Lyuk 5
5
Dɛn Lɛf Ɔltin ɛn Fala Jizɔs
(Matyu 4:18-22; Mak 1:16-20)
1Wande, Jizɔs bin tinap nia di lek we dɛn kɔl Gɛnɛzarɛt. Di pipul dɛn bin de shub kam klos am fɔ yɛri Gɔd in wɔd we i bin de tɔk. 2Jizɔs si tu bot klos di bich, bɔt di fisha man dɛn nɔ bin de insay, dɛn bin de was dɛn fishin nɛt na di bich. 3Jizɔs go na Saymɔn Pita in bot ɛn tɛl am mek i mek di bot kɔmɔt klos di sho lili bit. Jizɔs sidɔm insay di bot ɛn bigin lan di pipul dɛn.
4Wɛn i dɔn lan dɛn dɔn, i tɛl Saymɔn Pita se, mek dɛn go wit di bot na di dip say na di wata ɛn sɛn dɛn nɛt dɔŋ de mek dɛn go kech fish.
5Saymɔn Pita se, “Masta, wi dɔn wok traŋa ol nɛt ɛn wi nɔ kech natin, bɔt as na so yu se, a go sɛn di nɛt.” 6Dɛn sɛn di nɛt ɛn kech fish sote dɛn nɛt bin want chɛr, 7so dɛn kɔl dɛn kɔmpin dɛn we bin de na di ɔda bot fɔ kam ɛp dɛn. Wɛn dɛn kam, dɛnsɛf ful dɛn bot. Ɔl tu di bot dɛn ful sote dɛn want sink. 8Wɛn Saymɔn Pita si wetin bi, i butu bifo Jizɔs ɛn ol in fut. I se, “Masta, kɔmɔt klos mi bikɔs mi na man we de pan sin!”
9Wɛn Saymɔn Pita ɛn in kɔmpin dɛn si aw di fish we dɛn kech plɛnti, dɛn wɔnda. 10Jems ɛn Jɔn we na Zɛbidi in pikin dɛn we bin de wok wit Saymɔn, dɛnsɛf wɔnda. Jizɔs se, “Saymɔn, nɔ fred! Frɔm tide sote go, yu go briŋ pipul kam to mi lɛkɛ aw yu bin de kech fish.”
11We dɛn dɔn drɔ dɛn bot kam na di bich, dɛn lɛf ɔltin we dɛn bin gɛt biɛn, ɛn fala Jizɔs.
Jizɔs Mɛn Wan Man we Gɛt Bad Sik na In Skin
(Matyu 8:1-4; Mak 1:40-45)
12Wande, Jizɔs bin go na wan tɔŋ; i mit wan man we bin gɛt bad sik nain skin. Wɛn di man si Jizɔs, i fɔdɔm na grɔn ɛn beg am se, “Masta, if yu gri fɔ mɛn mi, yu ebul mɛn mi ɛn mek a klin.”
13Jizɔs tret in an ɛn tɔch di man. I se, “A want mɛn yu. Wɛl naw!” Di bad sik kɔmɔt pan di man in skin wantɛm. 14Jizɔs se, “Nɔ tɛl ɛnibɔdi se a dɔn mɛn yu! Go wantɛm to di man we de mek sakrifays fɔ pipul sin mek i luk yu ɛn mek di sakrifays we Mozis bin tɛl pipul fɔ mek. Dat go mek ɔlman no se yu dɔn wɛl.”
15Ɔlman yɛri ɔl wetin Jizɔs de du. Plɛnti pipul kam fɔ yɛri Jizɔs ɛn fɔ mek i mɛn dɛn. 16Bɔt plɛnti tɛm Jizɔs kin lɛf di pipul dɛn go fawe fɔ pre.
Jizɔs Mɛn Wan Man we Paralayz
(Matyu 9:1-8; Mak 2:1-12)
17Wande we Jizɔs bin de lan di pipul dɛn, sɔm dɛn Faresi ɛn sɔm dɛn Ju Lɔ ticha bin sidɔm de; dɛn bin kɔmɔt ɔlɔbɔt na Galili, Judia, ɛn Jerusɛlɛm. Gɔd in pawa bin de pan Jizɔs fɔ mɛn sik pipul. 18Sɔm pipul tot wan man we paralayz na mata. Dɛn kɛr am go na di os we Jizɔs bin de fɔ le am na grɔn bifo Jizɔs. 19Dɛn bin want go insay di os wit di man, bɔt pipul bin plɛnti na di os, so di pipul dɛn nɔ bin ebul kɛr di sik man go insay. Dɛn klem pantap di os wit di sik man. Dɛn pul wan pat pan di ruf, dɔn dɛn sɛn di man go dɔŋ to Jizɔs midul di pipul dɛn. 20Wɛn Jizɔs si se di pipul dɛn we briŋ di sik man biliv se in go mɛn di man, Jizɔs tɛl di sik man se, “Padi, Gɔd dɔn padin yu sin dɛn.”
