VAROMA 8

Khuli Mwoyo mu Roho wa Nyasaye

1Khulwa yako, vandu vali mwoyo nunundi mu Yesu Kristo, valiitsa khuvula khukhalachilwa; 2shichila malako ka Roho ahaananga, kachilanga nimba mwoyo mu Yesu Kristo, kamboholola khurula mu malako ku vwoni nende likhutsa. 3Nyasaye yakhola ka malako kakhaywa khukhola, shichila liiva liu mmbili liali nu vuteteshele. Nyasaye yakhalachila vwoni mu liiva liu mmbili, lwa mwene yaruma Mwana wewe, khwitsa mu liiva khuli liiva liu vwoni liu mundu, khurulitsaho vwoni. 4Nyasaye yakhola kenako, khu lienya li likhola liu vulunji khulondokhana khu malako litushi khurweshitswa mu khutsi va khuli mwoyo mu Roho; navutswa shikali khulondokhana khu liiva liu mmbili tawe. 5Yavo vamenyanga khulondokhana khu liiva liavo liu mmbili, vavikhanga tsinganakani tsiavo khu liiva liu mmbili lienelo; navutswa yavo vali mwoyo mu Roho, vavikhanga tsinganakani tsiavo khu vindu via Roho ahaananga. 6Khuvikha tsinganakani khu liiva liu mmbili khuleranga likhutsa; navutswa khwimililwa na Roho khuleranga vulamu nende milembe. 7Mundu wimililwangwa ni liiva lielie liu mmbili, avetsanga mutsiku wa Nyasaye; shichila avula tsingulu tsiu khulonda malako ka Nyasaye. Ni kilikali, akhaywangwa khukalonda. 8Vandu vimililwangwa ni liiva liavo liu mmbili, shivanyala khuyaanzitsa Nyasaye tawe.

9Navutswa munyi shiumumenyanga khulondokhana khuli liiva lienyu liu mmbili limwimililanga tawe; navutswa muli mwoyo khuli Roho amwimililanga, niiva ni kilikali, Roho wa Nyasaye ali mwoyo mu munyi. Mundu uvula Roho wa Kristo, shiali wewe tawe. 10Navutswa niiva Kristo ali mwoyo mu munyi, Roho neye vulamu vwenyu, shichila mwakholwa khuva valunji imbeli wa Nyasaye, khali niiva mivili chienyu khutukha chive ni chikhutsanga shichila vwoni. 11Niiva Roho wa Nyasaye, wisimushitsa Yesu khurula mu likhutsa, ali mwoyo mu munyi, khali woyo wisimushitsa Kristo khurula mu likhutsa, aliitsa khuha mivili chienyu chitushili khukhutsa vulamu khuvirila mu Roho wewe uli mwoyo mu munyi.

12Vasuuvili vashianje, khuli nu muhinzilu kwa khwenyekhanga khukhole; navutswa shikali nu khumenya khulondokhana khuli liiva lieru liu mmbili likhwimililanga tawe. 13Niiva mulamenya khulondokhana khuli liiva lienyu liu mmbili limwimililanga, muliitsa khukhutsa; navutswa niiva muliitsa khumenya khulondokhana khu Roho, nu khulekha khukhola vwoni, muliitsa khuva mwoyo. 14Vandu va Roho wa Nyasaye yimililanga, navo vaana va Nyasaye. 15Roho, wa Nyasaye yamuha shianyala khumukhola khuva varukwa numuria tawe. Nikhali, Roho amukholanga khuva vaana va Nyasaye; khandi khuvirila mu tsingulu tsia Roho, khulilanga nu khulaanga Nyasaye, “Aba, Tata!” 16Roho wa Nyasaye ahaambananga ni mioyo chieru khuhaana vushiahidi ndi khuli vaana va Nyasaye. 17Lwa khuli vaana veve, khuliitsa khunyola tsikhaavi tsia yavishila vandu veve. Khuliitsa khunyola halala na Kristo shia Nyasaye yamuvishila. Niiva khulasanga mulinyakhana lia Kristo yanyakhana, khuliitsa khusanga khali naye mu vukhumi vwevwe.

