Maki 10
10
Yisɔs thanani ba thana kɔra kuyɛntande
(Mathiyu 19:1-12; Luku 16:18)
1Kɛna pɛyɛŋ Yisɔs ka Kapaniyɔmi, e wundɛ kaa ka kuyɛkɛŋ ku ka Yudiya koŋ, awa wundɛ key thuhande mankɔ ma ka Yɔdaŋ maŋ. Sɛthɛ bamandiŋ key thiŋitande hɛlɛŋ kɛnama ka, awa wundɛ thanani bindɛ, nɔŋ na bare wundɛ niya na.
2BiFaresini binɔndi key kɛnama ka e bindɛ ka yɔla ba niŋ bɔha ka siraŋ. Bindɛ thɔnthɔŋɔŋ niŋ ba dɔma, na “Tepe hɛ mina, e Siraŋ ntuŋ baŋ dunkune wɔ wathe mayoho ba baŋina wɔtɔ nama?”
3Yisɔs ni bindɛ yaabi iŋ kuthɔnthɔŋɔŋ e dɔma, na “Mbɛ siraŋ ba dunkune nde bena Musa?”
4Yaabi namɛŋ baŋ bɛna baŋ baŋ: na “Musa mɛyi nde ba wowathe woŋ yenke gbala kuthagba ku tɔŋinɛ ba wundɛ paŋande iŋ wɔtɔ nama, saanuŋ ntiŋ wundɛ niŋ kɔ pɛyɛna.”#Dit 24:1-4; Math 5:31
5Yisɔs dome kɛnamɛŋ, na “Musa gbale nde siraŋ baŋ baŋ ba beŋ, baa beŋ akaahi ka thaninuwo. 6Kɛrɛ ka mathɛrɛŋ maŋ, ka malɔkɔ ma yehinuwo dunia baŋ, wuŋ tepo ka magbali ma ka Masaala maŋ, na ‘Masaala yeheni wɔ wathe iŋ wɔ yɛrɛmɛ.#Mthr 1:27; 5:2 7Awa saabu baŋ baŋ, wuna biyɛ wɔ wathe kɔ pɛyɛna fandama na iŋ nandama e ndɛ bɔhande iŋ wɔtɔ nama, 8awa biya bibiye beŋ beŋ niyɔy nda wɔ wunthe.’#Mthr 2:24 Huna bindɛ ka nda biya biye, kɛrɛ wɔ wunthe na nda bindɛ. 9Wuna biyɛ wɔmɛti ka ba paŋinande wu thanki Masaala bohinande.”
10Naa duuteke Yisɔs iŋ bakarandeni nama beŋ ka banka ka, bindɛ thɔnthɔŋɔŋ niŋ ba sɔkɔ haŋ haŋ. 11Wundɛ tepe bindɛ, na “Wɔ wathe wo baŋinɛ wɔtɔ nama e wundɛ yɛnta yɛrɛmɛ wohɛna, wundɛ ni kubɛy ma sɔkinɔkɔ wɔtɔ nama. 12Nɛna hɛlɛŋ wuŋ ba wɔ yɛrɛmɛ wo baŋaŋ wandama na e wundɛ ka yento iŋ wathe wohɛna; wundɛ ni kubɛy.”#Math 5:32; 1 Kɔr 7:10-11
Yisɔs thiyiyɛ mpatiyɛŋ thaduba
(Mathiyu 19:13-15; Luku 18:15-17)
13Biya binɔndi sisi mpati ka Yisɔs ba wundɛ be bindɛ tutu thɛnkɔ. Kɛrɛ naa kute wuŋ bakarandeni nama beŋ, bindɛ pinde biya beŋ. 14Naa kute wuŋ Yisɔs, wuŋ thoŋ niŋ wumandiŋ e wundɛ dɔma ka bakarandeni nama beŋ, na “Mɛkinaŋ ba mpati beŋ saa kiyaŋ do; baŋ bindɛ pindi, baa biya nɔŋ beŋ beŋ bindɛ bina biyɛ Hugbakine hu ka Masaala haŋ. 15Nɔndi yaathi yaŋ tepe bena, wɔ yo wɔ wo sa yɛrɔkɔ Hugbakine hu ka Masaala haŋ nɔŋ hatiyɛ, wundɛ sa biyande kɛndɛ.”#Math 18:3 16Kɛna thurintiyeke wundɛ mpati beŋ e wundɛ bindɛ tuta thɛnkɔ, e wundɛ bindɛ thiyiyɛ thaduba.
