Lyuk 6
6
Dɛn Aks Kwɛshɔn bɔt di De fɔ Pre ɛn Blo
(Matyu 12:1-8; Mak 2:23-28)
1Wande we di Ju dɛn kin pre ɛn blo, Jizɔs ɛn in lanin bɔy dɛn bin de pas midul wan kɔn fam. Jizɔs in lanin bɔy dɛn brok sɔm pan di kɔn, pul dɛn kanda, ɛn it dɛn. 2Sɔm pan di Faresi dɛn se, “Wetin mek una de du tin we di Ju Lɔ se wi nɔ fɔ du di de fɔ pre ɛn blo?”
3Jizɔs aks dɛn se, “Una nɔ rid wetin Kiŋ Devid bin du wɛn in ɛn dɛn wan we bin de wit am bin aŋri? 4I go insay Gɔd in Os, tek di bred we dɛn bin put bifo Gɔd, it am ɛn gi dɛn wan we bin de wit am sɔm fɔ it, pan ɔl we di Ju Lɔ se nɔbɔdi nɔ fɔ it da bred de pas dɛn man we de mek sakrifays fɔ pipul sin.”
5Jizɔs tɛl dɛn se, “Mɔtalman Pikin na Masta fɔ di de fɔ pre ɛn blo.”
Da Man we In An Day
(Matyu 12:9-14; Mak 3:1-6)
6Wan ɔda de fɔ pre ɛn blo, Jizɔs go insay wan Ju mitin os ɛn lan di pipul dɛn. Wan man bin lib de we in raytan bin day. 7Sɔm dɛn Ju Lɔ ticha ɛn dɛn Faresi bin de wach Jizɔs fɔ si if i go mɛn di man di de fɔ pre ɛn blo, so dat dɛn kin blem am na kot. 8Bɔt Jizɔs bin no wetin dɛn de mekɔp, so i tɛl di man we in an day se, “Kam, tinap na ya!” Di man grap, go tinap midul di ples. 9Jizɔs se, “Mek a aks una sɔntin. Wetin wi Lɔ want wi fɔ du di de fɔ pre ɛn blo? Fɔ du gud ɔ fɔ du bad? Fɔ sev layf ɔ fɔ kil?” 10Jizɔs luk dɛn insay dɛn yay wan bay wan, dɛn i tɛl di man we in an day se, “Es yu an, tret am!” Di man du wetin Jizɔs tɛl am ɛn di an we bin day wɛl lɛkɛ di ɔda an.
11Di Ju Lɔ ticha dɛn ɛn di Faresi dɛn vɛks bad ɛn bigin tɛl dɛn kɔmpin wetin dɛn go du Jizɔs fɔ kech am.
Jizɔs Pik Twɛlv Man Dɛn
(Matyu 10:1-4; Mak 3:13-19)
12Wan ɔda tɛm, Jizɔs bin go ɔp wan il fɔ pre. I pre ol nɛt to Gɔd. 13Wɛn do klin, Jizɔs kɔl in lanin bɔy dɛn ɛn pik twɛlv pan dɛn we i kɔl apɔsul. 14I pik: Saymɔn (we i gi nem Pita) ɛn in brɔda Andru; Jems ɛn Jɔn, Filip ɛn Batalomyu, 15Matyu ɛn Tɔmɔs, Jems we na bin Alfiɔs in pikin, ɛn Saymɔn we bin de fɛt fɔ fri in pipul dɛn, 16Judas we na bin Jems in pikin, ɛn Judas Iskariɔt we sɛl Jizɔs.
Jizɔs Tich ɛn Mɛn
(Matyu 4:23-25)
17Wɛn Jizɔs kɔmɔt ɔp di il kam dɔŋ wit in apɔsul dɛn, i go tinap na di lɛvul grɔn wit plɛnti in ɔda lanin bɔy dɛn. Plɛnti pipul bin kam gɛda de, sɔm pan dɛn pipul ya bin kɔmɔt Judia, sɔm bin kɔmɔt Jerusɛlɛm, ɛn sɔm bin kɔmɔt na dɛn tɔŋ we de klos di wata na Taya ɛn Saydɔn. 18Dɛn bin kam fɔ yɛri Gɔd in wɔd ɛn fɔ mek Jizɔs mɛn dɛn. Jizɔs mɛn dɛn wan we dɛbul bin de insay. 19Ɔl di pipul dɛn bin de tray fɔ tɔch Jizɔs bikɔs pawa bin de kɔmɔt pan am we mɛn dɛn ɔl.
