NITRITI 39

Potifar nitnem ningon pri kep Yusuf

1Tirigi yo di intun Ismael him pima ikwei krau minu Mesir tu lene itri Yusuf hanyen bu bak Potifar. No dini ne yo di igya ser Firaun ide nibou ri. 2#Kis. 7:9 tuhan nyohou Yusuf nok gi kei bibindei ba, noni joi bibor biyai midyai nya hagom nok mungkun kei. Noni bong bit niceu timiei minu Mesir pima. 3Ba, niceu ngat bipia tuhan nyohou Yusuf bibindei ba, nide midyai nya hagom ngat ningat di kei bibor. 4Gima rino Potifar joi sut Yusuf nindig bibor bikon nok no di mpu nonti njem bikon ninyeng binok nibou mem ig bei nsi nya kin nibou mem nide ndigban hagom cem. 5Hon kep mpe dima kui lene tuhan njei mun di kei bak andigpoi mben Mesir dima bitut nide ig bei nsi nya kin mun di noni nyeng tut nya ei ig bei nsi cem ei miaisi cem drek dip Yusuf. 6Potifar ba ningon com Yusuf tut nide mun di nyeng tut nya hagom. Gima rino Potifar ningon ku no tut mun nyeng hi bi lo, pai sut nide njita di yem he.

Tut Yusuf lene ninghuisi sindem ba, ppai bibor kei cem. 7Mpe di gom ne Potifar nitnem ningon pri kep Yusuf bipi bicut tut. 8Noro Yusuf srep bipai “Amiap e, diceu ba ningon com da tut mun di noni nyeng tut nya hagom ba, ningon ku no tut nide ig bei nsi bi. 9Dinyeng tak kep hagom noyam kin nonti ninyeng di tak kep hagom cem. Ningon tak kep mun nyeng gom leu da bi noro nitnem rinani lene ningon tak kep na leu da. Bit bon dibon mun di tunggwei sut noni nok gini ba, dibon sisar tut Allah cem kan bi.” 10Mbro nok gino Potifar nitnem ba no dahat Yusuf bikwop njap-njap nok lo, noni ce nihyet ba, icut tut yam bi.

11Mpe di gom bu tirigi Yusuf yai midyai ei ig bei nsi binongkom ba, awak nindigsi nya yahagom yuug ei miaisi tu lene. 12Potifar nitnem kat noni bimpig bou kep bipi bicut tut. Noro Yusuf nang biningwes ngun leu bikes nide sinsun ndok di jei di sop dima kat bingkiem ei nindati. 13Tirigi noni ngat lo, Yusuf de sinsun no jo nindati noro ningat ningwes ngun leu su lene, 14noni hig awak nindigsi nya kwei ba, om biyok bipai “Jingat i! Awak di mben Ibrani di dijjep kon ninyeng nok nibou ig bei nsi dini yai mun tunggwei sut nye nindig bibor ba, pi bicut tut da noro diba dihyet nindig bahara kep noni. 15Tirigi dahara kep noni lene noni nang ug ei nisai leu bikes nide sinsun bijo simiak dibongti.”

16Lene noni kon Yusuf de sinsun pima ei mem nijjep nikwei tausi. 17Lene om binoni cem bipai “Awak di mben Ibrani di akon nok nibou ig bei nsi dini pi bicut tut da. 18Noro dahara kep noni apino noni nang buug ei nisai leu lene kes nide sinsun bijo simiak dibongti.”

19Lene Potifar ningon sibui sut Yusuf nindig bibor. 20Ba, cuk nide limwa nya bipia ikat Yusuf bicom noni ug ei ig bui nsi bit yo di isima hukum di Firaun nonti kes ei yok dip. 21#Kis. 7:9 Noro tuhan nyohou Yusuf nok gi kei kikau bingondut noni apino nibou ig bui cem ngondut noni. 22Lene noni kes yo di isima nindigsi nya yahagom ei Yusuf nindati leu api Yusuf nyohou dimig midyai ig bui nsi nya hagom mungkun kei. 23Apino nibou ig bui ningon ku no tut mun di noni ba ningon com Yusuf tut bu bi lewo tuhan nyohou Yusuf bibindei ba, nide midyai nya hagom ngat ningat di kei bibor.

Currently Selected:

NITRITI 39: HAD

Highlight

Copy