Mbɔrɔ ki ka hati lamgba wo bananhulu woŋ kiŋ
(Mathiyu 19:16-30; Luku 18:18-30)
17Naa bohe Yisɔs kaa hɛlɛŋ, hati lamgba wunthe thare e ka kunthuŋa ka kɔtɔkɔy ka Yisɔs e niŋ thɔnthiŋina, na “Karimɔkɔ woyɔhɔy, mbɛ bayɔhɔy ba yaŋ ni ba kuta sii ba kɔy yo kɔy?”
18Yisɔs ni niŋ yaabi kaŋ thɔnthiŋina niŋ, na “Mbɛ hu yama yi dome wɔ yɔhɔy? Wɔ yo wɔ ka woyɔhɔy yɔkɔŋ Masaala ndɛ wuntheŋ napethi, wundɛ na woyɔhɔy. 19Yi kɔthɛŋ na Sirani ba ka Masaala baŋ tepe, na ‘Ba kɔri,#Fuŋa 20:13; Dit 5:17 ba ni kubɛy,#Fuŋa 20:14; Dit 5:18 ba tuwe,#Fuŋa 20:15; Dit 5:19 ba ni maseri mahothi ba ntɔ nda,#Fuŋa 20:16; Dit 5:20 ba ni ntɔ nda na kɔɔtha; thiya fanda mɛnɛ nanda na yiki.’”#Fuŋa 20:12; Dit 5:16
20Hati wowathe woŋ tepe, na “Karimɔkɔ, kabi yaŋ kiŋ hatiyɛ, yaŋ putiyɔ sirani baŋ baŋ.”
21Yisɔs dethe niŋ natiŋ iŋ mathimo e tɛpa, na “Bɛyi banthe napethi bɛna nda yi ba niya. Kaa e yi ka niya gbɔŋ ntha yo ntha kiŋ iŋ yi, awa yi hana kɔbiri woŋ ka bamɔnɛŋ beŋ; yi kɔŋ kutu nanhulu ka ariana, e yi saa ba yama yema.” 22Naa yuye huŋ hati lamgba woŋ, wundɛ sinkiŋ yaha, awa ndɛ key wo teetuwɔy thukuma, baa ndɛ kiŋ nde iŋ nanhulu babɔyɛ-bɔyɛ.
23Yisɔs yili thaaya ka bakarandeni nama beŋ e dɔma kɛnamɛŋ, na “Wu kɔŋ kaahi ba bananhulu ba biyande ka Hugbakine hu ka Masaala haŋ.”
24Wuŋ niyɔy bakarandeni beŋ thɛrɛnaŋ ba magbonkoy maŋ maŋ baŋ, kɛrɛ Yisɔs key ka kɔtɔkɔy e tɛpa, na “Mpatiŋ beŋ, wuŋ akaahi wɔ ba biyande ka Hugbakine hu ka Masaala haŋ. 25Ba bananhulu ba biyande ka Hugbakine hu ka Masaala haŋ akaahi haaŋ ayaŋ ba maama womandiŋ nɔŋ yɔkɔmɛ ba fuŋande ka matha ma ka masandeŋ.”
26Naa yuye huŋ bakarandeni beŋ, bindɛ ni thakaba wumandiŋ, e bindɛ dɔma, na “Mbu mbɛ wo nda niyɔ kisi?”
27Yisɔs dethe bindɛ natiŋ e ndɛ niya bindɛ yaabi, na “Biyamɛti sa punku niyɔkɔ kisi, kɛrɛ Masaala punkeŋ niya bɛyi yo bɛyi.”
28Huna dome Pita, na “Detha hɛ, miŋ pɛyi ntha yo ntha ba yina yema.”