21Di Ju Lɔ ticha dɛn ɛn di Faresi dɛn bigin grɔmbul se, “Udat na dis man we de pwɛl Gɔd in nem we i de mek insɛf lɛkɛ Gɔd? Nɔbɔdi nɔ de we ebul padin pɔsin in sin; na Gɔd wangren ebul du dat!”
22Jizɔs bin no wetin dɛn de tink, so i se, “Wetin mek una de tink se wetin a du nɔ rayt? 23Pan dɛn tu tin ya, uswan traŋa fɔ tɔk pas ɔl, ‘Gɔd dɔn padin yu sin dɛn,’ ɔ ‘Grap, tek yu mata, waka go na yu os?’ 24A go sho una se Mɔtalman Pikin gɛt pawa na dis wɔl fɔ padin pɔsin sin.” So Jizɔs tɔk to di man we paralayz. I se, “Grap, tek yu mata ɛn go na yu os.”
25Aw ɔlman de luk, di man grap wantɛm, kapu in mata ɛn bigin waka go nain os, de prez Gɔd. 26Ɔlman wɔnda, dɛn fred, so dɛnsɛf bigin fɔ prez Gɔd. Dɛn se, “Wi dɔn si wɔnda tide!”
Jizɔs Kɔl Livay Fɔ Fala Am
(Matyu 9:9-13; Mak 2:13-17)
27We Jizɔs dɔn mɛn di man, i go na do. Na de i si wan man we de gɛda taks; i bin nem Livay. I bin sidɔm nain ɔfis. Jizɔs tɛl am mek i kam fala am. 28Livay grap, i lɛf ɔltin ɛn fala Jizɔs.
29Livay mek dɛn kuk big it nain os fɔ Jizɔs. Plɛnti pipul we bin de gɛda taks ɛn sɔm ɔda pipul dɛn bin de na di os ɛn dɛn ɔl bin sidɔm de it. 30Sɔm Faresi ɛn sɔm pan dɛn yon Ju Lɔ ticha dɛn bigin grɔmbul pan Jizɔs in lanin bɔy dɛn. Dɛn se, “Wetin mek una de it ɛn drink wit dɛn pipul we de gɛda taks ɛn dɛn ɔda pipul we nɔ fit fɔ miks wit Ju pipul?”
31Jizɔs ansa dɛn se, “Nɔto dɛn pipul we wɛl gɛt fɔ go to dɔkta, na dɛn pipul we sik. 32A nɔ kam fɔ tɛl dɛn pipul we de du wetin di Lɔ we Gɔd gi Mozis se fɔ chenj dɛn layf, a kam fɔ tɛl dɛn wan we de pan sin fɔ mek dɛn chenj dɛn layf.”
Jizɔs Lan Pipul Aw fɔ Kip Fast
(Matyu 9:14-17; Mak 2:18-22)
33Sɔm pipul go tɔk to Jizɔs. Dɛn se, “Jɔn in lanin bɔy dɛn de kip fast ɛn pre ɔltɛm, ɛn na so di Faresi dɛn lanin bɔy dɛn de du, bɔt yu yon dɛn jɛs de it ɛn drink.”
34Jizɔs aks dɛn se, “Wɛn una kɔl pipul kam na mared pati, una go tɛl dɛn mek dɛn nɔ it di tɛm we di ɔkɔ de wit dɛn? 35Di tɛm de kam we pipul go kɛr di ɔkɔ go ɛn i nɔ go de wit dɛn igen; na da tɛm de dɛn go fast.”
36Jizɔs pul wan parebul. I se: “Nɔbɔdi nɔ de tek pisis we i chɛr kɔmɔt pan nyu klos fɔ pach ol klos; if i du so, i go mek olpan di nyu klos we go pwɛl am, ɛn pantap dat, di ol klos go luk bad pas aw i bin tan, bikɔs di pisis we i chɛr kɔmɔt pan di nyu klos nɔ go bi di sem lɛkɛ di ol wan. 37Nɔbɔdi nɔ go tek ol tin we dɛn tek bif kanda mek lɛkɛ bɔtul, put nyu wayn insay, if i du dat, di nyu wayn go bɔs di bif kanda ɛn di wayn go wes. 38Dɛn fɔ put nyu wayn insay nyu bɔtul. 39Wɛn pɔsin dɔn drink ol wayn, i nɔ go want drink nyu wayn. I go se, ‘Di ol wan bɛtɛ!’”
Currently Selected:
Lyuk 5: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