Vukhumi vwa Khuliitsa Khunyola

18Mbukulanga linyakhana lia khunyakhananga mumatukhu kanu, khuli ni li shikhaya nusasanyinye khu vukhumi vwa khutsitsanga khumanyinywa. 19Shia shindu shiosi shialoongwa, shilindililanga ni likomba linyishi, khulola Nyasaye naloleshitsi vaana veve. 20Shia shindu shiosi shialoongwa shiakhalachilwa khukoritsa ka shitushili khukhola, shiliali ni lienya liashio tawe; navutswa Nyasaye yali ni lienya kikholeshe kario. Nikhali, lisuuvilitswa lialiho 21ndi litukhu lilala shia shindu shiosi shialoongwa, shilitsa khuvohololwa khurula mu vurukwa vu khukuunda, nu khusanga mu vukhumi vu vuvoholole vwa vaana va Nyasaye. 22Khwamanya ndi khutukha nunundi shia shindu shiosi shialoongwa shililanga ni isalila indulu, isalila khuli yu mukhali wenyanga khwivula mwana. 23Shikali ni shindu shialoongwa shionyene shililanga tawe; navutswa khali khutsi va khuli na Roho, khuli shihanwa shiukhuraanga khu vihanwa via Nyasaye khulilanga khandi, lwa khulindililanga Nyasaye khukhukhola khuva vaana veve, nu khukhuvoholola. 24Lisuuvilitswa, nalio liachila nu khuhonyinywa; navutswa niiva khunyala khulola shia khwasuuvilitswa, shilili ni lisuuvilitswa liatoto tawe. Ni viina unyala khuva ni lisuuvilitswa mu shindu shialolanga ni tsimoni tsietsie? 25Navutswa niiva khuli ni lisuuvilitswa mu shia khuvulanga khulola, nalwo lwa khulindililanga ni likhutsila.

26Khali ndio, Roho akhukhonyanga, lwa khuli vateteshele; shichila khwakorwa khuli khunyala khusaala. Navutswa Roho mwene, neye ukhureevelanga khu Nyasaye makhuva keru ka khwenyanga khukholelwi khuvirila mulilila lia khunyala khuvula khwivaalakhu na makhuva. 27Nyasaye, ulolanga kali mu mioyo chieru, wamanya ka Roho yenyanga kakholwi; shichila Roho areevelanga vandu va Nyasaye khu Nyasaye khulondokhana khu lienya lia Nyasaye.

28Khwamanya ndi mu shia shindu shiosi, Nyasaye akholelanga vandu vamuyaanza vindu vilahi, khushila muno yavo vayalaanga khulondokhana khu lienya lielie. 29Yavo va Nyasaye yali niyarovola, yavahula haluveka khandi vave khuli Mwana wewe, khu Mwana aliva wukhuraanga mu vasuuvili vanyishi. 30Yavo va Nyasaye yali niyahula haluveka, yavalaanga. Yavo vayalaanga, yavakhola khuva valunji imbeli wewe, khandi nasanga navo mu vukhumi vwevwe.

Yesu Kristo Wamanyinya khuli Nyasaye Yakhuyaanza

31Ni shina shia khunyala khuvoola khurulana khu kenako koosi? Niiva Nyasaye ali na khutsi, ni viina unyala khukhukwana? 32Nyasaye, shikali yavelela Mwana wewe tawe, navutswa yamuhaana shichila khutsi voosi. Niiva yakhukholela kenako, khali aliitsa khukhuha naye shia shindu shiosi. 33Ni viina unyala khulomoloma likhuva litamanu khu vandu va Nyasaye yarovola? Nyasaye neye mwene wu vakholanga khuva valunji. 34Ni viina unyala khuvakhalachila? Shianyala khuva ni Yesu Kristo wakhutsa, inoho wisimushitswa khurula mu likhutsa khandi wikhalanga khuluveka lu mukhono musatsa kwa Nyasaye, nakhureevela khu Nyasaye tawe. 35Ni viina unyala khukhwahula haluveka khurula khu vuyaanzi vwa Kristo? Toto, kanyala khuva vutiinyu inoho linyakhana inoho khutambitswa inoho inzala inoho vumanani inoho maraava inoho likhutsa? 36Khuli Mahandiko Matakatifu kavoolanga,

“Shichila munyi, khuli mu maraava ku khwiirwa khulitukhu liosi;

khuvukulwangwa khuli makondi katsitsanga khusinzwa.”

37Shikali kario tawe, navutswa khuli ni tsingulu tsiatoto tsiu khukuura khuvirila mu vukhonyi vwa woyo wa khuyaanza! 38Ni kilikali, manyi ndi shindu shiosi shivulakhuho shinyala khukhwahula haluveka khurula khu vuyaanzi vwevwe: khali likhutsa inoho vulamu, khali tsinjelosi inoho vamihi vandi vu mwikulu inoho vi tsingulu, khali matukhu kanu inoho matukhu kaliitsa khuvaho. 39Khali ikulu wi likulu inoho hasi mulilova, shindu shiosi khurula mu vindu vialoongwa viosi, shivula tsingulu tsiu khukhwahula haluveka khurula khu vuyaanzi vwa Nyasaye vwa khuli navwo mu Mwami weru Yesu Kristo.

Currently Selected:

VAROMA 8: LLLCATHOLIC

Highlight

Copy