NITRITI 37
37
Yusuf kin nikindig bat nya
1Mpe dima lene Yakub tot mpia hak ei nicig nitimieisi ei minu Kanaan. 2Ayat dini yok pai sut Yakub nipmot bat nya.
Yusuf de njap ug ei ari bingwam simnaimuhwidip brimigtehican ba, noni hyen kep domba nya kin kambir nya bit nikindig bat nya po Yakub nitnem nimien Bilha kin Zilpa igyai binoni pima. Lene Yusuf pui kep nikindig bat nya inghapti bak nicig tut ibon munti di kinei nya.
3Yakub ngondut Yusuf nindig bibor dor njiriek nipmot bat nindigsi nya yahagom lewo nipmem yai noni bak Yakub tirigi noni andigpoi su. Gima rino Yakub tin ei sinsun di kei bibor kei#37:3: Nipas kep sinsun jei di kei bibor kei cem kei lene nipas kep sinsun ninda jei cem kei. gom bijuk ei Yusufti. 4Tirigi jo nibreisi mem nikindig bat nya bipia icig ngondut Yusuf nindig bibor dor njiriek yoni lene ingon sibui sut Yusuf ba, ighyet wer mpiahi tut noni.
5Mpe di gom lene Yusuf bong bimumpriem leu api mbot kep tut mun di mumpriem dima bak nikindig bat nya apino ingon mpo tut noni nindig bibor bu. 6Lewo noni pai biyok “Ma jintu kep mun di dimumpriem dini. 7Nyeni yahagom igyai midyai ei miaisi ba, ike gandum nintam kin yam leu api ditde gandum ningot ndig kiju biya pijum lo, jide nya hagom igya ttai ditde biyom yo bak.”
8Lene nikindig bat nya ibuhup “Akan bipia anok nibou ndig ba, anyeng tak kep nye e?” Gima rino ingon mpo tut noni nindig bibor bu drek dip nide mun di mumpriem kin nipai mingat tutti cem.
9Mpe di gom kin bu lene noni bong bimumpriem mbigom kin bu bimbot kep tut bak nikindig bat nya bipai “Dimumpriem mbigom kin bu bidingat lo, mpia njap kin bed mmun kin ham mpia-bbed him nya ningat simnaibrimiggom hagom ikuk yok bida.”
10Lene noni mbot kep tut bak nicig cem leu api nicig sinsam noni tut bipai “Amumpriem notou rigima i? Akan bipia apmem nyeni kin akindig bat nya minikuk nye ei amig him e?” 11#Kis. 7:9 Gima rino nikindig bat nya ingon kinei sut noni noro nicig bisrip tut Yusuf de mun di mumpriem nya ei ningonti.
Itri Yusuf nok awak ug ei minu Mesir
12Mpe di gom bu ne Yusuf nikindig bat nya imbut biyuug ei Sikhem bijem Yakub de domba nya kin kambir nya kep abris meng ei sirima. 13Gima rino Yakub pai bak Yusuf “Akindig bat nya yuug ei Sikhem bighyen kep domba nya kin kambir nya ei sirima. Ma aug ngat yok.” Lene Yusuf ce bipai “Ditin ei su.”
14Lene nicig pai bu “Ma aug bisis ser yok gino ingat rin kin gi kei ba, domba nya kin kambir nya cem hagom nok gi kei e? Leu api akwei hanyen ba, apai igbit bida.” Lene nicig cuk noni buug leu api noni jo leu mbang briep Hebron dima.
Jei bi lene noni kwei krau Sikhem, 15biya-ya nyen ei susti leu api um tungwagom di hig ser noni “Anggok ser tou i?”
16Lene Yusuf buhup “Dinggok ser dikindig bat nya di ighyen kep domba nya kin kambir nya. Ba, gino na di Andigpoi akan tut ibongti lene ma apai bida.”
17Lene no dima buhup “Yoni imbut leu sirini tu. Dimiap ighyet tut gi ipai biyam bipia yuug ei Dotan.” Gima rino Yusuf ug nggok ser yok bingat yok ei Dotan.
