CHISƆSI 'A SƆ MƆƐ NU 17

Pɔɔ n ta‑a Tɛsadonika duu ɔ

1Mbɛ Pɔɔ an fea Sidasi a, an ben‑da Anfipɔdisi duu ɔ chia a, an fea Apodonia duu a. Mbɛ an na‑a Tɛsadonika duu ɔ, Chu mɔɛ n 'na samun chɛ chenɛ ni kaina min. 2Mbɛ Pɔɔ don‑da nɔ, yɔ a ta manda ni buɛ min dɔ. A sin wichi sawa ko a, an bɛ an na, an ni koe n tɛnsɛ wan, an nyɔn tɛ ɔ, Yataa 'a gboo ɔ. 3A ni a ɔ yian fan chɛndɛ chɛ, an ni a ɔ gbɛ, mbɛ ɛ nyan‑da wan chɛ ni ma. Mbɛ kunka mansa chɛ ɛ tɔɔya ɔ bia‑a wan, a ni a kɔɔ sɔ a ka saya ɔ. Pɔɔ ni a fɔ wan, a ɔ, “Chisɔsi chɛ, n mbe min bakoe ɔ yian tena wo a, an mu kunka mansa a.” 4A sin, an dɔ n dan‑da wan a a, min‑na a ma, an bea‑a Pɔɔ fɛ, an fea Sidasi a. Kiisi mɔɛ n sɛsɛ wɛɛ, miin ni kooya be Yataa ma, an bɛɛ‑a a ma ka wan, an bɛ musu gbakoo sɛsɛ a.

5Chɛɛ toomaya faa chɛ‑a wan Chu mɔɛ n dɔ, min‑na a ma, an‑na tataya tɔɛ n na sɔn sɔn dani ma ben‑da, gbunɛ a bea koe a. An ben‑da wan duu ɔ yee tɛ‑a, mbɛ an‑na butuinɛ a bea kamin dɔndɔ 'a chenɛ a. Kamin chɛ tɔ ni Chason. A ni wan an yii ma, mbɛ Pɔɔ an fea Sidasi a, an ni an bɔ nɔ, mbɛ an ta‑a an 'na mɔɛ n tena baa ma. 6Chɛɛ an ma an yen ni kɛn, an bea‑a gbɛ Chason fan ma, mbɛ an‑na a konkon, a basan Chisianɛ dɔ n na. Mbɛ an na‑a an na duu ɔ gbakoo n tena, an dɔ, “Mɔɛ chɛ n fan‑na dunya gbɛɛ a mun mun ben‑da. Sanche gbɛ, an na‑a nɛ mmɔ 'a duu wɛɛ ɔ, 7Chason chɛ sin fan‑na a boo si an kɔɔ. An gbɛɛ sin, an mbe Domi kun ti wa 'a sawa n fan yɔn tena. An mbe a fɔ tena wan, mbɛ mansa dɔ mende ɛ wan nɔ, min benden mu a ma. An dɔ, a tɔ mu Chisɔsi.” 8Mɔɛ chɛ n gbɛɛ, an bɛ an 'na duu ɔ gbakoo chɛ n na, an faa bɔ‑a wan, bai chɛ a min koe a. 9Duu ɔ gbakoo chɛ n‑na Chason na bɔnɔ wan, an bɛ a bɔɛ n na, yɔ an 'na sawa‑a min fɔ, mbɛ an‑na an boo ka, an ta koe a.

Mɔ sɛsɛ n‑na an kai fa Chisɔsi a, Bɛyia duu ɔ

10Pimbi ɛ bun‑da dechee, mbɛ mɔɛ miin‑na an kai fa Chisɔsi a, an‑na Pɔɔ a ta wan Bɛyia duu ɔ, an fea Sidasi a. An che‑a kɛn nɔ, an ta‑a wan Chu n 'na samun chɛ chenɛ a. 11Mɔɛ miin ni Bɛyia, an ta mɔya kɔ ni gbɛ, a ben chɛ n ma, miin ni Tɛsadonika. Koe min na mu, a ma bɛndenɛ ni, an too ma sɔ koe a Yataa 'a bai ma. Pɔɔ ni ma koɔ‑a tee ɔ tee a, an ni Yataa 'a gboo ma mɛn fan, a ɔ sɔn koe a, ni tea mu. 12Chɛ ko a, Chu mɔɛ n sɛsɛ‑a an kai fa wan Chisɔsi a. A yɛ to, duu ɔ gbakoo n sɛsɛ, musu an bɛ kai n na, miin ni Kiisi mɔɛ n na, an bɛɛ‑a an kai fa wan a a. 13Chɛɛ Chu mɔɛ chɛ nu Tɛsadonika, an‑na a a min kɛn, mbɛ Pɔɔ ɛ Yataa bai sa‑a Bɛyia wɛɛ, an na‑a wan nɔ. Mbɛ an bun‑da mɔ fanka chɛ a sɛ‑a Pɔɔ ma, gbunɛ a bea koe a. 14A ya kɔɔɛ a, mɔɛ chɛ nu nɔ, miin‑na an kai fa ka Chisɔsi a, an‑na Pɔɔ a ta kɔ yii da a. Chɛɛ Sidasi an fea Timoti a, an to‑a wan Bɛyia. 15Mɔɛ miin ta‑a Pɔɔ ma sɔ‑a, an ta‑a wan a a, aan a che Atɛnsi duu ɔ. Mbɛ Pɔɔ‑a mɔɛ chɛ n na yɛ Bɛyia, sakana chɛ a, an boo ɔ. A ɔ, an ni a fɔ, Timoti an fea Sidasi a, an ni na a san‑da, bui chɛ bui chɛ a.

