CHISƆSI 'A SƆ MƆƐ NU 18

Pɔɔ‑a sakana bai chɛndɛ ɔ yian, a si Chisɔsi ma, Kɔyindi duu ɔ

1Chɛ gbakɔ, Pɔɔ bɔ‑a wan Atɛnsi duu ɔ, mbɛ a ta‑a Kɔyindi duu ɔ. 2Kɔyindi ni, a‑a Chu mɔ dɔndɔ tan, min tɔ ni Akuida, a sin suun‑da Pɔndɔsi chɛnyɛ ɔ wan. A na nama ni ka, a ka Itadi chɛnyɛ ɔ, an fea a 'a musu Pisida a. Koe min na mu, Domi kun ti wa chɛ, min tɔ ni Kaudiyɔsi, a na‑a sawa a ben fan, mbɛ Chu mɔɛ n gbɛɛ ni bɔ Domi duu ɔ. Pɔɔ ta‑a wan an yen koe a, 3mbɛ an bɛ ni wan an na. Koe min na mu, an bɛ ni wai dɔndɔ gbe an chɛ. Pɔɔ ni a 'a daun fenɛ ma sɔn tɛndi nyan wai an dɔ, yɔ Akuida wɛɛ, an fea a 'a musu a. 4Suin tee kan kɔ kan ma, a ni koe tɛnsɛ wan mɔɛ chɛ n tena, Chu n 'na samun chɛ chen chɛ a. A sin, a ni butuin chɛ tena wan, Chu mɔɛ nu, an bɛ Kiisi mɔɛ n na, an yiima ni mun Chisɔsi tena.

5Sidasi an fea Timoti a, an na‑a kɛn a ka Masidonia chɛnyɛ ɔ, Pɔɔ‑a a 'a tima gbɛɛ be Yataa bai sa koe an na. A ni wan a fɔ tena Chu mɔɛ n ye, Chisɔsi an mu kunka mansa a. 6An‑na a kɔɔsa bia wan, mbɛ an‑na bai yama gbɛɛ sa a ma. An‑na chɛ ma kɛn, Pɔɔ‑a a 'a doma ɔ gbɔngbɔn fan, ma koe a dasi a an tena. Mbɛ a‑a a fɔ an ye, a ɔ, “Ni wo ma bauncha ma sɔn ni, wo ee wo tɛɛ si‑a to n ma. Wo e wo tɛɛ si‑a gbɛ wo wandi an ma. A ka gbɛ sanche ma, n mbe Yataa bai sa‑a gbɛ chɛ n fan tena, miin ma Chu mɔ a.” 7Mbɛ a bɔ‑a an tɛ ɔ, a ta‑a kamin dɔndɔ 'a chenɛ a, min nii ma Chu mɔ a. A tɔ ni Titiyɔsi Chɔsitɔsi, min ni Yataa fai mɔɛ a. A 'a chenɛ ni Chu n 'na samun chɛ chen chɛ baima wan. 8Chɛ gbɛɛ ɔ, Kisipɔsi, ni a 'a chen 'na mɔɛ n gbɛɛ, an‑na an kai fa wan gbɛ Mansa Chisɔsi a. Kisipɔsi chɛ ni ya ɔ sɔɛ an na, Chu n 'na samun chɛ chenɛ a. Mɔ sɛsɛ nu Kɔyindi duu ɔ, an‑na sakana bai chɛ a min kɛn Pɔɔ a, an dan‑da wan a a, mbɛ yii chɛ‑a an kunɛ ɔ, Yataa chia a.

9-10Yɛɛ dɔndɔ ma, Mansa Yataa‑a koe ɔ yian fan Pɔɔ a, yɔ a ni cho an dɔ. Yataa‑a a fɔ wan Pɔɔ ye, a ɔ, “Pɔɔ, i ma chian, koe min na mu, n mbe i fɛ. Mɔ ɔ mɔ ee che ko yama ma‑a i a. E Yataa bai sa min na, a a tun, i ma sɛmbɛ. Koe min na mu, mɔ sɛsɛ n mbe wan nɛ duu chɛ ɔ, miin mu n 'na mɔɛ n na.” 11Chɛ ko a, Pɔɔ ni wan Kɔyindi duu ɔ, san dɔndɔ ni a tɔ, ɛ nɔ mɔɛ n kan‑da Yataa 'a bai n na.

12Chɛɛ an‑na Kadio ma tima min na kɔfana a, Akaya chɛnyɛ kun ma, Chu n‑na kuiɛ a kanɛ chɛ Pɔɔ ma, mbɛ an‑na a bia, an na‑a a a kɔfana chɛ 'a kuti ɔ. 13Mbɛ an dɔ, “Kamin chɛ toen mu, a ni a ma mmɔ 'a mɔɛ n yiima ni mun, Yataa fai gbee dɔ mende ma, mmɔ 'a sawa ma dɔn ni min ma.”