18Tirigi Yusuf tau ei minu ting lene nikindig bat nya ingat igbit noni. Nipou tirigi noni tau kep yok bigyo lene yuhum yam nsi ba, ipi bigyai nimai binoni 19bipai biyam “No di mumpriem igkei pima kwei tau su. 20Jikwei ba, ihwen noni bimai leu api injei ningut ug ei jui di minyei pingge leu hak ug. Leu api mitri tut bipia mindhe di niten-pos briug noni. Leu api itou kep notou mumpriem nide pima yok mipek kep mem noni i?”
21Noro tirigi Ruben miap tut gi yuhum yam nsi nok lene bingon mem gima teu Yusuf biningwes ngun leu yok. Noni srep “Jihwen noni bimai au! 22Ma jinjei noni tut niyaisi jo ug ei jui nsi gom ei iggum ndigsi dini hak ug. Noro ma jibui noni ba, jisiber ninggrom cem au!” Ruben pai nok lewo minggok puig di kei mem gima teu Yusuf biningwes ngun leu yok bikes noni bingkwei hanyen ndam nicigya. 23Tirigi Yusuf kwei ya bit yok tu lene ikat birik nide sinsun di kei bibor kei pima leu noni. 24Leu api injei noni tut niyaisi jo ug ei jui nsi di minyei pingge leu.
25Tirigi igwam nyahan bigyem njita lene ingat lo, yo di intun Ismael him ibou poi itau kwei leu Gilead biyuug ei minu Mesir ba, ijem ide unta nya di ittei biei ngat nya di ninghap ui-gwang kei kin biei ngat kismis. 26Lene Yehuda pai bak nikindig bat-nikinjoi bat nya “Dem tut gima igyai nimai bak ikinjoi ba, iku nyahan bi. 27Jikwei ba, itri noni nok awak bak yo di intun Ismael him dima yok hak ug. Lene ihwen noni bi lewo nyeni yahagom ibon icig gom. Lene ice tut ningon kanti dima.” 28#Kis. 7:9 Tirigi mben Midian#37:28: Mben Midian kin mben Ismael imang bibor igyai midyai gi itri mun-bipek ndiyok. Gima rino yo di hiter ikan bipia mben cin dima imbier kim yam. dima imbut hammiyai yok lene Yusuf nikindig bat nya ibrim noni hanyen leu jui nsi bitri noni bak yo di intun Ismael him pima bibipek mitiei perak ningot can. Lene yo dima ibuwak Yusuf biyuug sut ug ei minu Mesir.
29Tirigi Ruben tau kwei leu nimbutti bingat ser jui nsi hanyen lo, ngat Yusuf ningat rin eisi bi lene ba ningon di ngguk bibor birik nide sinsun rok him drek dip nikinjoi. 30Gima rino noni ngkwei hanyen ndam nikinjoi bat nya lene ba nicot pai “Yusuf ningat rin ei jui nsi bi! Dibon ndei da notou i?”
31Lene ibui kambir ningut gom tut ninggrom bitur Yusuf de sinsun di kei bibor kei pima eisi. 32Leu api ittei sinsun dima biyuug ndo bak icig biris binoni bipai “Ningat sinsun dini kak puig sinon. Angat igbit ug e. Gini ne apmot de sinsun pima rin e?”
33Lene Yakub ngat igbit nipmot Yusuf de sinsun bicot tut “Ayo! Mot de nide sinsun pa ri! Mindhe di niten-pos ttem Yusuf baham noni ug su!” 34Apino Yakub ningon ngguk bibor birik nide sinsun rok him bijuk sinsun kron drek dip nipmot ba, ningon di ngguk dima jo kikau ei njap mang. 35Nipmot bat nya kin nipmisop bat nya yahagom igwam ser ningon noro noni kou sut bipai “Dingon ngguk bibor tut dipmot nimaisi kikau ba, duug bimai kep.” Lene noni pim kui jei sut nipmot kikau.
36Mpe dima lene mben Midian pima yuug krau minu Mesir bitri Yusuf nok awak bak Potifar. No dini ne nibou mem yo di igya nyen ser nibou ndig Firaun ri.
Currently Selected:
NITRITI 37: HAD
Highlight
Share
Copy

Want to have your highlights saved across all your devices? Sign up or sign in