VAROMA 9
9
Vandu va Nyasaye
1Nomolomanga katoto kene mu Kristo. Shingatanga tawe. Tsinganakani tsianje tsiu mukari, tsia Roho Mutakatifu yimililanga, tsisuuvilitsanga ni kilikali; 2lwa mbolanga ndi nu vuveleli vunyishi nende isalila ikhavwetsanga mu mwoyo kwanje; 3shichila vandu vaanje, nu kuli musahi kwanje mwene! Nakhayaanzi Nyasaye anaame khandi anzahule haluveka khurula khu Kristo shichila vo. 4Navo vandu va Nyasaye; neye wa vakhola khuva vaana veve khandi navamanyinya vukhumi vwevwe. Yakhola lilakano lielie navo, khandi navaha malako; khuli vanyala khusaala khu Nyasaye munjila yatoto; vamala khunyola lilaaka lia Nyasaye; 5navo vitsukhulu vivulwa na vakuuka vamanyikhana mu Vahebrania; khandi Kristo, khuli lwali mundu arulanga mu vandu vuluhia lwavo. Nyasaye, wamihanga shia shindu shiosi, aheelwi vukhumi mihika ni mihika! Amina.
6Shikali mbolanga ndi likhuva lia Nyasaye liakhaywa khurweshitswa tawe. Shikali Vaisraeli voosi, navo vandu va Nyasaye; 7inoho shikali vitsukhulu voosi va Aburahamu, navo vaana va Nyasaye tawe. Nyasaye yavoolela Aburahamu, “Uliitsa khwivula vitsukhulu va nakhulaaka khuvirila mu Isaka.” 8Nakhwo khuvoola ndi vaana vivulwangwa munjila yamanyikhana, shivali navo vaana va Nyasaye tawe; navutswa vaana vivulwangwa khulondokhana khu lilaaka lia Nyasaye, navo vakhulolanga khuva vitsukhulu vatoto. 9Nindi Nyasaye yalaaka, “Niitsa khukalukha khulitukhu liaviritswa, khandi Sara aliitsa khuva niyivula mwana.”
10Shikali ni kenako konyene tawe. Navutswa vaana va Rabeka vavili vivulwa khu tata mulala, nali kuuka weru Isaka. 11Nikhali, khali makhwane kenako nikashili khwivulwa, nikashili khukholakhu shindu shitamanu inoho shilahi, khu Nyasaye aloleshe ndi ali nu vuvoholole vu khurovola vandu; shikali khulondokhana khu mihinzilu tawe, navutswa khulondokhana khu mulaango kwekwe, 12yavoolelwa, “Mwana mukhulundu aliitsa khurumishila mwana mushie.” 13Khuli Mahandiko Matakatifu kavoolanga, “Nali nayaanza Yakobo, navutswa shinali nayaanza Esau tawe.”
14Khulwa yako, ni shina shia khunyala khuvoola? Kanyala khuva Nyasaye avula vwatoto? Shikali kario tawe! 15Nyasaye yavoolela Musa,
“Niitsa khuvela tsimbavasi mundu wa niitsa khuva nimbelele tsimbavasi;
niitsa khulolela tsimbavasi mundu wa niitsa khuva nindolela tsimbavasi.”
16Khulwa yako, shia shindu shiosi, shikali shikholekhanga shichila lienya liu mundu inoho khuli mundu yikombanga khwikholekha tawe; navutswa khulondokhana khu tsimbavasi tsia Nyasaye akhuvelanga tsionyene. 17Mahandiko Matakatifu kavoolanga makhuva yaka khulondokhana khu Mwami wa Misri, “Nakhwamihitsa, khulu khukhurumishila khumanyinya khuli ndi ni tsingulu khuvirila mu yivi, khwenya lira lianje khulanditswa shia havundu hosi mu shivala.” 18Kali vutswa havulavu ndi Nyasaye avelanga tsimbavasi mundu wa yenyi khuvela tsimbavasi, khandi alombanga mundu wa yenyi khuva muhaaka.
