Maki 11

Yisɔs biyande ka Yɛrusalɛmi nɔŋ gbaku

(Mathiyu 21:1-11; Luku 19:28-40; Yɔni 12:12-19)

1Naa bohe Yisɔs iŋ bakarandeni nama beŋ thuriye ka mɛti ba ka Yɛrusalɛmi baŋ, bindɛ tɛŋ ka mɛtiŋ ba ka Bɛthɛfɛki mɛnɛ ka Bɛthani, ka kusɛri ku dɔma Ɔlifisi koŋ. Kɛna ŋindi Yisɔs bakarandeni nama biye ka kɔtɔkɔy, 2e ndɛ bindɛ nunkunɔkɔ ba dɔma, na “Kaaŋ toloŋ ka mɛti bayete ba siseke beŋ baŋ. Awa naa beŋ tɛŋ kɛndɛ, beŋ kɔŋ kɛndɛ pɛnki maama wotutuyo wohatiyɛ yuke wo be hɛ tutuyo hanthe. Pɛɛkaŋ niŋ e beŋ niŋ sisa kiyaŋ do. 3Awa mɛnɛ wɔ yo wɔ thɔnthɔŋɔŋ bena hu beŋ niŋ peeke, tepeŋ niŋ ba dɔma, na ‘Karimɔkɔ woŋ na thimo niŋ, awa naa wundɛ thankaŋ ba wundɛ niŋ niye baŋ, wundɛ kɔŋ niŋ duutu yako.’”

4Awa bindɛ key e bindɛ pɛnka maama wohatiyɛ woŋ wo fuŋutɔy ka gbada, e ndɛ yuko kuwaŋ ka biyo hu ka banka baŋ haŋ. Naa bindɛ niŋ pɛɛki, 5biya binɔndi bi kɔɔyɛ nde kɛndɛ kuwaŋ beŋ thɔnthɔŋɔŋ bindɛ, na “Mbɛ hu beŋ peeke maama woŋ baŋ?”

6Bakarandeni biye beŋ ni bindɛ yaabi nɔŋ na tepo nthɔŋ bindɛ iŋ Yisɔs na, awa biya beŋ mɛkɛŋ bindɛ ba diŋa maama woŋ ka Yisɔs ka. 7Bakarandeni beŋ kati maama woŋ ka Yisɔs ka. Naa kati bindɛ niŋ, bindɛ yiinthi ŋahɔli ŋakɛnamɛŋ ŋaŋ maama woŋ awa Yisɔs dunkɔy niŋ e dɔŋɔ. 8Biya bibɔyɛ taayi ŋahɔli namɛŋ ŋaŋ ka gboŋa baŋ ka Yisɔs daŋiyande ka. Awa binɔndi key thoŋ buyitha mɛnɛ mgbenthɛŋ ka hee ka e bindɛ muŋ taayuwa ka gboŋa baŋ ka Yisɔs daŋiyande ka. 9Biya bi nde ka kɔtɔkɔy beŋ iŋ bi yeŋ mahɛŋ beŋ bohe thiya masɔnkɔ e bindɛ dɔma, na “Miŋ gbuŋunuwɛŋ Masaala na!#Ŋaiŋa 118:25 Masaala thiyiyɛŋ wo seeye ka keŋ ku ka Mariki woŋ koŋ.#Ŋaiŋa 118:26 10Masaala thiyiyɛŋ thaduba hugbakine hu ka mbemba ntuŋ Dauda hu see haŋ! Miŋ gbuŋunuwɛŋ Masaala na!”

11Yisɔs biyande ka Yɛrusalɛmi, e wundɛ kaa ka banka bamandiŋ ba ka Masaala baŋ awa e wundɛ detha munki yo munki mu kɛndɛ. Kɛrɛ ka lɔkɔ babɛina mahɔnkɔlɛŋ mɛna nde nda, huna wundɛ key iŋ bakarandeni nama kɔhi iŋ biye beŋ ka mɛti ba ka Bɛthani ba tɔpɛ ka Yɛrusalɛmi baŋ.

