpak ninghas him bihig ser noni “Apai igbit nibok leu binhyepo siyem njita tut yam e?” Pai bak nok noro noni ngat igbit nignyot di Tamar dima bi.
Lene Tamar ce bipai “Ayai mindei bida nipou tirigi siyem njita tut yam bigyo i?”
17Lene Yehuda buhup “Midiyai kambir nehen pap ningut gom bina.”
Lene Tamar pai binoni “Gima kei noro ma ayai bindo gom bida nipou leu bibou apinak kambir dima kwei bida ug e.”
18Lene Yehuda hig ser noni “Diyai bindo di nok mindei bina i?”
Lene Tamar buhup “Ma ayai ade cap mas bitut nikuk kin ade tom cem bida.” Lene Yehuda yai hagom bak leu api igyem njita tut yam apino Tamar nghop. 19Lene Tamar ngkwei hanyen ug ei nide ig bei bicug sinsun nghas leu niimaisi bindei mahan bu.
20Lene Yehuda ug cuk nisut Hira bijem kambir ningut gom bikes bak misop dima leu binhyepo noni mitug bindo pima hanyen bak niceua. Noro Hira ngat misop dima bi. 21Gima rino noni hig-hig nyen ser timiei minu Enaim nya “Sop sundal di gwam kikep kui jide dimbou hui ei minu ndig dini bong tirigi tou i?”
Lene ibuhup “Sop sundal hi bong minu ndig dini bi sren.”
22Lene Hira ngkwei hanyen buug ngat Yehuda bipai bak “Dingat misop dima bi ba, timiei nya ei minu ndig dima ipai bida bipia sop sundal hi bong ei sirima bi sren.”
23Lene Yehuda buhup “Nna ba mun di diyai binoni mijo binoni hak ug. Dikou sut gima tungwatu igyai nimmai binye drek dip noni. Dinggok pui mem gima diyai nimuhup binoni lo, no angat noni bi dima.”
24Bed ningai gi nidipti bu lene hi kwei pui kep Tamar ninghapti bak Yehuda bipia nignyot bingon nok sop sundal binghop tu.
Gima rino Yehuda cuk nide bat nya bipai “Ma jikat noni ba, jindig noni tut niyaisi jo kep hum ug.”
25Tirigi sindi ikat Tamar lene noni sok nihyet bak nipmang bipai “Dinghop tug hon no di ninyeng tak kep bindo di dikrau ei dindati dini. Akwei ngat cap kin nikuk kin tom ba, ando igbit niceua.”
26Tirigi Yehuda ngat igbit bindo dima tu lene pai “Misop dini bon mun tunggwei hi bi. Da dibon mun di igbit binoni bi tirigi po dibuwak noni kwei bak dipmot Syela nok nitnem bi pima.” Lene hon kep njap dima kui Yehuda ngget Tamar ba, igyem njita tut yam bu bi sren.
27Tirigi tto bou dem mem Tamar gwam tut munggwom lene kan tut bipia munggwom nggre ibou can rino ijo ninghopti. 28Tirigi ninghim dut bigwam tut munggwom lene munggwom nggre gom su ninda leu api sop di mpu Tamar kat ninda dima bikim mong ngwoi eisi bipai “Munggwom dini cut bibie.” 29Noro noni brim ninda hanyen leu api Tamar gwam tut munggwom nggre gi nican bibie. Lene sop dima pai “Abisau ba, acut bibie nok e?” Lene ijem ninyeng Peres. 30Lene nikinjoi cut bram tut mong ngwoi di kim nindaba. Lene ijem ninyeng Zerah.
Currently Selected:
NITRITI 38: HAD
Highlight
Share
Copy
Want to have your highlights saved across all your devices? Sign up or sign in