29Yisɔs dome kɛnamɛŋ, na “Ndo, kɛrɛ yaŋ kɔŋ bena tepe haŋ haŋ baŋ: Wɔ yo wɔ wo pɛyɛ yikiya nama, maa mbɛndama bibiyɛthɛŋ maa biyɛrɛmɛŋ, maa nandama maa fandama, maa mpati nama, maa thakay nama ba yama yema, mɛnɛ saathɛ ba Huseri Huyɔhɔy haŋ, 30wundɛ kɔŋ kutu wuyamɛ-yamɛ ka lɔkɔ bahɛ baŋ. Wundɛ kɔŋ kutu bankɛŋ kɛmɛŋ-kɛmɛŋ, mbɛndama bibiyɛthɛŋ, biyɛrɛmɛŋ, binandama, mpati, mɛnɛ thakay, e wundɛ hɛlɛŋ niyo thɔɔrɔ, awa ka malɔkɔ ma see maŋ, ndɛ kɔŋ kutu sii ba kɔy yo kɔy. 31Ka lɔkɔ babɛina, bibɔyɛ bi nde ka kɔtɔkɔy beŋ, bindɛ bina nda manki mahɛŋ; awa bimankɛ beŋ nde, bindɛ bina nda si niyɔ ka kɔtɔkɔy.”#Math 20:16; Luku 13:30
Yisɔs gbonkoy hutaati ba tuka nama haŋ
(Mathiyu 20:17-19; Luku 18:31-34)
32Yisɔs iŋ bakarandeni nama beŋ bi kɔŋ nde ŋati ba kaa ka mɛti ba ka Yɛrusalɛmi. Naa bindɛ key, Yisɔs kɔtiyɔkɔy bakarandeni beŋ, bi thooyo payɔ ba na wundɛ key kɛndɛ. Awa biya bi yeme nde mahɛŋ beŋ payɔy wumandiŋ. Kɛna sakitɔkɔy hɛlɛŋ Yisɔs bakarandeni beŋ e bindɛ tepe bɛyiniŋ fooma ba bɔhɛ ba niŋ pɛnka baŋ. 33Wundɛ dome hɛlɛŋ kɛnamɛŋ, na “Ponaŋ kuiha, miŋ kɔŋ key ka Yɛrusalɛmi, awa kɛna Hati ka Wɔ woŋ ka dunkuno ka thɛnkɔ tha ka bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ, awa bi kɔŋ niŋ thonkine haaŋ e bindɛ niya ba ndɛ koro. Bi kɔŋ niŋ dunkuŋ ka thɛnkɔ tha ka biya bi be ni Masaala na kubatho beŋ. 34Awa bi kɔŋ niŋ thiyi ŋasɛkɛ, e bindɛ niŋ thuthe, e bindɛ niŋ tawa, e bindɛ niŋ kɔra. Kɛrɛ ndɛ kɔŋ ŋayina ka tuka haŋ ka gbɛɛŋ wo tɛŋinɛ wotaati woŋ.”
Kuthɔnthɔŋɔŋ ku ka Yemisi koŋ mɛnɛ Yɔni
(Mathiyu 20:20-28)
35Kɛna see Yemisi mɛnɛ Yɔni, mpati bi ka Sɛbɛdi, ka Yisɔs e bindɛ dɔma, na “Karimɔkɔ, miŋ kiŋ iŋ bɛyi banthe ba thimo miŋ ba yi mina niyiyɛ.”
36Yisɔs thɔnthɔŋɔŋ bindɛ, na “Mbɛ ba thimo beŋ ba yaŋ bena niyiyɛ?”
37Bindɛ ni niŋ yaabi, na “Naa yi dɔŋɔy nɔŋ ka yensi nda ka Hugbakine nda huyiki haŋ, miŋ thimoŋ nɔŋ ba yi mɛkina e miŋ dɔŋɔ kɛndɛ iŋ yi, wunthe ka yɔnkɔ nda huthome haŋ, wunthe ka hupɔkɔdɔ haŋ.”
38Huna dome Yisɔs kɛnamɛŋ, na “Beŋ kɔita hu beŋ thɔnthɔŋɔŋ haŋ. E beŋ kɔŋ punku thiiye kɔɔpu hu ka nambarɛŋ ba yama see ka pɛnka baŋ? E beŋ kɔŋ punku biyo nambarɛŋ nɔŋ na yaŋ see ka biyo nambarɛŋ na?”#Luku 12:50
39Bindɛ mɛyi, na “Miŋ kɔŋ punku.”
Huna dome Yisɔs, na “Beŋ kɔŋ punku thiiye kɔɔpu hu ka nambarɛŋ baŋ haŋ yaathi e beŋ punka biyo nambarɛŋ baŋ nɔŋ na yaŋ see ka biyo bɛŋ na. 40Kɛrɛ yaŋ ka iŋ mayoho ba yɛtha wo dɔŋɔ ka yɔnkɔ niŋ huthome iŋ hupɔkɔdɔ haŋ. Masaala na dunkuŋ ka thani kɛnkɛ baŋ ka bi thanki ndɛ kɛndɛ kɔsiniyɔkɔ beŋ.”