Pɔɔ ɛ Atɛnsi duu ɔ

16Tima min na Pɔɔ n ni an ma kɔn tena, na koe a, a faa yɔn‑da wan yama yama. Koe min na mu, a‑a a ɔ yen fan, mbɛ Atɛnsi duu a faen fan ni fania yataa n na. 17Chɛ ko a, a ni ma wan Chu n 'na samun chen chɛ a. An bɛ an na, an ni koe n tɛnsɛ wan, an nyɔn tɛ ɔ. Mɔɛ chɛ n bɛɛ, miin ni kooya be Yataa ma, an ni ma wan nɔ. A yɛ to, Pɔɔ ni ta wan machiti ɔ tee ɔ tee a, mbɛ a‑a koe n tɛnsɛ chɛ n tena, miin ni che ma‑a nɔ. 18Kan chɛ mɔɛ dɔ nu to, miin ni kanɛ chɛ a si Ɛpikuyian koe ma, ni dɔ nu, miin ni kanɛ chɛ a si Sitoiki koe ma,#17:18 An ni mɔɛ n fan na miin bea‑a Ɛpikuyiɔsi fɛ, ni mɔ kuunɛ nu, an ni miin chee, an dɔ, Sitoiki nu. An ni gboo sɔn mɔɛ n fan na, miin ni an yiinachii wa chɛ, a si yiimatɛ ma ni tea koe n na. An ni tima sɛsɛ ya wan koe chɛ n tɛnsɛ koe a. an bɛɛ‑a Pɔɔ kɔɔsa bia wan. An dɔ, “Gboo kaa ma chɛ ɛ ka fen fɔ tena?”

Mbɛ dɔ n sin‑na a fɔ, an dɔ, “Mɔɛ ɛ a yen, yɔ ɛ ka bai sa tena, a si sonda yataa n fan ma.” An‑na chɛ fɔ koe min na, Pɔɔ ni Yataa bai sa tena, a si Chisɔsi an ma, ni a kɔɔ sɔ koe a, a ka saya ɔ. 19Mbɛ an‑na Pɔɔ ɔ tisa, an dɔ, a ni na duu gbakoo chɛ n tena, miin ni bɛn kɔnkɔɛ chɛ bu kɔɔ, an ni min chee, an dɔ, Ayiopakɔsi kɔnkɔɛ. Mbɛ an dɔ te, “Nn toen mu nn ni a ɔ sɔn, ni i 'a kan nama chɛ sien mu fenɛ min ma. 20Koe min na mu, nn sɛsɛ ma bai chɛ n na min nin bɛ, e ka miin fɔ tena. Chɛ an fɛ mu, nn toen mu, i ni an fasai nn ye.” 21Koe min na mu, Atɛnsi mɔɛ nu, ni sonda n bɛɛ miin ni nɔ, an gbɛɛ nii an 'na tima yɔn koe dɔ mende kan kɔ kan ma. An ni ma dechee bai n fan dɔ yian‑da, an mbe ta‑a an too ma sɔ‑a ko nama ma, tima ɔ tima ko a.