Blɛsin ɔ Waala
(Matyu 5:1-12)
20Jizɔs luk in lanin bɔy dɛn, dɛn i bigin tɔk to dɛn. I se:
“Una gɛt blɛsin, una dɛn po pipul,
bikɔs Gɔd de rul una!
21“Una gɛt blɛsin, una we aŋri naw,
bikɔs una go gɛt ɔl wetin una fɔ gɛt!
“Una gɛt blɛsin, una we de kray naw,
bikɔs wande una go laf!
22“Una gɛt blɛsin wɛn mɔtalman nɔ lɛk una ɛn dɛn nɔ want gɛt ɛnitin fɔ du wit una, ɛn wɛn dɛn de kɔs una ɛn tɔk bad bɔt una, bikɔs una biliv Mɔtalman Pikin ɛn una de fala am! 23Una fɔ gladi wɛn dat bi, una fɔ dans ɛn jomp bikɔs una go gɛt big pe we Gɔd dɔn kip fɔ una na ɛvin! Dɛn pipul we de du una dɛn tin ya, na so dɛn grampapa papa dɛn bin du di prɔfɛt dɛn.
24“Bɔt waala go kam pan una we jɛntri naw,
una dɔn gɛt ɔl di tin dɛn we dɔn mek una gladi!
25“Waala go kam pan una we gɛt ɔl wetin una want naw,
bikɔs tɛm de kam we una go aŋri!
“Waala go kam pan una we de laf naw,
bikɔs tɛm de kam we una go kray bita wan!
26“Waala go kam pan una wɛn ɔlman de tɔk gud bɔt una; na so dɛn grampapa papa dɛn bin du di lay prɔfɛt dɛn.
Una Fɔ Lɛk dɛn Wan we Nɔ Lɛk Una
(Matyu 5:38-48; 7:12a)
27“Bɔt a de tɛl una we de lisin mi se, una fɔ lɛk dɛn wan we de fɛt una ɛn una fɔ du gud to dɛn wan we nɔ lɛk una. 28Una fɔ blɛs dɛn wan we de kɔs una ɛn pre fɔ dɛn wan we de trit una bad. 29If ɛnibɔdi slap yu na wan jɔ, yu fɔ tɔn di ɔda wan gi am fɔ mek i slap insɛf. If ɛnibɔdi tek yu klos we yu wɛr pantap, yu fɔ gi am di wan we de bɔtɔm, mek i tek insɛf. 30If ɛnibɔdi aks yu fɔ ɛnitin, yu fɔ gi am, ɛn if ɛnibɔdi tek tin we na yu yon, yu nɔ fɔ aks am fɔ gi yu bak. 31Dɛn tin we una want mek ɔda pipul du to una, nain una fɔ du to dɛn.
32“If na dɛn wan we lɛk una nɔmɔ una lɛk, una fɔ gɛt prez fɔ dat? Dɛn pipul we bad sɛf, lɛk dɛn wan we lɛk dɛn! 33If una du gud to dɛn pipul nɔmɔ we de du una gud, wetindu una fɔ gɛt prez fɔ dat? Dɛn bad pipul sɛf de du dat. 34If una de lɛn dɛn wan we una no se go pe una, wetindu una fɔ gɛt prez fɔ dat? Dɛn bad pipul sɛf de lɛn dɛn kɔmpin bikɔs dɛn abop se dɛn go gɛt wetin dɛn lɛn, bak! 35Una fɔ lɛk dɛn wan we nɔ lɛk una ɛn du dɛn gud. Wɛn una de lɛn pɔsin sɔntin, una nɔ fɔ abop se i go gi una bak; da tɛm de una go gɛt big blɛsin fɔ dat ɛn una go bi Gɔd we pas ɔl, in pikin dɛn. Gɔd gud to pɔsin we nɔ de tɛl tɛnki ɛn to pɔsin we wikɛd. 36Una fɔ sɔri fɔ pipul lɛkɛ aw una Papa Gɔd de sɔri fɔ ɔlman.
