VAROMA 6

Khuli Mwoyo Shichila Kristo

1Ni shina shia khunyala khuvoola khulondokhana khu kenako? Khutsililile khukhola vwoni mu vunyishi, khu khunyole tsimbavasi tsia Nyasaye? 2Shikali kario tawe! Khutsi, va khwakhutsila vwoni, khunyala ndina khutsililila khukhola vwoni? 3Mushili khumwamanyakhu ndi khutsi voosi, lwa khwabatiswa khuvirila mu Yesu Kristo, khwabatiswa khuvirila mu likhutsa lielie? 4Khulwa yako, khwakhutsa nu khuyeveelwa mu shilindwa naye, khuvirila mu libatiswa lieru, khu khuliva nu vulamu vuyia, khuli Kristo yisimushitswa khurula mu likhutsa khuvirila mu tsingulu tsiu vukhumi tsia Tata.

5Niiva khwahambanyinywa naye mu likhutsa lielie lia yakhutsa, nindio khandi khuliitsa khuhambanyinywa naye mu lisimushitswa lielie khurula mu likhutsa. 6Khwamanya ndi liiva lieru lia khale liavambwa khu musalaba na Kristo, khu liiva liu khukhola vwoni liononyinywi, khandi khuvuli khuva varukwa vu khukhola vwoni. 7Lwa mundu akhutsanga, avetsanga muvoholole khurula mu vwoni. 8Navutswa niiva khwakhutsa na Kristo, khuli ni lisuuvila khandi ndi khuliitsa khuva mwoyo naye. 9Khwamanya ndi lwa Kristo yisimushitswa khurula mu likhutsa, aliitsa khuvula khukhutsa. Likhutsa livula tsingulu tsiu khumwamiha. 10Likhutsa lia Kristo yakhutsa, yakhutsila vwoni lulala lwonyene. Navutswa nunundi ali mwoyo, shichila ali mwoyo mu Nyasaye.

11Khali munyi vene, khutukha mwivukuli khuli mwakhutsila vwoni, navutswa muli mwoyo shichila Nyasaye khuvirila mu Yesu Kristo.

12Khulwa yako, vwoni vuvuli khunyolakhu vwiyangu vu khwamiha mivili chienyu chitushili khukhutsa, khumukhola khulonda likomba lienyu litamanu liu mmbili. 13Muvuli khuhaana vivelo vi mivili chienyu khuva khuli vindu vichilanga nu mukhola vwoni. Navutswa mwihaane vene khu Nyasaye, khuli vandu visimushitswa khurula mu likhutsa, nivanyola vulamu; khandi mwihaane vene khuye khu murumishilwi khukhola ku vulunji. 14Vwoni vuvuli khumwamiha, shichila malako shikamwimililanga tawe; navutswa tsimbavasi tsia Nyasaye natsio tsimwimililanga.

Khutukha khukhole ku Vulunji

15Khulwa yako, ni shina? Khukhole vwoni, shichila malako shikakhwimililanga tawe, navutswa tsimbavasi tsia Nyasaye, natsio tsikhwimililanga? Shikali kario tawe! 16Mushili khumanyakhu ndi nu mwihaana vene khu mundu, munyala khumukholela muhinzilu khuli varukwa. Khali ndio, muli varukwa vu muruchi wamulondanga malako keke -- kave nu vwoni, vuleranga likhutsa, inoho khulonda malako, kachilanga nu khukholwa khuva valunji imbeli wa Nyasaye. 17Navutswa sanditsanga Nyasaye, shichila munyi, lwa mwali numuli varukwa vu vwoni, mwahuchilila nu mwoyo mulala khulonda katoto kanyolekhanga mu mechitso ka mwechitswa. 18Mwavohololwa khurula mu vwoni, numuva varukwa vu khukhola ku vulunji. 19Mbolanga makhuva yaka mululomolomo lu mundu wosi anyala khuhulila, lwa muli vateteshele mu liiva lienyu. Matukhu kandi khuli lwa mwali nu mwihaana vene khuva varukwa vu khukhola shifwavi nu khumeetelela vwoni; mwenyekhanga mwihaane vene nu mwoyo mulala khuli varukwa vu khukhola ku vulunji, khulu khukholwa vatakatifu.

20Lwa mwamenyanga khuli varukwa vu khukhola vwoni, mwali mwavohololwa khu mukhole ku vulunji. 21Nu vukhala shina vwa mwanyola, lwa mwakhola vindu via mulolanga nunundi ni tsisoni numukholi? Likhutsa linyolekhanga khurulana khu vindu khuli vienevo! 22Navutswa nunundi lwa mwavohololwa khurula mu vwoni; khandi muli varukwa va Nyasaye, vukhala vwenyu vwa muliitsa khunyola nu vuve vutakatifu; vumalilishilanga mu vulamu vwi mihika ni mihika. 23Murungu ku khukhola vwoni ni likhutsa; navutswa shihanwa shia vutswa shia khunyolanga khurula khu Nyasaye nu vulamu vwi mihika ni mihika khuvirila mu Mwami weru Yesu Kristo.

Currently Selected:

VAROMA 6: LLLCATHOLIC

Highlight

Copy