Yisɔs iŋ kuyeŋ ku iŋ mutiŋ muthɔma muŋ koŋ

(Mathiyu 21:18-19)

12Naa Yisɔs iŋ bakarandeni beŋ duu sanka ka mɛti ba ka Yɛrusalɛmi ŋaye ka Bɛthani, ndɛ kaho kɔnthɔ ka gboŋa. 13Kɛna kute ndɛ kuyeŋ ku iŋ mutiŋ muthɔma muŋ koŋ nayimgbiriŋ wuthokiye. Ndɛ key ka kuŋ ba ka detha mɛnɛ mutiŋ mu kiŋ kɛndɛ. Kɛrɛ ndɛ tha pɛnki kɛndɛ ntha yo ntha yɔkɔŋ bompa buthɔ, baa lɔkɔ ba kuŋ time baŋ kutɛ hɛ. 14Huna dome ndɛ ka kuyeŋ koŋ, na “Haliko wɔ bɛiŋ nɔŋ nda thɔŋ mutiŋ mukɛnda haaŋ nɔŋ nda.”

Awa bakarandeni nama beŋ yuye si nɛŋ tɛpi.

Yisɔs key ka banka ba ka Masaala baŋ

(Mathiyu 21:12-17; Luku 19:45-48; Yɔni 2:13-22)

15Naa tɛŋ bindɛ ka Yɛrusalɛmi, Yisɔs key ka banka bamandiŋ ba ka Masaala baŋ, e wundɛ ka bɔha kantha biya bi kɛndɛ boyi beŋ maa bindɛ kɔ niya gbɔŋ ka banka bamandiŋ ba ka Masaala baŋ. Wundɛ koŋotoni thebuluiŋ bi ka bi thikipi kɔbiri woŋ beŋ mɛnɛ mudoŋeŋ mu ka bi ni kukuni gbɔŋ beŋ. 16Awa wundɛ tha mɛyi ba wɔ yo wɔ daŋande iŋ gbɔŋ ka gbada hu ka banka bamandiŋ ba ka Masaala baŋ haŋ. 17Kɛna thanani ndɛ biya beŋ ba dɔma, na “Wuŋ gbalo ka magbali ma ka Masaala maŋ ba dɔma, na ‘Banka niŋ baŋ ba kɔŋ dɔma banka ba niye kuraminɛ ba biya fooma.’#Ais 56:7 Kɛrɛ beŋ sikiŋ bɛŋ banka ba batuwani nuneke.”#Yɛr 7:11

18Naa yuye huŋ bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ, bindɛ bohe deethuwa gboŋɛŋ na bindɛ kore Yisɔs na. Kɛrɛ bindɛ nde fooma bi payɔy, baa biya beŋ nde fooma bi ni ŋakabanɛ wumandiŋ ba mathanani nama maŋ.

19Naa thɔɔyɛ kaŋ woŋ, Yisɔs iŋ bakarandeni nama beŋ fuŋ ka mɛti baŋ e bindɛ kɔ kaa.

Mathanani ma ŋaye ka kuyeŋ koŋ maŋ

(Mathiyu 21:20-22)

20Naa bindɛ key naa puthɔy kaŋ sanka, bindɛ kute nda kuyeŋ ku iŋ mutiŋ muthɔma muŋ koŋ kutukɛ ŋaye ka thinthi haaŋ athuhu ka nthanthɛŋ kiŋ ka pothi. 21Kɛna siyi Pita gbonkiye hu gbonkiye heŋ Yisɔs kuyeŋ koŋ haŋ e ndɛ dɔma ka Yisɔs, na “Detha hɛ, Karimɔkɔ, kuyeŋ ku thiyiyɛ heŋ yi danka koŋ tuku.”

