Mak 1

Wetin Jɔn we de Baptayz Tɛl Pipul

(Matyu 3:1-12; Lyuk 3:1-18; Jɔn 1:19-28)

1Na ya di Gud Nyuz bɔt Jizɔs Krays we na Gɔd in Pikin, bigin. 2Di Gud Nyuz bɔt Jizɔs Krays bigin lɛkɛ aw Gɔd in prɔfɛt we nem Ayzaya bin rayt, we i se:

“Gɔd se, ‘A go sɛn mi mɛsenja bifo yu

fɔ mek di rod rɛdi fɔ yu!’

3Sɔmbɔdi de tɔk lawd na di dɛzat se,

‘Una klia di rod we di Masta go pas;

mek di rod tret fɔ am fɔ waka!’”

4Jɔn we bin de baptayz pipul kam na di dɛzat, i bin de tɛl pipul se, if dɛn lɛf di sin we dɛn de pan ɛn mek i baptayz dɛn, Gɔd go padin dɛn. 5Plɛnti pipul we de na Judia ɛn Jerusɛlɛm go fɔ yɛri Jɔn. Di pipul dɛn tɛl Gɔd bɔt dɛn sin, bifo ɔlman we bin lib de, dɛn Jɔn baptayz dɛn na Riva Jɔdan.

6Na kamɛl ia dɛn bin tek mek di klos we Jɔn bin de wɛr ɛn na lɛda dɛn bin tek mek in bɛlt. I bin de it lokɔs ɛn ɔni. 7Wɛn i de tɔk to di pipul dɛn, i kin se, “Afta a dɔn dɔn mi wok, wan pɔsin we gɛt pawa pas mi go kam. A nɔ fit sɛf fɔ butu ɛn lus in sus. 8A dɔn baptayz una wit wata, bɔt in go baptayz una wit Gɔd in Spirit.”

Jɔn Baptayz Jizɔs

(Matyu 3:13–4:11; Lyuk 3:21-22; 4:1-13)

9Da tɛm de, Jizɔs kɔmɔt Nazarɛt we de na Galili go mit Jɔn, Jɔn baptayz am na Riva Jɔdan. 10Wɛn Jɔn dɔn baptayz Jizɔs, Jizɔs bin de kɔmɔt insay di wata, nain i si di klawd opin ɛn i si Gɔd in Spirit de kam dɔŋ te i kam pan am. Di Spirit bin de kam dɔŋ lɛkɛ aw dɔv kin kam dɔŋ. 11Dɔn dɛn yɛri vɔys we kɔmɔt na ɛvin de tɔk se, “Yu na mi yon Pikin we a lɛk ɛn a gladi fɔ yu!”

12Gɔd in Spirit mek Jizɔs go na di dɛzat wantɛm. 13Jizɔs bin de na di dɛzat fɔti de ɛn fɔti nɛt, ɛn Setan bin de tray am fɔ mek i du bad. Jizɔs bin de wit dɛn wayl bif na bush ɛn enjɛl dɛn bin de ɛp am.

Jizɔs Kɔl Fo Fishaman

(Matyu 4:12-22; Lyuk 4:14-15; 5:1-11)

14Wɛn Jɔn dɔn go jel, Jizɔs bigin go ɔlɔbɔt na Galili de tɛl pipul di Gud Nyuz we Gɔd sɛn. 15I bin de se, “Di tɛm dɔn rich. Di tɛm we Gɔd go rul wi, dɔn kam klos. Una tap fɔ du dɛn bad tin we una de du ɛn biliv di Gud Nyuz.”

16Wɛn Jizɔs bin de waka na di bich klos Lek Galili, i si tu fisha man dɛn, Saymɔn ɛn in brɔda Andru, de sɛn dɛn fishin nɛt na di wata. 17Jizɔs kɔl dɛn, i se, “Una kam bi mi lanin bɔy dɛn, ɛn a go sho una aw fɔ briŋ pipul kam to mi lɛkɛ aw una de kech fish.” 18Dɛn lɛf dɛn fishin nɛt wantɛm ɛn fala Jizɔs Krays.

19We dɛn go bifo say lili bit, nain Jizɔs si Jems ɛn Jɔn, tu brɔda we Zɛbidi na dɛn papa. Dɛn bin de insay bot de rɛdi dɛn fishin nɛt. 20Jizɔs kɔl dɛn fɔ fala am; nain dɛn lɛf dɛn papa Zɛbidi ɛn in wokman dɛn na di bot, ɛn fala Jizɔs.

Wan Man we Gɛt Dɛbul Insay Am

(Lyuk 4:31-37)

21Jizɔs ɛn in lanin bɔy dɛn go na wan tɔŋ we nem Kepanyɔm. Wɛn di de fɔ pre ɛn blo rich, Jizɔs go insay di Ju mitin os, ɛn bigin lan di pipul dɛn bɔt Gɔd. 22Di pipul dɛn wɔnda we Jizɔs de lan dɛn, bikɔs i bin de lan dɛn lɛkɛ pɔsin we gɛt di rayt fɔ lan pipul dɛn tin ya, i nɔ bin de lan dɛn lɛkɛ aw dɛn Ju Lɔ ticha bin de du.