41Naa yuye huŋ bakarandeni bibintheŋ bikɔhi beŋ, wuŋ thoŋ bindɛ wumandiŋ ba Yemisi mɛnɛ Yɔni. 42Huna thiye Yisɔs bindɛ ka tha banthe fooma kɛnama ka e dɔma, na “Beŋ kɔthɛŋ ba dɔma na biya bi kɛriŋiyɛ biya bihɛna bi be ni Masaala na lanɛya beŋ bi kiŋ iŋ mayoho mamandiŋ ba bindɛ tuta sɛmbɛ, awa bayahɛŋ namɛŋ beŋ bi kiŋ iŋ sɛmbɛŋ fooma ka thinthi kɛnamɛŋ. 43Wuŋ ka ba niyɔ mateete makendeŋ.#Luku 22:25-26 Mɛnɛ wɔ kiŋ ba niyɔ wɔ mandiŋ mateete makendeŋ, yɔkɔŋ ndɛ be niyɔ bawali wokendeŋ; 44awa mɛnɛ wunthe ka beŋ thimoŋ ba niyɔ wɔ mandiŋ nthɔŋ nda fooma, ndɛ kiŋ ba niyɔ nɔŋ waayi ka beŋ fooma.#Math 23:11; Maki 9:35; Luku 22:26 45Ba hali hintiŋ Hati ka Wɔ woŋ ndɛ tha see ba niyiyo, kɛrɛ ndɛ see ba niyiyɛ biya iŋ ba dunkuna sii nama baŋ ba bakiŋa biya fooma.”
Yisɔs puyi Batimeyɔsi na wo mankɔy thaaya woŋ
(Mathiyu 20:29-34; Luku 18:35-43)
46Yisɔs iŋ bakarandeni nama beŋ tɛŋ ka mɛti ba ka Yɛriko baŋ. Naa bindɛ pɛyɛŋ kɛndɛ ba kaa, sɛthɛ babɔyɛ yeme bindɛ ka kaa. Bindɛ penke wɔ wunthe wo mankɔy thaaya wo dɔma Batimeyɔsi, hati wo ka Timeyɔsi, doŋe ka gboŋa baŋ kuwaŋ kɔŋ yawu. 47Naa yuye ndɛ ba dɔma na Yisɔs wo ka mɛti ba ka Nasarɛthi baŋ woŋ na, ndɛ bohe yɛla thampa wutɔɔkɛ e dɔma, na “Yisɔs, yindo Hati ka Dauda woŋ, kutiyɛ yama nkinikiniŋ.”
48Kɛna wokitɔtɔy niŋ biya binɔndi ba ndɛ danɔkɔ. Kɛrɛ ndɛ yame ntiŋ yɛla thampa wutɔɔkɛ e dɔma, na “Hati ka Dauda, yaandi, kutiyɛ yama nkinikiniŋ.”
49Kɛna kɔɔyɛ Yisɔs nasooŋ e dɔma, na “Thiyaŋ hɛ niŋ.”
Huna thiyi bindɛ wo mankɔy thaaya woŋ e bindɛ dɔma, na “Yehitɔkɔ, e yi ŋayi ka kɔɔ, ndɛ kɔŋ yina thiyi.”
50Kɛna ŋutu ndɛ yaba nama ba ka thinthi baŋ, e mala, e kaa ka Yisɔs ka.
51Yisɔs thɔnthɔŋɔŋ niŋ, na “Mbɛ ba thimo yi ba yaŋ yina niyiyɛ?”
Wo mankɔy thaaya woŋ ni niŋ yaabi, na “Yaŋ thimoŋ ba hɛlɛŋ duwa ka kuta.”
52Huna dome Yisɔs kɛnama, na “Kaa, lanɛya nda baŋ ni ba yi pethɔ.”
Ka wuthurɔy wubɛina, hati lamgba woŋ punke kuta, awa ndɛ yeme Yisɔs na ka gboŋɛŋ ka.
Currently Selected:
Maki 10: LMBNT
Highlight
Share
Copy
Want to have your highlights saved across all your devices? Sign up or sign in
© The Bible Society of Sierra Leone, 2011
