Mak 2
2
Jizɔs Mɛn Wan Man we Paralayz
(Matyu 9:1-8; Lyuk 5:17-26)
1Tu, tri de pas, nain Jizɔs tɔn bak go Kepanyɔm. Di pipul dɛn yɛri se Jizɔs dɔn go nain os. 2Bɔku pipul go gɛda na di os, so dat ples nɔ bin de ɛni say igen fɔ put fut; pipul bin de ɔlɔbɔt, Jizɔs bin de tɛl dɛn di Gud Nyuz. 3Wɛn i de tɔk, nain sɔm pipul briŋ wan man we paralayz. Na fo man dɛn bin tot am fɔ kɛr am go to Jizɔs. 4Pipul bin so plɛnti dat di man dɛn nɔ ebul pas fɔ kɛr di man we paralayz go na di ples we Jizɔs bin de. Dɛn klem pantap di os go pul wan pat pan di ruf kɔmɔt fɔ mek dɛn go gɛt ples fɔ pas di man we paralayz go dɔŋ na di ples we Jizɔs bin de. Di man bin ledɔm pan mata we dɛn pas am go dɔŋ to Jizɔs. 5Jizɔs si aw dɛn biliv pan am, so i tɛl di man we paralayz se, “Mi pikin, Gɔd dɔn padin yu sin dɛn.”
6Sɔm Ju Lɔ ticha dɛn we bin sidɔm de, bigin tɔk na dɛn at se, 7“Udat na dis man we de pwɛl Gɔd in nem we i de mek insɛf lɛkɛ Gɔd? Nɔbɔdi nɔ de we ebul padin pɔsin sin; na Gɔd wangren ebul du dat!”
8Jizɔs no wantɛm wetin di Ju Lɔ ticha dɛn bin de tɔk na dɛn at. I aks dɛn se, “Wetin du una de mɛmba dat na una at? 9Uswan traŋa fɔ tɔk, fɔ tɛl di man we paralayz se, ‘Gɔd dɔn padin yu sin dɛn’ ɔ fɔ se ‘Grap, tek yu mata ɛn waka?’ 10A go sho una se Mɔtalman Pikin gɛt di pawa na dis wɔl fɔ padin pɔsin sin.” So Jizɔs tɛl di man we paralayz se, 11“Grap, tek yu mata, go na yu os!”
12Aw ɔlman de luk, di man grap wantɛm, tek in mata ɛn waka go. Ɔlman wɔnda ɛn prez Gɔd. Dɛn se, “Wi nɔba si tin lɛkɛ dis wande!”
Jizɔs Kɔl Livay fɔ Fala Am
(Matyu 9:9-13; Lyuk 5:27-32)
13Jizɔs kɔmɔt na di os, i go bak klos di wata we nem Lek Galili. Plɛnti pipul go gɛda rawnd am, ɛn i bigin lan dɛn bɔt Gɔd. 14Afta dat, Jizɔs bigin waka go; as i de go, i si wan man we de gɛda taks. Di man bin nem Livay ɛn na bin Alfiɔs in pikin. Livay bin sidɔm insay in ɔfis. Jizɔs tɔk to am, i se, “Kam fala mi!” I grap ɛn fala Jizɔs.
15Wɛn Jizɔs ɛn in lanin bɔy dɛn bin de it na Livay in os, plɛnti pipul we bin de gɛda taks ɛn sɔm dɛn Ju pipul we dɛn Ju bigman nɔ bin lɛk bikɔs dɛn bin tink se dɛn nɔ de kip di Ju Lɔ gud gud, bin sidɔm de it wit Jizɔs ɛn in lanin bɔy dɛn, bikɔs dɛn ɔl bin de fala Jizɔs. 16Wɛn dɛn Ju Lɔ ticha we na Faresi si se Jizɔs de it wit dɛn pipul ya, dɛn go aks in lanin bɔy dɛn se, “Wetin du Jizɔs de it wit dɛn kayn pipul ya?”
17Wɛn Jizɔs yɛri wetin dɛn de tɔk, i se, “Nɔto dɛn pipul we wɛl gɛt fɔ go to dɔkta, na dɛn wan we sik. A nɔ kam fɔ tɛl dɛn pipul we de du wetin di Lɔ we Gɔd gi Mozis se, fɔ chenj dɛn layf, a kam fɔ tɛl dɛn wan we de pan sin fɔ mek dɛn chenj dɛn layf.”
Jizɔs Lan Pipul Aw fɔ Kip Fast
(Matyu 9:14-17; Lyuk 5:33-39)
18Tɛm bin de we Jɔn in lanin bɔy dɛn ɛn di Faresi dɛn bin de kip fast. Sɔm pipul kam aks Jizɔs se, “Wetin mek Jɔn in lanin bɔy dɛn ɛn di Faresi dɛn de kip fast, bɔt yu yon lanin bɔy dɛn nɔ de kip fast?”
19Jizɔs aks dɛn se, “Una min se, ɔkɔ in padi dɛn kin kip fast we di ɔkɔ de wit dɛn? Wans di ɔkɔ insɛf de wit dɛn, dɛn nɔ go kip fast. 20Bɔt di tɛm de kam we pipul go jɔg di ɔkɔ kɔmɔt nain padi dɛn an, na da tɛm de in padi dɛn go kip fast.
21“Nɔbɔdi nɔ go tek nyu pisis fɔ pach in ol klos, bikɔs wɛn di nyu pisis de shrink, i go chɛr di ol klos ɛn di ples we chɛr go big pas aw i bin tan. 22Ɛn pɔsin nɔ go tek ol tin we dɛn tek bif kanda mek lɛkɛ bɔtul ɛn put nyu wayn insay, if i du dat, di nyu wayn go bɔs di bif kanda ɛn di wayn go wes. Dɛn fɔ put nyu wayn insay nyu bɔtul.”
Dɛn Aks Jizɔs Kwɛshɔn bɔt di De fɔ Pre ɛn Blo
(Matyu 12:1-8; Lyuk 6:1-5)
23Wande we fɔ pre ɛn blo, Jizɔs ɛn in lanin bɔy dɛn bin de pas midul wan kɔn fam; wɛn dɛn de go, Jizɔs in lanin bɔy dɛn brok sɔm pan di kɔn. 24Wɛn di Faresi dɛn si dat, dɛn tɔn to Jizɔs ɛn se, “Luk, yu lanin bɔy dɛn de du wetin di Lɔ se wi nɔ fɔ du di de fɔ pre ɛn blo.”
25Jizɔs se, “Una nɔ rid yet bɔt wetin Kiŋ Devid bin du wɛn in ɛn dɛn pipul we bin de go wit am bin aŋri bad? 26I go insay Gɔd in Os ɛn tek di bred we dɛn kin put bifo Gɔd, it sɔm ɛn gi dɛn pipul we bin de go wit am sɔm, pan ɔl we di Ju Lɔ se nɔbɔdi nɔ fɔ it da bred de, pas dɛn man we de mek sakrifays fɔ pipul sin. Da tɛm de na Abiata na bin di edman fɔ dɛn man we de mek sakrifays fɔ pipul sin.”
27Jizɔs se, “Gɔd mek di de fɔ pre ɛn blo fɔ mɔtalman, i nɔ mek mɔtalman fɔ di de fɔ pre ɛn blo. 28So Mɔtalman Pikin na Masta fɔ di de fɔ pre ɛn blo.”
Currently Selected:
Mak 2: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