14Chɛɛ Pɔɔ toen ni kɛn a ni koɔ, Kadio‑a a fɔ wan Chu chɛ n ye, a ɔ, “Wo wan Chu nu, a ni nyan‑da wan, n ni n too ma sɔ wo ma. Ni kamin chɛ na‑a sawa an yɔn, chɛ ma, a ni ko yama wa ma. 15Chɛɛ a sien mu ka buɛ min dɔ kɔɔsa bia ma, bai n dɔ, a basan tɔɛ n na, ni wo ta Chu sawa nu, wo wandi an mbe bai chɛ nɛnɛ sa tena. N fan mbe ee kaa a tɛ tena, a si ko bonda chɛ n ma.” 16Mbɛ a‑a an gbain, an kuti gbu ɔ. 17Mbɛ an gbɛɛ bea‑a Sositɛnesi ma gbasi a, min ni ya ɔ sɔɛ a, Chu n 'na samun chɛ chenɛ kun ma. An‑na a gbasi wan, kuti chenɛ gbu ya kɔɔ. Chɛɛ Kadio‑a a ka wan a too kɔ.

Pɔɔ yɛ‑a Andiɔki duu ɔ

18Koe chɛ maenɛ gbakɔ, Pɔɔ ni wan Kɔyindi tee kuun ko a. Mbɛ a‑a a saa suun ma nyɔɛ chɛ n na nɔ Chasi ɔ, a si‑a dɛndɛ ɔ, an bɛ Pisida an fea a chɛɛ Akuida a, ta koe a Siyia chɛnyɛ ɔ. An mbe e na to si‑a dɛndɛ ɔ, a ka Sɛnkea duu ɔ, an‑na a kunɛ gbanan fan. Koe min na mu, a na‑a a kai wan tee a kɔma a, Yataa tena. 19An che‑a kɛn Ɛfisɔsi duu ɔ, Pɔɔ n tɛ du‑a wan Pisida, an fea a chɛɛ Akuida a. A ta‑a wan Chu n 'na samun chɛ chen chɛ a, koe n tɛnsɛ koe a, an bɛ Chu mɔɛ chɛ n na nɔ Ɛfisɔsi. 20An‑na a ɔ tisa kɛn, a ma koe a nɔ tima ɔ yansama ko a, a nii ma dɔn ni. 21Chɛɛ a ni kɛn a saa an na, a‑a bai chɛ an fɔ an ye, a ɔ, “Ni Yataa dɔn‑da, n mbe yɛ‑a wan to wo tena.” Mbɛ a si‑a dɛndɛ ɔ, a ka Ɛfisɔsi, mbɛ a ta‑a.

22A che‑a kɛn Sisayea duu ɔ, a bɔ‑a wan dɛndɛ ɔ, mbɛ a sɛ‑a Chuusaɛn. A che‑a kɛn nɔ, a‑a chɔchi mɔɛ n kɔndɔn fan, mbɛ a ben‑da, a ta Andiɔki duu ɔ. 23A‑a tima ɛnden ya kɛn nɔ wɛɛ, a bɔ‑a wan nɔ, mbɛ a ta‑a Kadesia an fea Fichiya chɛnyɛ ɔ a. A ta‑a wan duu sɛsɛ ɔ, an chɛnyɛ chɛ n dɔ. A ni wan a ma tena, Chisɔsi fɛ mɔɛ n gbɛɛ, an dɔ ɛ gbɛa‑a.

Apɔdɔsi‑a Yataa bai sa, Ɛfisɔsi an fea Kɔyindi duu ɔ a

24A tima chɛ a, Chu mɔ dɔndɔ, min tɔ ni Apɔdɔsi, min suun‑da Adɛsandia duu ɔ, a na‑a wan Ɛfisɔsi duu ɔ. A ni kosan kaka bai sa a, a sin to, a‑a Yataa 'a gboo ɔ gbɛ wan chɛndɛ chɛ. 25A kanden fan ni gbɛ, chia chɛ ma, Mansa Chisɔsi‑a min yian. A sin ni bai sa wan a si Chisɔsi ma, a sɔɛ gbɛɛ a, paa ee a ma. A‑a chɛ ma wɛɛ, chɛɛ a‑a koe chɛ an dɔ gbɛ dechee, min sien ni yii chɛ ma mɔɛ n kunɛ ɔ, Yataa chia a, Chɔn na‑a min fɔ. 26A‑a a kuu sɔ wan koɔ‑a, faagbɛa a, Chu n 'na samun chɛ chen chɛ a. Chɛɛ Pisida an fea a chɛɛ Akuida a, an‑na a da a bai chɛ a min kɛn, an‑na a ya wan, an ta‑a a a an 'na chenɛ a. Mbɛ an‑na chia chɛ wakoe ɔ yian a a chɛndɛ chɛ, Yataa‑a min yian. 27Chɛ gbakɔ, a toen ni kɛn a ni ben Akaya chɛnyɛ ɔ, suun ma nyɔɛ chɛ nu Chasi ɔ, an‑na a faa ma nande wan. Mbɛ an‑na gboo nyɛn an suun ma nyɔɛ chɛ n tena Akaya, an dɔ, an ni an boo si a kɔɔ chɛndɛ chɛ. A che‑a kɛn Akaya, a basan‑da wan mɔɛ chɛ n ma kaka, miin na‑a an kai fa Chisɔsi a, koadia demanɛ 'a gbasaya ɔ, Yataa ɛ min chɛ. 28Koe min na mu, a ni ma koe n tɛnsɛ‑a, Chu mɔɛ n nii sɔ a a ɛnden bɛɛ a. A‑a a ɔ yian fan an na, a ka Yataa 'a gboo ɔ, mbɛ kunka mansa mu Chisɔsi an na.

Currently Selected:

CHISƆSI 'A SƆ MƆƐ NU 18: KONONT

Highlight

Copy