22Mbɛ Pɔɔ sɔ‑a duu ɔ gbakoo chɛ n ya kɔɔ, mbɛ a ɔ, “Atɛnsi mɔɛ nu, n‑na a ɔ yen, mbɛ chia ɔ chia a, wo toen mu kaka yataa sɛsɛ fai koe a. 23Koe min na mu, n mbe ma ben ben‑da wo 'a duu chɛ ɔ, n mbe fenɛ n yen fan, wo e miin fai. A yɛ to, n‑na gbengbe yen fan, yasi bɔ koe a, a nyɛndenɛ ɛ min ma, a ɔ, ‘Yataa tena, nn ma min sɔn.’ An Yataa chɛ, wo e min fai ka, chɛɛ wo sin ma a sɔn, n mbe ka gbɛ an bakoe ɔ yian tena wo a. 24Yataa, min‑na dunya a dan, a basan fen kɔ fen na, miin mbe a ɔ, an mu Mansa Yataa a dunya chɛ ɔ ni banda a. A sin mbe ee ma chenɛ a, mɔ gbu ɛ min sɔ a boo a. 25A sin, mɔ gbu boo ee ko chɛ a ko a, ni a toen mu ko kan kɔ kan na. A wan Yataa, an mbe fɔɛ be mɔɛ gbɛɛ ma, an mbe fia chɛ mɔɛ ɔ, a wan mbe fen kɔ fen be mɔɛ ma. 26A‑a mɔ gbu gbɛɛ nyan dunya chɛ ɔ, a bɔ mɔ kaima dɔndɔ gbe an dɔ. Mbɛ a‑a an na fasan dunya chɛ gbɛɛ ɔ ben‑da. A wandi gbu sin fan‑na a ɔ bɛn, mbɛ mɔ gbu n ni ma dunya gbɛɛ ɔ. Mɔɛ n sin mbe kaina min chee an 'na chɛnyɛ n na, a wan‑na a ɔ bɛn to an ma koe a nɔ, an tima chɛ kɔɔ. 27A‑a chɛ ma, min mbe a ma, an ni an ya a kan a a. Kɔkɔɛ an mbe a yen‑da wan, ni an‑na an boo mɛmɛ mɛmɛ. Chɛɛ Yataa gbu tena ɔ ma yansan, mmɔ dɔndɔ wɛɛ a. 28A ɛ wan dechee, yɔ mɔ dɔndɔ na‑a a fɔ buɛ min dɔ, a ɔ,

‘A 'a gbasaya ɔ mu mmɔ ɛ ben ben, a yɛ to, mmɔ ɛ ma fɔɛ chɛ ɔ.’

A ɛ wan, yɔ wo 'a gboo nyɛn mɔ wa dɔ n‑na a fɔ buɛ min dɔ, an dɔ te,

‘Mbɛ tea gbu ko a, a 'a denɛ n mu mmɔ gbɛɛ a.’

29Mmɔ mu gbɛ buɛ min dɔ Yataa 'a denɛ n na, mmɔ ma mmɔ yii na chii a bɔ nyɔɛ dɔ mende wa koe a. Mbɛ a bɔen mu fenɛ an na, min nyanden mu sanu ɔ, chɛ ma, kain gbɛ ɔ, chɛ ma, senɛ ɔ. Mɔ gbu wandi 'a yiinachii, a‑a miin nyan. 30Tima min na ni wo nii ma a ɔ sɔn, wo ni koe miin ma tena, Yataa‑a a ya ka a nɛnɛ a. Chɛɛ sanche gbɛ, ɛ a fɔ tena mɔ ɔ mɔ ye, dunya gbɛɛ ɔ, mbɛ an ni an kan kɔ sɔ an 'na ko yama n na. 31Koe min na mu, a‑a tee yian, ɛ tea gbɛmbo chɛ‑a mɔ gbu gbɛɛ a, dunya ɔ tee min ma. Ɛ a ma‑a wan, a na‑a a boo sɔ mɔɛ min ma, a ni mɔɛ n gbɛmbo. A sin‑na yiinatɛ be wan mmɔ ma, a‑a a ma kɛn, kamin chɛ‑a a kɔɔ sɔ, a ka saya ɔ.”

32An‑na a a min kɛn gbɛ, Pɔɔ‑a bai sa, a si mɔ gbu kɔɔ sɔ koe ma, a ka saya ɔ, dɔ n‑na a ma yɛn fan. Chɛɛ dɔ n sin, an dɔ, “Nn mbe to‑a wan to, nn ni bai a min, a si koe chɛ ma.” 33Mbɛ Pɔɔ bɔ‑a an bɛn chɛ ɔ. 34Mɔɛ dɔ n sa‑a wan a kaa a, mbɛ an‑na an kai fa Chisɔsi a. An mɔɛ chɛ n tɛ ɔ, mɔɛ ni wan nɔ min tɔ ni Diɔnisiɔsi, a sin ni gbakoo dɔndɔ an na bɛn chɛ ɔ. Musu dɔndɔ wɛɛ‑a a kai fa wan Chisɔsi a, min tɔ ni Damayisi, ni mɔ dɔ mende nu.

Currently Selected:

CHISƆSI 'A SƆ MƆƐ NU 17: KONONT

Highlight

Copy