22Yisɔs ni bindɛ yaabi e dɔma, na “Niyaŋ Masaala na lanɛya. 23Yaŋ kɔŋ bena tepe nɔndi baŋ, wɔ yo wɔ kɔŋ punku dɔma ka kusɛri koŋ koŋ baŋ, na ‘Gbɔnɔkɔ dondo baŋ e yi gbantɔkɔ ka mankɔ ka.’ Wu kɔŋ punku niyɔ mɛnɛ wundɛ kiŋ iŋ lanɛya e ndɛ thana niyɔ iŋ haamɛ ka thukuma nama haŋ ba tepe wundɛ baŋ ba kɔŋ niyɔ; wundɛ kɔŋ bɛŋ niyiya.#Math 17:20; 1 Kɔr 13:2 24Ba saabu baŋ baŋ yaŋ tepe bena: Naa beŋ kɔ ni kuraminɛ e beŋ kɔ thɔnthiŋina ba ntha, niyaŋ lanɛya ba dɔma na beŋ thanki nda wuŋ kuta. Awa beŋ kɔŋ dunkuno ntha yo ntha ki beŋ thɔnthiŋiniyɛ. 25Awa naa beŋ kɔɔyɛ ka niya kuraminɛ, pɛniyaŋ bintɔni ndeŋ bɛyi yo bɛyi ba ni bindɛ bena, wuna Fanda ndeŋ wo ka ariana woŋ pɛniyɛ bena hakɛŋ ndeŋ baŋ. [26Mɛnɛ beŋ tha pɛniyɛ biya bihɛna, Fanda ndeŋ wo ka ariana woŋ sa nɛnɛ bena pɛniyɛ.]”#Math 6:14-15

Yisɔs thonthiŋino ba mayoho makɛnama maŋ

(Mathiyu 21:23-27; Luku 20:1-8)

27Yisɔs iŋ bakarandeni nama beŋ tɛŋ hɛlɛŋ ka mɛti ba ka Yɛrusalɛmi. Naa Yisɔs kaande ka banka bamandiŋ ba ka Masaala baŋ, bafodeni bibukuyuwɛ beŋ, karimɔkɔiŋ bi ka Siraŋ baŋ beŋ, mɛnɛ bakalani bibayahɛŋ beŋ key kɛnama ka 28e bindɛ niŋ ka thɔnthiŋina, na “Mbɛ mayoho ma yi niye bɛyiniŋ baŋ baŋ ka banka ba ka Masaala baŋ? Nkaana dunkune yina mayoho ba bɛŋ niya?”

29Yisɔs ni bindɛ yaabi e dɔma, na “Yaŋ kɔŋ bena thɔnthɔŋɔŋ kuthɔnthɔŋɔŋ kunthɛ napethi. Awa mɛnɛ beŋ ni yama yaabi, yaŋ kɔŋ bena tepe mayoho ma niye yaŋ bɛyiniŋ baŋ baŋ. 30Tepeŋ hɛ yama. Kama kute nde Yɔni mayoho ba biye biya biye hu ka Masaala haŋ? Ka Masaala maa ka biyamɛti?”

31Kɛna bohe bindɛ gbakila bindɛ bithɔ e bindɛ dɔma, na “Mbɛ hu miŋ tɛpi? Mɛnɛ miŋ dome, na ‘Ka Masaala ŋaye na mɛŋ,’ ndɛ kɔŋ dɔŋ kɛntuŋ, na ‘Mbu mbɛ hu tha nde beŋ niye Yɔni na lanɛya?’ 32Mɛnɛ miŋ dome tete, na ‘Ka biyamɛti ŋaye na mayoho mabɛina,’ miŋ kɔŋ niya thɔɔrɔ.” Bi kɔŋ nde payɔ biya beŋ, baa womo woma siyuweŋ nde ba dɔma na Yɔni banabi na nde wundɛ. 33Kɛna ni bindɛ Yisɔs na yaabi ba dɔma, na “Miŋ kɔthɛta ka ŋaye nde mayoho mabɛina.”

Huna dome Yisɔs kɛnamɛŋ, na “Yaŋ sa nɛnɛ bena tepe ka kute yaŋ mayoho ma yaŋ niye bɛyiniŋ baŋ baŋ.”

Currently Selected:

Maki 11: LMBNT

Highlight

Copy