Vurima vwa Nyasaye khandi Tsimbavasi Tsietsie
19Navutswa mulala khu munyi anyala khundeva, “Niiva ni kario, shichila shina Nyasaye alolanga mundu ukholi shindu shitamanu? Ni viina unyala khwambakhana khukhola lienya lia Nyasaye?” 20Mulina wanje, uli viina khung'ong'olitsa Nyasaye? Shindu shialoongwa, shinyala khureeva woyo washiloonga, “Shichila shina wanoonga nisasa khuli lwasasanga?” 21Khali ndio, muloonji uloonganga tsinyungu ali nu vunyali vu khurumishila litohi khuli lwa yenyanga; khandi khuloonga tsinyungu tsivili khurula khu litohi lilala liele vutswa, inyungu indala khurumikha khu tsinyinga tsindahi muno, na yindi khu muhinzilu kwa shia khase khosi.
22Khulwa yako, nako malala mele ka Nyasaye yakhola. Yenyanga khumanyinya vurima vwevwe nu khulomba tsingulu tsietsie tsimanyikhane. Navutswa yali mwitsumishitsi, lwa yikhutsila navula khulolela yavo vayenyanga vurima, vandu vali nivalaakwa khutivitswa. 23Nyasaye yenyanga khumanyinya vukhumi vwevwe mu vunyishi khandi, vwa yakhulolela khutsi va yali niyavela tsimbavasi; yavo va khumenyi navo vayirecheshitsa vanyole vukhumi vwevwe. 24Ni vanga khutsi, navo va khuli vandu va Nyasaye yalaanga; shikali khurula mu Vayahudi vonyene tawe, navutswa khali khurula mu vandu vi tsimbia tsindi. 25Ni kilikali, Nyasaye avoolanga mu shitabu shiu Muprofeti Hoseha,
“Vandu vakhalolekhanga khuva ni vaanje tawe,
niitsa khuvalaanga ‘Vandu vaanje’.
Luhia lwa nali nakhayaanza tawe,
niitsa khululaanga ‘Muyaanze wanje’.
26Havundu halala hele ha vavoolelwa,
‘Shiumuli vandu vaanje tawe,’
naho ha valiitsa khulaangwa vaana va Nyasaye uli mwoyo.”
27Muprofeti Isaya yalomoloma makhuva yaka khulondokhana khu Israeli: “Khali niiva Vaisraeli vayivulana mu vunyishi khuli muyeeshe kuli khuluchinga lwi inyanza, nikhali, ni vatititi khuvo vonyene valiitsa khuhonyinywa; 28shichila Mwami aliitsa khukhalachila vwangu vandu vu mu shivala munjila yatoto.” 29Kali vutswa khuli Muprofeti Isaya yali niyavoola khale, “Niiva Mwami Nyasaye wi Mikaanda Chiliihe yakhavuli khukhuleshelakhu vitsukhulu valala, khwakhavele khuli litaala lia Sodomu, khwakhakwili khuli litaala lia Gomora.”
Khali Ivanjeli ni ya Israeli
30Khulwa yako, ni shina shia khunyala khuvoola? Vandu vi tsimbia tsindi vali nivambakhana khumenya khulondokhana khu likhola liu vulunji, vamala khukholwa khuva valunji khuvirila mu lisuuvila; 31navutswa Vaisraeli, vamenyanga khulondokhana khu likhola liu vulunji shichila malako, kanyala khuvakhola khuva valunji imbeli wa Nyasaye, shivakanyola tawe. 32Shichila shina? Lwa vambakhana khumenya khulondokhana khu lisuuvila; navutswa khulondokhana khu mihinzilu chiavo. Visikarila khu lichina liu khwisikaritsa; 33khuli kahandikwa mu Mahandiko Matakatifu,
“Lola, mbikhanga lichina mu Sayoni liliitsa khwisikaritsa vandu,
lwanda luliitsa khukwishitsa vandu.
Navutswa mundu uliitsa khusuuvila muye,
shialiitsa khuheelwa tsisoni tawe.”
Currently Selected:
VAROMA 9: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
