VAROMA 7

Shimanyilu shiu Khuhilana khu Musatsa nu Mukhali

1Vasuuvili vashianje, ni kilikali, muliitsa khumanya makhuva ka nyenyanga khuvoola, shichila munyi voosi mwamanya malako. Malako kali ni tsingulu tsiu khwamiha mundu nashili mwoyo. 2Mukhali wahilwa nu musatsa wavohwa na malako khu musatsa wewe, musatsa mwenoyo nashili mwoyo; navutswa niiva musatsa wewe aliitsa khukhutsa, aliitsa khuva muvoholole khurula khu malako ka muvoha. 3Khumeeta khu kenako, niiva musatsa wundi aliitsa khuhila mukhali mwenoyo, musatsa wewe nashili mwoyo, alalaangwa mukhali muheeyi. Navutswa niiva musatsa wewe aliitsa khukhutsa, aliitsa khuva muvoholole khurula khu malako kenako. Niiva musatsa wundi aliitsa khumuhila, shianyala khulaangwa mukhali muheeyi tawe. 4Khali munyi vasuuvili vashianje, mwakhutsila malako khuvirila mu mmbili kwa Kristo, khu muve wu wundi, va woyo wisimushitswa khurula mu likhutsa, khulu khukhola muhinzilu mulahi kwa Nyasaye. 5Lwa khwamenyanga khulondokhana khu liiva lieru liu mmbili, likomba liu khukhola vwoni liameetekha mu khutsi shichila malako, nilikhulerela likhutsa. 6Navutswa nunundi khwavohololwa khurula khu malako, shichila khwakhutsila yeshio shiali ni shiakhuvoha. Shikali khukholanga muhinzilu khulondokhana khu limenya lia khale lia malako kahandikwa tawe; navutswa khulondokhana khu limenya liyia lia Roho ahaananga.

Malako Kachilanga Vandu Vakhola Vwoni

7Ni shina shia khunyala khuvoola? Malako nu vwoni? Shikali kario tawe! Khali ndio, malako nako kachila nimanya vwoni ni shina. Niiva malako kakhavuli khuvoola, “Uvuli khwikomba shindu shia woshio ali nashio,” shinakhamanyi likomba khuli lienelo tawe. 8Navutswa vwoni, lwa vwanyola vwiyangu mu lilako, vwinjilitsa mwinzi vindu viu khwikomba vinyishi lukanu na lukanu. Malako nikakhaveleho, vwoni ni shindu shiakhutsa. 9Matukhu kandi, inzi mwene namenyanga vuchila Malako; navutswa lwa Lilako liitsa, vwoni vwanyola tsingulu, 10nikhutsa. Lilako liali ni liaviritswa khulera vulamu vwatoto liandelera likhutsa. 11Vwoni, lwa vwanyola vwiyangu khuvirila mu lilako, vwangatilitsa nu vunziira khuvirila mu malako.

12Khulwa yako, Malako ni matakatifu, khandi lilako ni litakatifu, li likhola liu vulunji, khandi ni lilahi. 13Navutswa kanyala khuva kilikali, shindu shilahi nashio shianderela likhutsa? Shikali kario tawe! Vwoni, navwo vwakhola muhinzilu kwi likhutsa mwinzi, lwa vwarumishila shindu shilahi, khwenya vwoni vumanyikhane khuva vwoni. Khali vwoni vulolekhanga khuva vutamanu, khuvirila khu Malako.

Vwavukhani mu Tsinganakani tsiu Mundu

14Khwamanya ndi malako ni ka roho; navutswa inzi nu mundu wu mmbili kwimililanga, wakuulitswa khuli murukwa khukhola vwoni. 15Shinyala khumanyakhu shia kholanga tawe. Shikholanga ka nganakananga khole tawe; navutswa kholanga ka mbula khuyaanza khukhola. 16Khulwa yako, niiva kholanga kakhayaanzi khukhola, mbuchililanga ndi malako ni malahi. 17Khulwa yako, shiali ninzi mwene kholanga kenako tawe; navutswa vwoni vuli mwinzi, navwo vuchilanga nikhola. 18Manyi ndi shindu shivulakhuho shilahi shia kholanga, nakhwo khuvoola mu liiva lianje liu mmbili. Khali niiva nzikombanga khukhola malahi, navutswa shinyala khukakhola tawe. 19Shikholanga malahi ka nganakananga khukhola tawe; navutswa vindu vitamanu via mbula khuyaanza khukhola, navio viakholanga. 20Niiva kholanga ka mbula khuyaanza khukhola, kamanyinyanga ndi shiali ninzi wu kholanga tawe; navutswa vwoni vuli mwinzi, navwo vuchilanga nikhola.

21Khulwa yako, kavukulanga khuli ni malako, shichila ninyenyi khukhola ku vulunji, nalwo lwa kholanga vindu vitamanu. 22Nyanzililanga nu mwoyo kwosi mu malako ka Nyasaye; 23navutswa ndolanga mu vivelo vianje malako kandi lukanu nikahinganyinya kandi nako mu mwoyo kwanje; khandi kakholanga khuva muvohe khu malako kaleranga vwoni, vwa inzi mwene kholanga. 24Ndi mundu uvulakhu vuyaanzi vwosi! Ni viina unyala khundulitsa mu mmbili kutushili khukhutsa yuku? 25Sanditsanga Nyasaye, wu kholanga kenako khuvirila mu Mwami weru Yesu Kristo!

Khulwa yako, inzi mwene ndumishilanga malako ka Nyasaye konyene ni tsinganakani tsianje; navutswa mmbili kwanje kurumishilanga malako kachilanga vwoni nu vwikholekha.

Currently Selected:

VAROMA 7: LLLCATHOLIC

Highlight

Copy