23Da sem tɛm de, wan man we bin gɛt dɛbul insay am kam insay di Ju mitin os ɛn bigin ala se, 24“Jizɔs we kɔmɔt Nazarɛt, us biznɛs yu gɛt wit wi? Yu kam ya fɔ kil wi? A no udat na yu, a no se yu kɔmɔt to Gɔd ɛn yu dɔn gi Gɔd yu layf fɔ tru.”

25Bɔt Jizɔs se, “Lɛf fɔ tɔk, ɛn kɔmɔt insay di man.”

26Di dɛbul wap di man dɔŋ, i ala big wan, dɔn i kɔmɔt insay di man. 27Ɔl di pipul dɛn we bin lib de wɔnda sote dɛn bigin aks dɛn kɔmpin se, “Wetin dis? Na nyu tin i de lan wi! Dis man gɛt pawa fɔ tɛl dɛbul wetin dɛn fɔ du ɛn dɛn de du am!”

28Pipul bigin tɔk wantɛm ɔlɔbɔt na Galili bɔt di tin dɛn we Jizɔs du.

Jizɔs Mɛn Plɛnti Pipul

(Matyu 8:14-17; Lyuk 4:38-41)

29Jizɔs ɛn in lanin bɔy dɛn kɔmɔt na di Ju mitin os, dɛn go na Saymɔn ɛn Andru dɛn os. Jems ɛn Jɔn fala dɛn go insay di os. 30Saymɔn in mɔdɛnlɔ bin ledɔm bikɔs i bin gɛt fiva, so dɛn go tɛl Jizɔs wantɛm se Saymɔn in mɔdɛnlɔ nɔ wɛl. 31Jizɔs go ol di uman in an ɛn ɛp am fɔ grap, nain di fiva kɔmɔt pan am. I gi Jizɔs ɛn in lanin bɔy dɛn tin fɔ it.

32Di sem de, afta di san go dɔŋ, pipul briŋ ɔl kayn sik pipul ɛn dɛn wan we gɛt dɛbul insay dɛn, kam to Jizɔs. 33Ɔl di pipul dɛn na di tɔŋ go gɛda na Saymɔn ɛn Andru dɛn domɔt. 34Jizɔs mɛn ɔl kayn sik ɛn drɛb plɛnti dɛbul kɔmɔt insay pipul. Jizɔs nɔ gri fɔ mek di dɛbul dɛn tɔk, bikɔs dɛn bin no Jizɔs.

Jizɔs Tɛl Pipul Gɔd In Wɔd na Galili

(Lyuk 4:42-44)

35Ali mɔnin, bifo do klin gud, Jizɔs grap go pre na wan ples we pipul nɔ de. 36Saymɔn ɛn in kɔmpin dɛn go fɛn Jizɔs; 37wɛn dɛn si am, dɛn se, “Ɔlman de luk fɔ yu.”

38Jizɔs se, “Una lɛ wi go na di ɔda tɔŋ dɛn, so dat a kin tɛl di pipul dɛn de Gɔd in wɔd, bikɔs na dat mek a kam na dis wɔl.”

39Jizɔs go ɔlɔbɔt na dɛn Ju mitin os we de na Galili de tɛl pipul Gɔd in wɔd ɛn drɛb dɛbul kɔmɔt insay dɛn.

Jizɔs Mɛn Wan Man we Gɛt Bad Sik na In Skin

(Matyu 8:1-4; Lyuk 5:12-16)

40Wan man we bin gɛt bad sik nain skin kam nil dɔŋ bifo Jizɔs ɛn beg am se, “If yu gri fɔ mɛn mi, yu ebul mɛn mi ɛn mek a klin.”

41Jizɔs sɔri fɔ di man we gɛt di bad sik, i tret in an, tɔch di man ɛn se, “A want mɛn yu, wɛl naw!” 42Di bad sik kɔmɔt pan di man in skin wantɛm, ɛn i wɛl. 43-44Jizɔs wɔn di man traŋa wan, i se, “Nɔ tɛl nɔbɔdi natin bɔt wetin dɔn bi, bɔt go to di man we de mek sakrifays fɔ pipul sin fɔ mek i luk yu; dɛn mek di sakrifays we Mozis bin tɛl pipul fɔ mek. Dat go mek ɔlman no se yu dɔn wɛl.” Dɛn Jizɔs mek di man go.

45Bɔt di man go tɛl plɛnti pipul wetin Jizɔs du fɔ am, so di nyuz prɛd ɔlɔbɔt. Dat mek Jizɔs nɔ sho insɛf to pipul dɛn na ɛni tɔŋ igen, bikɔs di pipul dɛn bin tu plɛnti we kam mit am, so i go tap na ples we nɔbɔdi nɔ de. Bɔt pipul bin stil de kɔmɔt ɔlsay go mit am de.

Currently Selected:

Mak 1: KRIO13

Highlight

Copy