Una Nɔ Jɔj
(Matyu 7:1-5)
37“Una nɔ jɔj ɔda pipul ɛn Gɔd insɛf nɔ go jɔj una. Una nɔ kɔndɛm ɔda pipul ɛn Gɔd insɛf nɔ go kɔndɛm una. Una padin ɔda pipul ɛn Gɔd insɛf go padin una. 38Una gi ɛn Gɔd insɛf go gi una, ɛn dɛn tin we i gi una, go so plɛnti, i go jɛs tan lɛkɛ wɛn dɛn ful kitul wit sɔntin, dɛn prɛs am, dɛn shek am ɛn i rɔnoba. If una gi plɛnti, Gɔd go gi una plɛnti; if una nɔ gi plɛnti, Gɔd nɔ go gi una plɛnti.”
39Jizɔs pul wan parebul, i se: “Blɛnyay pɔsin nɔ go ebul sho in kɔmpin rod, dɛn ɔl tu go fɔdɔm insay gɔta. 40Pɔsin we de lan nɔ pas di wan we de lan am, bɔt ɛnibɔdi we lan ɔl wetin i fɔ lan, gud, go sabi lɛkɛ di pɔsin we lan am.
41“Wetin mek yu de si smɔl tik we fiba lɛkɛ di wan we de go insay pɔsin fiŋa na yu kɔmpin in yay, bɔt yu nɔ de si da big tik we fiba bod we dɛn de tek bil os na yu yon yay? 42Aw yu go tɛl yu kɔmpin se, ‘Padi, kam mek a pul da smɔl tik de na yu yay’ we yusɛf nɔ de si di big tik na yu yon yay? Yu ipokrit! Go pul di big tik we de na yu yon yay fɔs, so dat yu go ebul si klia wan fɔ pul di smɔl tik we de na yu kɔmpin in yay.
Wan Tik ɛn di Tin we I Bia
(Matyu 7:16-20; 12:33-35)
43“Gud tik nɔ de bia bad tin fɔ it ɛn tik we nɔ gud nɔ de bia gud tin fɔ it. 44Yu go no if tik gud ɔ i nɔ gud bay di tin we i de bia. Pɔsin nɔ go pik fig pan tik we gɛt chuk chuk, ɛn pɔsin nɔ go pik greps pan bush we gɛt chuk chuk. 45Gud pɔsin de du gud bikɔs gud de nain at ɛn bad pɔsin de du bad bikɔs na bad ful nain at. Wetin de na pɔsin in at, we i de mɛmba ɔltɛm, nain de kɔmɔt nain mɔt.
Sɛnsman ɛn Fulman
(Matyu 7:24-27)
46“Wetin mek una de kɔl mi ‘Masta, Masta,’ bɔt una nɔ de du wetin a tɛl una? 47Ɛnibɔdi we kam to mi ɛn yɛri mi wɔd ɛn du wetin a tɛl am, tan lɛkɛ di pɔsin we a de kam tɛl una bɔt naw. 48I tan lɛkɛ pɔsin we de bil os. I dig di grɔn go dɔŋ dɔŋ ɛn le di fawndeshɔn pan akpata bifo i bigin bil. Plɛnti plɛnti wata kam ɔp te i rich di os, agbara bɔs pan di os, bɔt natin nɔ du di os bikɔs dɛn bin bil di os gud. 49Bɔt di pɔsin we yɛri mi wɔd ɛn i nɔ du wetin a tɛl am fɔ du, tan lɛkɛ wan man we bil in os, i nɔ le fawndeshɔn; i nɔ bɔda fɔ dig bifo i bigin bil. Wɛn plɛnti plɛnti wata kam ɔp te i rich di os ɛn agbara bɔs pan di os, di os fɔdɔm ɛn brok pata pata!”
Currently Selected:
Lyuk 6: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
